Movie Piracy: కోట్లాది రూపాయల బడ్జెట్తో నిర్మించిన తెలుగు సినిమాలకు పైరసీ మాఫియా ఒక పెను శాపంగా మారింది. సినిమా థియేటర్లలోకి అడుగుపెట్టిన ఒక్క రోజు కూడా గడవక ముందే, పైరసీ వెబ్సైట్ల దెబ్బకు నిర్మాతలు తీవ్ర నష్టాలను చవిచూస్తున్నారు. తెలంగాణ సైబర్ క్రైమ్ పోలీసులు ఎన్ని చర్యలు తీసుకుంటున్నా, ఈ పైరసీ దందా మాత్రం మూడు పువ్వులు ఆరు కాయలుగా యథేచ్ఛగా కొనసాగుతోంది.
కట్టడి చేసినా ఆగని దందా: మూవీ రూల్జ్ కొత్త సవాల్
ఇప్పటికే ఐ బొమ్మ (I Bomma) వంటి ప్రముఖ పైరసీ సైట్లను బ్లాక్ చేసి, దాని వ్యవస్థాపకుడు ఐబొమ్మ రవిపై విచారణను పోలీసులు వేగవంతం చేశారు. అయినప్పటికీ, పైరసీ మాఫియా సాంకేతికతను వాడుకుంటూ, ఎప్పటికప్పుడు తమ కార్యకలాపాల దారులను మార్చుకుంటూ సినీ పరిశ్రమకు సవాలు విసురుతోంది.
ముఖ్యంగా, ‘మూవీ రూల్జ్’ (Movie Rulz) అనే వెబ్సైట్ ఇప్పుడు సినీ పరిశ్రమకు పెద్ద తలనొప్పిగా మారింది. ఈ శుక్రవారం విడుదలైన కొన్ని సినిమాలు ఒక్కరోజు కూడా పూర్తి కాకముందే ఈ సైట్లో ప్రత్యక్షమయ్యాయి.
ఇది కూడా చదవండి: Spirit: ఏందయ్యా ఇది.. స్పిరిట్ డైరెక్షన్ టీం లోకి రవితేజ కొడుకు, త్రివిక్రమ్ కొడుకు..
అల్లరి నరేష్ నటించిన 12ఏ రైల్వే కాలనీ, సంతాన ప్రాప్తిరస్తు, రాజు వెడ్స్ రాంబాయి, ప్రేమంటే వంటి కొత్త సినిమాల క్యామ్కార్డర్ రికార్డెడ్ ప్రింట్లు మూవీ రూల్జ్ వెబ్సైట్లో అప్లోడ్ అయ్యాయి.
థియేటర్కు వచ్చి టికెట్లు కొనుగోలు చేయలేని ప్రేక్షకులను ఈ పైరసీ ప్రింట్లు ఆకర్షిస్తున్నాయి. దీనివల్ల టాకీసుల ఆదాయం గణనీయంగా పడిపోవడంతో పాటు, నిర్మాతల లాభాలు, పంపిణీదారుల ఆదాయంపై తీవ్ర ప్రభావం చూపుతోంది.
అంతర్జాతీయ నెట్వర్క్ హస్తం?
ఒకవైపు ఐబొమ్మ రవి విచారణ కొనసాగుతుండగానే, ఇంకోవైపు పైరసీ వెబ్సైట్లలో కొత్త సినిమాలు అప్లోడ్ అవుతుండటం సైబర్ క్రైమ్ పోలీసులకు సవాలుగా మారింది. ఒకరిని అరెస్టు చేసినా, ఈ మాఫియా కొత్త వెబ్సైట్లు, కొత్త డొమైన్ పేర్లతో మళ్లీ మళ్లీ పుట్టుకొస్తున్నాయి.
దీని వెనుక బలమైన అంతర్జాతీయ నెట్వర్క్ మరియు సాంకేతిక నిపుణుల బృందం పనిచేస్తున్నట్లు పోలీసులు అనుమానిస్తున్నారు. ఐబొమ్మ వన్, మూవీ రూల్జ్ వంటి వెబ్సైట్లను ఎలా శాశ్వతంగా కట్టడి చేయాలనేది ఇప్పుడు పోలీసులకు, ప్రభుత్వానికి కొత్త సవాల్గా మారింది.
పైరసీ దందాతో తీవ్రంగా నష్టపోతున్నామని, ప్రభుత్వం, పోలీసులు దీనిపై మరింత కఠిన చర్యలు తీసుకోవాలని సినీ నిర్మాతలు ఆవేదన వ్యక్తం చేస్తున్నారు.