Hyderabad: హైదరాబాద్లోని అల్వాల్ ప్రాంతంలో బుధవారం ఘోర అగ్నిప్రమాదం చోటుచేసుకుంది. స్థానిక ట్రూవేల్యూ సెకండ్ హ్యాండ్ కార్ల షోరూంలో ఒక్కసారిగా మంటలు చెలరేగాయి. చూస్తుండగానే మంటలు షోరూం అంతటా వ్యాపించడంతో చుట్టుపక్కల వారు తీవ్ర భయాందోళనకు గురయ్యారు. ఆకాశంలోకి దట్టమైన నల్లటి పొగలు కమ్ముకోవడంతో స్థానికులు వెంటనే అప్రమత్తమై అగ్నిమాపక సిబ్బందికి సమాచారం అందించారు.
సమాచారం అందిన వెంటనే అగ్నిమాపక సిబ్బంది ఘటనా స్థలానికి చేరుకున్నారు. ఫైర్ ఇంజిన్ల సహాయంతో మంటలను అదుపులోకి తెచ్చేందుకు వారు తీవ్రంగా శ్రమిస్తున్నారు. షోరూంలో కార్లు ఉండటంతో మంటలు వేగంగా వ్యాపిస్తున్నట్లు తెలుస్తోంది. ప్రమాద సమయంలో అక్కడ ఉన్న సిబ్బంది క్షేమంగా బయటపడ్డారా లేదా అనే సమాచారం ఇంకా పూర్తిస్థాయిలో తెలియాల్సి ఉంది.
ఈ అగ్నిప్రమాదానికి గల కారణాలు ఇంకా స్పష్టంగా తెలియలేదు. షార్ట్ సర్క్యూట్ వల్ల ఈ మంటలు అంటుకున్నాయా? లేక మరేదైనా కారణం ఉందా? అనే కోణంలో పోలీసులు విచారణ జరుపుతున్నారు. ఈ ప్రమాదం కారణంగా షోరూం చుట్టుపక్కల భారీగా ట్రాఫిక్ నిలిచిపోయింది. ఆస్తి నష్టం భారీగానే ఉండే అవకాశం ఉందని అంచనా వేస్తున్నారు.