Delhi Pollution: దీపావళి పండుగ ముగిసిన మరుసటి రోజే దేశ రాజధాని ఢిల్లీ మరోసారి ప్రమాదకర వాయు కాలుష్య కోరల్లో చిక్కుకుంది. ఇప్పటికే అధ్వాన్నంగా ఉన్న గాలి నాణ్యతకు పండుగ వేళ భారీగా పేల్చిన టపాసుల పొగ తోడవడంతో ఢిల్లీ-ఎన్‌సీఆర్ (NCR) పరిధిలో పరిస్థితి విషమంగా మారింది. సోమవారం ఉదయం నుంచే నగరమంతా దట్టమైన బూడిద రంగు విషపు పొగమంచు (Toxic Smog) కమ్ముకోవడంతో వాహనదారులకు ఎదురుగా వస్తున్న వాహనాలు కూడా కనిపించని రీతిలో విజిబిలిటీ పడిపోయింది. కేంద్ర కాలుష్య నియంత్రణ బోర్డు (CPCB) ప్రకారం నగర సగటు ఎయిర్ క్వాలిటీ ఇండెక్స్ (AQI) 376 వద్ద ‘వెరీ పూర్’ (Very Poor) కేటగిరీలో నమోదు కాగా, పలు కీలక ప్రాంతాల్లో ఏకంగా 400 మార్కును దాటి ‘సివియర్’ (Severe) స్థాయికి చేరింది.
రాజధానిలో ప్రాంతాల వారీగా AQI పరిస్థితి..
హెచ్‌టీ పొల్యూషన్ డ్యాష్‌బోర్డ్, సీపీసీబీ తాజా నివేదికల ప్రకారం రాజధానిలోని పలు ప్రాంతాలు డేంజర్ జోన్‌లోకి వెళ్లాయి..
-
సోనియా విహార్ (Sonia Vihar): అత్యధికంగా 449 AQI నమోదై అత్యంత ప్రమాదకర స్థాయిలో నిలిచింది.
-
బురారీ క్రాసింగ్ (Burari Crossing): 445 AQIతో రెండో స్థానంలో ఉంది.
-
వివేక్ విహార్: 441 AQI నమోదైంది.
-
ఇతర తీవ్ర ప్రాంతాలు: జహంగీర్‌పురి (439), ఢిల్లీ యూనివర్సిటీ నార్త్ క్యాంపస్ (437), రోహిణి (435), డీటీయూ (431), బవానా (424), చాందినీ చౌక్, పట్పర్‌గంజ్ (ఒక్కొక్కటి 418), ముండ్కా (413), ఎన్ఐహెచ్ నరేలా, పంజాబీ బాగ్ (408), కామన్వెల్త్ స్పోర్ట్స్ కాంప్లెక్స్ (404), ఐటీవో (404).
ఢిల్లీ-ఎన్‌సీఆర్‌లోనూ ఇదే దుస్థితి..
ఢిల్లీ చుట్టుపక్కల నగరాల్లోనూ కాలుష్య తీవ్రత అధికంగా ఉంది.
-
ఘజియాబాద్: సగటు AQI 369 కాగా, న్యూ తహసీల్-లోని ప్రాంతంలో ఏకంగా 459 AQI రికార్డైంది.
-
నోయిడా: సగటు AQI 338 కాగా, సెక్టార్ 62 లో 440 AQI నమోదైంది. గ్రేటర్ నోయిడాలో 297 వద్ద ఉంది.
-
గురుగ్రామ్ & ఫరీదాబాద్: గురుగ్రామ్‌లో 312, ఫరీదాబాద్‌లో 329 సగటు AQI నమోదు కాగా, ఫరీదాబాద్ సెక్టార్ 11 లో ఏకంగా 410 AQIతో ‘సివియర్’ కేటగిరీలోకి వెళ్లింది.
దీపావళి రాత్రి నుంచే పీఎం 2.5 విలయం..
దీపావళి రాత్రి 8 గంటల నుంచి నగరవ్యాప్తంగా టపాసులు భారీగా పేలడంతో గాలి నాణ్యత ఒక్కసారిగా పడిపోయింది. 39 మానిటరింగ్ స్టేషన్ల డేటా ప్రకారం రాత్రి 7:45 గంటల సమయంలో 190 µg/m³ గా ఉన్న సగటు PM2.5 తీవ్రత.. రాత్రి 8 గంటల సమయానికి ఏకంగా 259 µg/m³కి పెరిగింది. ఇది దేశీయ నిర్దేశిత ప్రామాణిక పరిమితి (60 µg/m³) కంటే నాలుగు రెట్లు ఎక్కువ. రాత్రి 10 గంటల సమయానికి నగరంలోని మొత్తం 59 మానిటరింగ్ కేంద్రాల్లో 20 కేంద్రాలు ‘సివియర్’ కేటగిరీలోకి జారాయి.
కాలుష్యానికి కారణాలు & సుప్రీంకోర్టు ఆదేశాలు..
ఢిల్లీలో కాలుష్యం ఈ స్థాయికి చేరడానికి పలు కీలక అంశాలు కారణమని డెసిషన్ సపోర్ట్ సిస్టమ్ (DSS) విశ్లేషించింది. నగరంలో రవాణా రంగం (వాహనాల పొగ) 19% కాలుష్యానికి కారణం కాగా, పొరుగు రాష్ట్రాల్లో పంట వ్యర్థాల దహనం (Stubble Burning) 3.5% ప్రభావం చూపింది.
పండుగ టపాసుల పొగ, ప్రతికూల వాతావరణం (గంటకు 10 కి.మీ కంటే తక్కువ గాలి వేగం) వల్ల గాల్లోని విష కణాలు చెదిరిపోకుండా అక్కడే స్థిరపడిపోయాయి.అంతకుముందు నవంబర్ 2న సుప్రీంకోర్టు నవంబర్ 7, 8 తేదీల్లో పరిమిత సమయాల్లో మాత్రమే గ్రీన్ క్రాకర్స్ పేల్చడానికి అనుమతినిచ్చి, నవంబర్ 9 నుంచి సంపూర్ణ నిషేధం అమల్లోకి వస్తుందని స్పష్టం చేసినప్పటికీ.. క్షేత్రస్థాయిలో సంప్రదాయ టపాసుల అమ్మకాలు, నిబంధనల ఉల్లంఘన జరగడంతో కాలుష్యం మరింత తీవ్రమైంది.
రాబోయే కొద్ది రోజుల పాటు గాలి నాణ్యత తీవ్రమైన కేటగిరీలోనే కొనసాగే అవకాశముందని ఎయిర్ క్వాలిటీ ఎర్లీ వార్నింగ్ సిస్టమ్ హెచ్చరించడంతో ప్రజలు, ముఖ్యంగా వృద్ధులు, శ్వాసకోశ సమస్యలు ఉన్నవారు బయటకు వచ్చేటప్పుడు మాస్కులు ధరించాలని వైద్యులు సూచిస్తున్నారు.