Women Commission: తెలంగాణ రాష్ట్ర మహిళా కమిషన్కు సంబంధించి ప్రభుత్వం కీలక నిర్ణయం తీసుకుంది. రాష్ట్ర మహిళా కమిషన్ కొత్త ఛైర్పర్సన్గా గద్వాల విజయలక్ష్మిని నియమిస్తూ అధికారికంగా ఉత్తర్వులు జారీ చేసింది. ఛైర్పర్సన్తో పాటు మరో ఆరుగురు సభ్యులను కూడా ప్రభుత్వం ఎంపిక చేసింది. ఈ కొత్త కమిషన్ రాబోయే ఐదేళ్ల పాటు తన బాధ్యతలను నిర్వర్తించనుంది.
ఈ కమిటీలో రాష్ట్రంలోని పలువురు ప్రముఖులకు చోటు దక్కడం విశేషం. తెలంగాణ మలిదశ ఉద్యమ తొలి అమరుడు శ్రీకాంతాచారి తల్లి కాసోజు శంకరమ్మతో పాటు, వీరనారి చాకలి ఐలమ్మ మనవరాలు చిట్యాల శ్వేతలను సభ్యులుగా నియమించారు. వీరితో పాటు శశికళ యాదవరెడ్డి, సదాలక్ష్మి, రాధాబాయి, ఉజ్మా షకీరా కూడా ఈ కమిషన్లో సభ్యులుగా కొనసాగుతారు.
మహిళల భద్రత, వారి సమస్యల పరిష్కారం కోసం ఈ కమిషన్ కృషి చేయనుంది. క్షేత్రస్థాయిలో మహిళలకు ఎదురయ్యే ఇబ్బందులను ప్రభుత్వం దృష్టికి తీసుకెళ్లడంలో ఈ కొత్త బృందం కీలక పాత్ర పోషించనుంది. ముఖ్యంగా సామాజికంగా గుర్తింపు పొందిన వ్యక్తులు ఈ కమిటీలో ఉండటంతో, మహిళా సమస్యలపై మరింత వేగంగా స్పందించే అవకాశం ఉంటుందని విశ్లేషకులు భావిస్తున్నారు.