Transgender: సామాజికంగా విస్మరించబడిన ట్రాన్స్ జెండర్లకు తెలంగాణ ప్రభుత్వం ఓ వెలుగుగా మారుతోంది. ఇప్పటివరకు ట్రాన్స్ జెండర్లను మనం ఎక్కువగా రోడ్లపై, ట్రాఫిక్ సిగ్నల్స్ దగ్గర, ట్రైన్-బస్సుల్లో డబ్బులు అడిగే వారికి చూసే వాళ్లమో, లేదా శుభకార్యాల్లో బలవంతంగా వసూలు చేసే వారిగా గుర్తించేవాళ్లమో మాత్రమే చూశాం. కానీ ఇప్పుడు ఆ దృశ్యాన్ని పూర్తిగా మార్చే ప్రయత్నాలు జరుగుతున్నాయి.
ఉద్యోగ అవకాశాల జోరు
తెలంగాణ సీఎం రేవంత్ రెడ్డి స్పష్టంగా తెలిపారు – ట్రాన్స్ జెండర్లకు ఉద్యోగ అవకాశాలు కల్పించే దిశగా ప్రభుత్వం కృషి చేస్తోందని. ఇప్పటికే హైదరాబాద్ నగరంలో ట్రాఫిక్ వాలంటీర్లుగా వారికి అవకాశాలు ఇచ్చారు. ఇప్పుడు మరింత ముందుకు వెళ్లి GHMCలో కూడా ఉద్యోగాలు కల్పించేందుకు ప్రణాళికలు వేస్తున్నారు. రవాణా, ఐటీ, హెల్త్, ఎండోమెంట్స్, ప్రైవేట్ కంపెనీల్లో ట్రాన్స్ జెండర్లకు అవకాశాలు కల్పించాలంటూ అధికారులను ఆదేశించారు.
ఉచిత కుట్టు శిక్షణ కేంద్రం – సూర్యాపేట పైలెట్ ప్రాజెక్ట్
ఇటీవల సూర్యాపేటలో జరిగిన మహిళా, శిశు సంక్షేమ సమావేశానికి ట్రాన్స్ జెండర్లను కలెక్టర్ తేజస్ నందలాల్ పవార్ ఆహ్వానించారు. వారు భిక్షాటన చేయడం బదులు, ఉపాధి అవకాశాలు కావాలంటూ వినతిపత్రం ఇచ్చారు. దీంతో స్పందించిన కలెక్టర్, మహిళా సాధికారిత కేంద్రం ద్వారా ఉచిత కుట్టు మిషన్ శిక్షణ ఇవ్వాలని నిర్ణయించారు.
ఇది కూడా చదవండి: Sigachi Industries: సిగాచి పరిశ్రమ ఘటనలో 42కు చేరిన మృతుల సంఖ్య..
ప్రస్తుతం 35 మంది ట్రాన్స్ జెండర్లు ఈ శిక్షణలో పాల్గొంటున్నారు. జాకెట్లు, లంగాలు, పంజాబీ డ్రెస్సులు వంటి వస్త్రాల తయారీకి కావలసిన కటింగ్, కుట్టు విద్య నేర్పుతున్నారు. ఈ శిక్షణ రెండు నెలల పాటు కొనసాగుతుంది. శిక్షణ పూర్తయిన తర్వాత వారికి స్వయం ఉపాధి కోసం రుణాలు మంజూరు చేయాలని కూడా ప్రణాళిక ఉంది.
సామాజిక గౌరవం కోసం శిక్షణ
ఈ ప్రాజెక్ట్ ట్రాన్స్ జెండర్ల జీవితాల్లో గౌరవాన్ని తీసుకురావడమే కాదు, ఇతర జిల్లాలకు కూడా మార్గదర్శకంగా నిలిచే అవకాశం ఉంది. ఇకపై ట్రాన్స్ జెండర్లు కూడా గౌరవప్రదమైన జీవితం గడిపే అవకాశాలు పెరుగుతున్నాయి.
తుది మాట
ట్రాన్స్ జెండర్లు కూడా మన సమాజంలో ఒక భాగమే. వారికి అవకాశం ఇస్తే, వారు కూడా అభివృద్ధి చెందగలరు. తెలంగాణ ప్రభుత్వం తీసుకుంటున్న ఈ చర్యలు దేశంలో ఇతర రాష్ట్రాలకు కూడా స్ఫూర్తిగా నిలవాలి.