Cm revanth: తెలంగాణ ముఖ్యమంత్రి రేవంత్ రెడ్డి కాంగ్రెస్ అగ్రనేత రాహుల్ గాంధీని కలసి పలు కీలక అంశాలపై చర్చించారు. కేబినెట్ విస్తరణ, ఎమ్మెల్యే కోటాలో ఎమ్మెల్సీ అభ్యర్థుల ఎంపిక, కొత్త పార్టీ ఇంచార్జ్ నియామకం వంటి అంశాలు ఈ భేటీలో ప్రధానంగా నిలిచాయి.
కేబినెట్ విస్తరణపై చర్చ
తెలంగాణ మంత్రివర్గ విస్తరణను త్వరలోనే చేపట్టాలని కాంగ్రెస్ హైకమాండ్ భావిస్తోందని, ఇందులో కొత్త మంత్రులను ఎంపిక చేసే ప్రక్రియపై రాహుల్ గాంధీతో రేవంత్ రెడ్డి చర్చించినట్లు తెలుస్తోంది. కొన్ని కీలక శాఖలకు కొత్త నేతలను తీసుకురావడం, ప్రభుత్వం ప్రాధాన్యతనిచ్చే అంశాలను ముందుకు తీసుకెళ్లే విధంగా కేబినెట్‌ను మళ్లీ రూపకల్పన చేయాలని రేవంత్ రెడ్డి అగ్రనేతల ముందు వివరించారు.
పార్టీ కొత్త ఇంచార్జ్ నియామకం
తెలంగాణలో కొత్త పార్టీ ఇంచార్జ్‌ను నియమించాలనే ఆలోచన నేపథ్యంలో, ఈ భేటీకి మరింత ప్రాధాన్యత ఏర్పడింది. రాష్ట్రంలో పార్టీని మరింత బలోపేతం చేయడానికి సరైన నేతను నియమించాలనే అంశంపై రాహుల్ గాంధీతో రేవంత్ చర్చించినట్లు సమాచారం.
ఎమ్మెల్సీ అభ్యర్థుల ఎంపిక
త్వరలో ఖాళీ కానున్న ఎమ్మెల్యే కోటా ఎమ్మెల్సీ స్థానాల భర్తీపై కూడా చర్చ జరిగింది. పార్టీలో నిబద్ధత గల నేతలకు అవకాశం కల్పించే దిశగా ఎంపిక ప్రక్రియ జరగనుందని తెలుస్తోంది.
బీసీలకు 42% రిజర్వేషన్ పై వివరణ
కులగణన నిర్వహణ, బీసీలకు 42% రిజర్వేషన్‌ను పార్టీ పరంగా అమలు చేయడంపై కూడా రాహుల్‌కు సీఎం రేవంత్ వివరించినట్లు సమాచారం. బీసీల హక్కులను పరిరక్షించేందుకు ప్రభుత్వం కట్టుబడి ఉందని, ఈ విషయంలో కాంగ్రెస్ పార్టీ ఇచ్చిన హామీలను అమలు చేసేందుకు చర్యలు తీసుకుంటున్నామని ఆయన స్పష్టం చేసినట్లు తెలుస్తోంది.
ఈ భేటీ అనంతరం రేవంత్ రెడ్డి కాంగ్రెస్ అగ్రనేతలతో మరిన్ని సమావేశాలు నిర్వహించనున్నారని సమాచారం. త్వరలో తెలంగాణ రాజకీయాల్లో కీలక పరిణామాలు చోటుచేసుకునే అవకాశం ఉందని విశ్లేషకులుభావిస్తున్నారు.