Nitin Gadkari: ప్రభుత్వం ప్రవేశపెట్టిన ఇథనాల్‌ మిశ్రమ ఇంధనం (E20 పెట్రోల్) చుట్టూ దేశవ్యాప్తంగా పెద్ద చర్చ మొదలైంది. వాహనదారులు, పరిశ్రమ నిపుణులు ఈ ఇంధనంపై అనేక సందేహాలు వ్యక్తం చేస్తున్నారు. మైలేజీ తగ్గిపోతుందనే అభిప్రాయం, పాత వాహనాలకు హాని కలిగిస్తుందనే ఆరోపణలు సోషల్ మీడియాలో విస్తృతంగా ప్రచారం అవుతున్నాయి. అయితే ఈ విమర్శలను కేంద్ర రోడ్డు రవాణా మరియు హైవేల మంత్రి నితిన్‌ గడ్కరీ ఖండించారు.
65వ SIAM వార్షిక సమావేశం 2025లో గడ్కరీ మాట్లాడుతూ, ఇథనాల్‌ మిశ్రమ ఇంధనం పూర్తిగా సురక్షితమని స్పష్టం చేశారు. నియంత్రణ సంస్థలు, ఆటోమొబైల్‌ కంపెనీలు రెండూ దీనికి మద్దతు ఇస్తున్నాయని గుర్తు చేశారు. సోషల్ మీడియాలో వ్యాపిస్తున్న ప్రతికూల ప్రచారం వాస్తవానికి రాజకీయ ప్రయోజనాల కోసం చేస్తున్న చెల్లింపు ప్రచారమేనని ఆయన విమర్శించారు.
ఇది కూడా చదవండి: Free Bus: ఫ్రీ బస్సు తెచ్చిన తిప్పలు.. డ్రైవర్ చెంప పగలగొట్టిన మహిళ..!
ఇథనాల్‌ మిశ్రమం వలన వాహనాలు దెబ్బతింటాయనే ఆరోపణలను గడ్కరీ తిరస్కరించారు. గత ఆగస్టులో జరిగిన బిజినెస్ టుడే ఇండియా@100 సమ్మిట్‌లో కూడా ఆయన విమర్శకులను సవాలు చేశారు. ఇప్పటివరకు ARAI గానీ, ఆటోమొబైల్‌ కంపెనీలు గానీ E20 వల్ల కారు దెబ్బతిన్న ఒక్క ఉదాహరణ కూడా చూపలేదని స్పష్టం చేశారు.
ప్రభుత్వం మాత్రం ఈ ఇంధనాన్ని ప్రవేశపెట్టడానికి స్పష్టమైన కారణాలు చెబుతోంది. చమురు దిగుమతులపై ఆధారాన్ని తగ్గించడం, పర్యావరణ కాలుష్యాన్ని తగ్గించడం, రైతులకు కొత్త ఆదాయ వనరులు కల్పించడం ప్రధాన లక్ష్యాలు. ఈ నేపథ్యంలో ఇథనాల్‌ మిశ్రమ ఇంధనం భవిష్యత్తులో దేశానికి లాభదాయకమని కేంద్రం నమ్ముతోంది.
ప్రస్తుతం ఈ అంశంపై వివాదం కొనసాగుతున్నప్పటికీ, గడ్కరీ మాత్రం తన వైఖరిని మార్చకపోగా, ఈ ప్రాజెక్ట్‌ పట్ల మరింత నమ్మకం వ్యక్తం చేస్తున్నారు. వాహనదారులు వ్యక్తం చేస్తున్న ఆందోళనలను పరిశ్రమ నిపుణులు, నియంత్రణ సంస్థలు సమీక్షిస్తున్నప్పటికీ, ప్రభుత్వం మాత్రం ఇది సరైన దిశలో వేసిన అడుగే అని చెబుతోంది.