Kakinada: రాష్ట్రవ్యాప్తంగా తీవ్ర దిగ్భ్రాంతిని, సంచలనాన్ని కలిగించిన కాకినాడ పంచాయతీరాజ్ ఏఈ టి. నూకరాజు కుటుంబం సామూహిక ఆత్మహత్య కేసులో కీలక పురోగతి లభించింది. తమ చావుకు కారణమంటూ బాధితులు లేఖలో పేర్కొన్న ప్రధాన నిందితుడు, రైఫిల్ షూటింగ్ కోచ్ షేక్ సాదిక్ ఖాన్ను కాకినాడ జిల్లా పోలీసు ప్రత్యేక బృందం ఢిల్లీలో అదుపులోకి తీసుకుంది.
ఐదు రోజులుగా ఫోన్ వాడకుండా వివిధ నగరాలకు మారుతూ తప్పించుకు తిరుగుతున్న నిందితుడిని సాంకేతిక ఆధారాల సాయంతో పక్కా సమాచారంతో పట్టుకున్నారు.
ఒక కుటుంబం సర్వనాశనం – అసలేం జరిగింది?..
సాదిక్ ఖాన్ వేధింపులు, బ్లాక్మెయిలింగ్ కారణంగా ఒక ఉన్నత స్థాయి ఉద్యోగి కుటుంబం మొత్తం ఎలా బలైపోయిందో విచారణలో వెలుగుచూస్తున్న వివరాలు..
-
పరిచయంతో మొదలైన వల: నూకరాజు మనవడు కాకినాడలో సాదిక్ ఖాన్ నడుపుతున్న రైఫిల్ షూటింగ్ అకాడమీలో చేరడంతో ఈ కుటుంబంతో పరిచయం ఏర్పడింది. మాటలతో నమ్మకం కుదిర్చి, నూకరాజు కుమార్తె సౌజన్యతో సన్నిహితంగా మెలిగాడు.
-
ఇంటి ఆస్తులపై కన్ను – బ్లాక్మెయిలింగ్: సౌజన్య వ్యక్తిగత ఫొటోలు, సున్నితమైన విషయాలను అడ్డం పెట్టుకుని ఆమెను తీవ్రంగా వేధించడం మొదలుపెట్టాడు. క్రమంగా కుటుంబ సభ్యుల ఏటీఎం కార్డులు, బంగారం, నగదును తన ఆధీనంలోకి తీసుకున్నాడు. అంతేకాకుండా మతం మారాలని ఒత్తిడి చేసినట్లు ఆరోపణలు ఉన్నాయి.
-
గోదావరిలో దూకి ఆత్మహత్య: పరువు పోతుందన్న భయం, తీవ్ర మానసిక క్షోభను భరించలేక ఈ నెల 16న అర్ధరాత్రి రాజమహేంద్రవరం వద్ద ఏఈ నూకరాజు, ఆయన భార్య మీనా, కుమార్తె సౌజన్య గోదావరి నదిలో దూకారు. నూకరాజు, సౌజన్య మృతదేహాలు లభ్యం కాగా.. నూకరాజు భార్య కోసం గాలింపు కొనసాగుతోంది. మనవడు ఈదుకుంటూ ప్రాణాలతో బయటపడ్డాడు.
అల్లుడి మృతిపై కూడా విచారణ – సంచలన ఆరోపణలు..
సౌజన్య భర్త జగదీశ్వర్ రెడ్డి గత జూలై 2న అనుమానాస్పద స్థితిలో మృతి చెందడంపై ఆయన తండ్రి భాస్కర్ రెడ్డి పోలీసులకు ఫిర్యాదు చేశారు..
-
విషమిచ్చి చంపాడంటూ లేఖ: ఆత్మహత్యకు ముందు సౌజన్య రాసిన లేఖలో.. తన భర్తకు సాదిక్ ఖాన్ విషం ఇచ్చి చంపాడని, ఆస్తుల కోసం తన తండ్రిని, తనను కూడా చంపేస్తానని బెదిరించాడని పేర్కొంది.
-
అకాడమీ ముసుగులో ఆగడాలు: అకాడమీకి శిక్షణ కోసం వచ్చే పలువురు యువతులు, బాలికలతో కూడా సాదిక్ ఖాన్ ప్రత్యేక శిక్షణ పేరుతో అనుచితంగా ప్రవర్తించేవాడన్న ఆరోపణలు ఉన్నాయి.
ఢిల్లీ నుంచి కాకినాడకు నిందితుడి తరలింపు..
10 మంది ఎస్సైలు సహా 40 మంది పోలీసులు 5 ప్రత్యేక బృందాలుగా ఏర్పడి ఏపీ, తెలంగాణ, ముంబై, ఢిల్లీలలో గాలించి ఎట్టకేలకు నిందితుడిని పట్టుకున్నారు. సాదిక్ ఖాన్ను ట్రాన్సిట్ రిమాండ్పై కాకినాడకు తరలిస్తున్నారు. బాధితుల ఆత్మహత్య, జగదీశ్వర్ రెడ్డి అనుమానాస్పద మృతి, ఆర్థిక మోసాలు, బెదిరింపుల కోణాల్లో పోలీసులు సమగ్ర విచారణ చేపట్టనున్నారు.