K. Annamalai: ప్రశ్నించే హక్కు అందరికీ ఉంది.. కానీ సీజేపీకి మా మద్దతు ఉండదు..!

K. Annamalai: తమిళనాడు బీజేపీ మాజీ అధ్యక్షుడు కే అన్నామలై కేంద్ర ప్రభుత్వ వైఖరిపై తాను చేసిన వ్యాఖ్యలపై స్పష్టతనిచ్చారు. న్యూఢిల్లీలో ఇటీవల జరిగిన కాక్రోచ్ జనతా పార్టీ (సీజేపీ) నిరసనలపై పోలీసుల అణిచివేతను తప్పుపట్టడం ఆ పార్టీకి మద్దతిచ్చినట్లు కాదని ఆయన పేర్కొన్నారు. కోయంబత్తూరులో తన ‘వి ద లీడర్స్’ ఉద్యమం ఆధ్వర్యంలో గురువారం నిర్వహించిన సభలో మాట్లాడిన ఆయన, ప్రజాస్వామ్యంలో నిరసన తెలిపే హక్కు ప్రతి ఒక్కరికీ ఉంటుందని, అయితే సీజేపీ సిద్ధాంతాలతో తమకు ఎలాంటి సంబంధం లేదని స్పష్టం చేశారు.

అభిజీత్ దీప్కే నేతృత్వంలోని కాక్రోచ్ జనతా పార్టీ నిర్వహించిన ఆందోళనలపై ఇటీవల అన్నామలై మాట్లాడటం జాతీయ రాజకీయాల్లో చర్చనీయాంశంగా మారింది. దీనిపై ఆయన స్పందిస్తూ.. “సీజేపీ పంథాతో నేను ఏకీభవించను. వారి రాజకీయ ఎజెండా వేరు, మా లక్ష్యం వేరు. అయితే ప్రజాస్వామ్య వ్యవస్థలో ప్రభుత్వ విధానాలను ప్రశ్నించే స్వేచ్ఛ రాజ్యాంగం ప్రతి ఒక్కరికీ కల్పించింది. తప్పు చేస్తే చట్టప్రకారం చర్యలు తీసుకోవాలి తప్ప, రాజకీయ కక్షసాధింపులకు దిగడం సరైన పద్ధతి కాదు” అని పేర్కొన్నారు. నిరసనకారులపై చర్యలు చట్టబద్ధమైన నిబంధనల ప్రకారమే సాగాలని ఆయన నొక్కిచెప్పారు.

బీజేపీ నుంచి వస్తున్న విమర్శలను తిప్పికొడుతూ.. తనకు దేశభక్తి గురించి ఎవరూ పాఠాలు చెప్పాల్సిన అవసరం లేదని అన్నామలై వ్యాఖ్యానించారు. “నేను మాజీ ఐపీఎస్ అధికారిగా దేశంలోని పలు రాష్ట్రాల్లో సేవలు అందించాను. భారతదేశ సార్వభౌమాధికారం, సమగ్రతపై నాకు పూర్తి అవగాహన ఉంది. దేశ భద్రతకు ముప్పు ఉంటే ఐబీ, ‘రా’ వంటి నిఘా సంస్థలను ఉపయోగించి కఠిన చర్యలు తీసుకోవాలి. అంతే తప్ప సామాజిక మాధ్యమాల్లో అవాస్తవ భయాలను సృష్టించకూడదు” అని ఆయన హితవు పలికారు.

ప్రధానమంత్రి నరేంద్ర మోదీ దేశానికి చక్కటి సేవలు అందిస్తున్నారని ప్రశంసించిన అన్నామలై, అదే సమయంలో ప్రభుత్వం తీసుకునే తప్పుడు నిర్ణయాలను ప్రశ్నించేందుకు వెనుకాడబోమని తేల్చిచెప్పారు. ఎన్నికల సంఘం, సుప్రీంకోర్టు వంటి స్వతంత్ర వ్యవస్థలపై ప్రజలకు విశ్వాసం తగ్గేలా వ్యవహరించడం ఎవరికీ మంచిది కాదని ఆయన సూచించారు. కాగా, గత జూన్‌లో బీజేపీని వీడిన అన్నామలై చట్టవిరుద్ధ కార్యక్రమాలను సమర్థిస్తున్నారని తమిళనాడు బీజేపీ నేతలు ఆరోపించారు. దీనిపై అన్నామలై స్పందిస్తూ, విమర్శలను ఎదుర్కోవడానికి బదులు ప్రత్యర్థి పార్టీలకు బీజేపీయే ఉచిత ప్రచారం కల్పిస్తోందని విమర్శించారు.

కాక్రోచ్ జనతా పార్టీ నిరసనలపై కేంద్ర చర్యలను ప్రశ్నించిన అన్నామలై, తన వ్యాఖ్యలు ఆ పార్టీకి మద్దతు కాదని స్పష్టం చేశారు. ప్రజాస్వామ్యంలో నిరసనల హక్కును కాపాడాలని కోరుతూనే, చట్టవిరుద్ధ చర్యలకు పాల్పడితే నిబంధనల మేరకే శిక్షించాలని ఆయన ప్రభుత్వానికి సూచించారు.