Drugs: తెలుగు, తమిళ సినీ ప్రేక్షకులకు సుపరిచితుడైన కోలీవుడ్ నటుడు శ్రీరామ్ మాదకద్రవ్యాల కేసులో అరెస్ట్ కావడం తమిళ చిత్ర పరిశ్రమలో తీవ్ర సంచలనంగా మారింది. చెన్నై నార్కోటిక్స్ ఇంటెలిజెన్స్ యూనిట్ అధికారులు ఆయనను ఈరోజు అదుపులోకి తీసుకున్నారు. ఎఐఏడీఎంకే మాజీ నేత ప్రసాద్ నుండి డ్రగ్స్ కొనుగోలు చేశారన్న ఆరోపణల నేపథ్యంలో ఈ అరెస్ట్ చోటు చేసుకుంది.
కేసు వివరాలు ఇలా ఉన్నాయి:
నార్కోటిక్స్ విభాగం అధికారులు డ్రగ్స్ కేసులో దర్యాప్తు కొనసాగిస్తున్న సందర్భంగా, ఇప్పటికే ఎఐఏడీఎంకే మాజీ నేత ప్రసాద్ సహా మరో ఇద్దరిని అరెస్ట్ చేశారు. విచారణలో వారి నుంచి శ్రీరామ్ పేరు వెలుగులోకి వచ్చింది. దీనిని అనుసరించి, పోలీసులు శ్రీరామ్‌ను అదుపులోకి తీసుకున్నారు.
అరెస్ట్ అనంతరం, శ్రీరామ్‌ను చెన్నైలోని రాజీవ్ గాంధీ ప్రభుత్వ ఆసుపత్రికి తరలించి వైద్య పరీక్షలు నిర్వహించారు. ఆయన రక్త నమూనాలను సేకరించిన తరువాత, నుంగంబాక్కం పోలీస్ స్టేషన్‌కి తీసుకెళ్లి రెండు గంటలపాటు విచారించారు.
నటుడు శ్రీరామ్ నేపథ్యం:
తిరుపతికి చెందిన శ్రీరామ్, సినిమాల్లో అవకాశాల కోసం చిన్న వయసులోనే చెన్నైకు వెళ్లారు. మొదట చిన్నపాటి పాత్రలతో కెరీర్ ప్రారంభించి, అనంతరం ‘రోజా పూలు’ చిత్రంతో తెలుగు, తమిళ భాషల్లో హీరోగా పరిచయం అయ్యారు. ‘ఒకరికి ఒకరు’ చిత్రంతో మంచి గుర్తింపు పొందారు. తెలుగు, తమిళ, కన్నడ చిత్రాలతో పాటు ఇటీవల ‘హరికథ’ అనే వెబ్‌సిరీస్‌లో కూడా కనిపించారు. ప్రముఖ దర్శకుడు శంకర్ రూపొందించిన ‘స్నేహితులు’ చిత్రంలో విజయ్, జీవా సరసన కీలక పాత్ర పోషించారు.
ప్రస్తుతం శ్రీరామ్ అరెస్ట్ వార్త తమిళ చిత్ర పరిశ్రమలో పెద్ద చర్చనీయాంశంగా మారింది. ఈ కేసు విచారణలో మరిన్ని కీలక సమాచారం వెలుగులోకి వచ్చే అవకాశముందని చెన్నై పోలీసులు అంచనా వేస్తున్నారు.