Kalki 2: బాలీవుడ్ అగ్రనటి దీపికా పదుకొణే సినిమాల పట్ల తనకున్న నిబద్ధత కారణంగా గతంలో దర్శకులకు ఎంతో ఇష్టమైన నటిగా పేరు తెచ్చుకున్నారు. అయితే, తల్లి అయిన తర్వాత ఆమెలో చాలా మార్పులు వచ్చాయని, పని పట్ల అంకితభావం తగ్గిందని సినీ వర్గాల్లో చర్చ జరుగుతోంది. ఈ కారణంగానే ఆమె ఇప్పటికే రెండు పెద్ద సినిమాల నుంచి తప్పుకోవాల్సి వచ్చింది. వాటిలో ఒకటి ప్రభాస్ సినిమా ‘స్పిరిట్’ కాగా, మరొకటి ఇప్పుడు వార్తల్లో నిలిచిన ‘కల్కి 2898 AD’ సీక్వెల్.
పని విషయంలో షరతులు పెడుతున్న దీపిక!
సినిమా నేపథ్యం లేకుండా పరిశ్రమలోకి వచ్చిన దీపికా పదుకొణే, గతంలో తన పాత్ర కోసం చాలా కష్టపడేవారని, ఆమె అంకితభావాన్ని దర్శకులు ప్రశంసించేవారని సినీ వర్గాలు చెబుతున్నాయి. అయితే ఇప్పుడు ఆమె కథ వినకముందే దర్శకులకు, నిర్మాతలకు తన షరతుల జాబితాను అందిస్తున్నారని సమాచారం. ముఖ్యంగా, ఆమె రోజుకు కేవలం 8 గంటలు మాత్రమే పని చేస్తానని షరతు పెట్టడం వల్ల అనేక సమస్యలు వస్తున్నాయని తెలుస్తోంది. ఈ కారణంగానే ఆమెకు ‘స్పిరిట్’ సినిమాలో అవకాశం దక్కలేదు. దర్శకుడు సందీప్ రెడ్డి వంగా, దీపికా షరతులను పాటించడం అసాధ్యమని భావించి, ఆమె స్థానంలో తృప్తి డిమ్రీని ఎంపిక చేసుకున్నారు.
‘కల్కి 2898 AD’ సీక్వెల్ నుండి దీపికా తొలగింపు
ఇదే కారణంతో ఇప్పుడు ‘కల్కి 2898 AD’ సీక్వెల్ నుంచి కూడా దీపికా పదుకొణేను తొలగించారు. ఈ విషయాన్ని నిర్మాణ సంస్థ వైజయంతి మూవీస్ అధికారికంగా ట్వీట్ చేసింది. ‘కల్కి 2898 AD’కి అంకితభావం చాలా అవసరం. అన్ని అంశాలను జాగ్రత్తగా పరిశీలించిన తర్వాత, మేము ఆమెతో విడిపోవాలని నిర్ణయించుకున్నాం. దీపికా భవిష్యత్ చిత్రాలకు శుభాకాంక్షలు’ అంటూ వైజయంతి మూవీస్ పరోక్షంగా ఆమె నిబద్ధత లేకపోవడాన్ని స్పష్టం చేసింది.
తదుపరి ఏం జరుగుతుంది?
‘కల్కి 2898 AD’ సినిమాలో దీపికా పదుకొణేది చాలా కీలకమైన పాత్ర. ఆమె లేకుండా సీక్వెల్ ఎలా సాధ్యమవుతుందనే ప్రశ్న ఇప్పుడు అందరిలోనూ తలెత్తుతోంది. దర్శకుడు నాగ్ అశ్విన్ కథను మారుస్తారా? లేదా పూర్తిగా సీక్వెల్‌ను పక్కన పెడతారా? అనేది చూడాలి. ఏదేమైనా, ఒక స్టార్ హీరోయిన్ రోజుకు 8 గంటల పని షెడ్యూల్ కోసం ఒక పెద్ద సినిమాను వదులుకోవడం ఇప్పుడు ఇండస్ట్రీలో హాట్ టాపిక్‌గా మారింది.