Revanth Reddy: భాగ్యనగర నడిబొడ్డున ఉన్న మైత్రీవనం కూడలిలో తెలుగుజాతి గర్వించదగిన మహానాయకుడు, దివంగత ముఖ్యమంత్రి నందమూరి తారకరామారావు (ఎన్టీఆర్) విగ్రహావిష్కరణ మహోత్సవం అత్యంత వైభవంగా జరిగింది. సినీ, రాజకీయ రంగాలకు చెందిన ప్రముఖులు భారీ సంఖ్యలో తరలివచ్చిన ఈ వేడుకలో తెలంగాణ ముఖ్యమంత్రి ఎనుముల రేవంత్ రెడ్డి ముఖ్య అతిథిగా పాల్గొని, ఎన్టీఆర్ విగ్రహాన్ని ఆవిష్కరించారు.
ఈ సందర్భంగా సీఎం రేవంత్ రెడ్డి మాట్లాడుతూ.. “భారతదేశ చరిత్ర పుటల్లో ఎప్పటికీ నిలిచిపోయే అతికొద్ది మంది అగ్రనేతలలో ఎన్టీఆర్ ఒకరు. దేశంలో డాక్టర్ బి.ఆర్. అంబేడ్కర్, ఇందిరాగాంధీ తర్వాత ఆ స్థాయి ప్రజాదరణ, స్థానం సంపాదించుకున్న ఏకైక జననేత ఆయనే. ఈ భూమి ఉన్నంత కాలం ఈ ముగ్గురు మహానుభావుల కీర్తిని దేశం స్మరించుకుంటూనే ఉంటుంది. నీతి, నిజాయితీ, ఉక్కు సంకల్పానికి ఎన్టీఆర్ నిలువెత్తు రూపం” అని కొనియాడారు.
విమర్శలకు భయపడను.. అందుకే హైదరాబాద్ నడిబొడ్డున పెట్టాం!
హైదరాబాద్ నడిబొడ్డున ఆంధ్రప్రదేశ్కు చెందిన నేత విగ్రహాన్ని పెట్టడం ఏంటంటూ వస్తున్న విమర్శలపై సీఎం రేవంత్ రెడ్డి తనదైన శైలిలో తీవ్రంగా మండిపడ్డారు.
ఎన్టీఆర్ ఏ ఒక్క ప్రాంతానికో, కులానికో పరిమితమైన వ్యక్తి కాదు.. ఆయన ఇరు రాష్ట్రాల తెలుగుజాతి గర్వించదగిన బిడ్డ. అందుకే అన్ని వర్గాలకు అతీతంగా మైత్రీవనం చౌరస్తాలో ఆయన విగ్రహాన్ని ప్రతిష్టించాం. ఒక ముఖ్యమంత్రిగా అన్నగారి విగ్రహాన్ని ఆవిష్కరించే అదృష్టం దక్కడం నా జీవితంలో మరువలేని మధుర అనుభూతి. ఈ విషయంలో నేను ఎవరి విమర్శలకూ భయపడే ప్రసక్తే లేదు” అని సీఎం స్పష్టం చేశారు.
కేసీఆర్కు రాజకీయ భిక్ష పెట్టింది అన్నగారే!
తెలంగాణ రాజకీయాలపై ఎన్టీఆర్ వేసిన ముద్రను గుర్తుచేస్తూ విపక్షాలపై రేవంత్ రెడ్డి పరోక్షంగా విరుచుకుపడ్డారు. తెలంగాణ సమాజానికి తుమ్మల నాగేశ్వరరావు, మండవ వెంకటేశ్వరరావు, మాధవరెడ్డి, మోత్కుపల్లి నర్సింహులు లాంటి దిగ్గజ నాయకులను పరిచయం చేసింది ఎన్టీఆరేనని గుర్తుచేశారు. “అంతెందుకు.. కేసీఆర్కు రాజకీయ భిక్ష పెట్టి, గుర్తింపు ఇచ్చింది కూడా అన్నగారే. అలాంటి మహానుభావుడి నీడన పెరిగి, ఈ రోజు ఆయనను తక్కువ చేసి మాట్లాడటం సంస్కారం అనిపించుకోదు. అన్నగారి పేరు పెట్టుకున్న వారు కూడా ఈ రోజు విమర్శలు చేసే స్థాయికి దిగజారడం విచారకరం” అని వ్యాఖ్యానించారు.
ఎన్టీఆర్, ఇందిరమ్మ ఆశయాల కలయికే మా ‘ప్రజాపాలన’!
ప్రస్తుత కాంగ్రెస్ ప్రభుత్వం అందిస్తున్న సంక్షేమ పాలనకు నాటి ఎన్టీఆర్ నిర్ణయాలే పునాది అని ముఖ్యమంత్రి వివరించారు:
-
పథకాల స్ఫూర్తి: ఆనాడు ఎన్టీఆర్ తెచ్చిన పక్కా ఇళ్ల పథకమే నేటి ‘ఇందిరమ్మ ఇండ్లు’. నాడు ఆయన ప్రవేశపెట్టిన రూ.2 కిలో బియ్యం పథకం స్ఫూర్తితోనే నేడు కాంగ్రెస్ ప్రభుత్వం సన్నబియ్యం పంపిణీ చేస్తోంది. అలాగే నాటి జనతా వస్త్రాల ఆలోచనే నేటి ఇందిరమ్మ చీరలకు మార్గదర్శకం.
-
ఉచిత విద్యుత్: రైతులకు నేడు ఇస్తున్న 24 గంటల ఉచిత కరెంట్కు.. ఆనాడు ఎన్టీఆర్ తీసుకున్న రూ.50 హార్స్ పవర్ విద్యుత్ నిర్ణయమే మూలమన్నారు.
-
వ్యవస్థల మార్పు: నాటి పాత పటేల్, పట్వారీ వ్యవస్థలను రద్దు చేసి వెనుకబడిన వర్గాలకు ఆత్మగౌరవాన్ని ఇచ్చింది ఎన్టీఆరేనని కొనియాడారు. నాడు ఎస్సీ, ఎస్టీ, మైనార్టీల కోసం ఇందిరాగాంధీ.. బీసీ వర్గాల కోసం ఎన్టీఆర్ శ్రమించడం వల్లే, నేడు ఆయా వర్గాల వారు పాలకులుగా ఎదగగలిగారని చెప్పారు.
“ఇందిరమ్మ ఆశీస్సులు, అన్న ఎన్టీఆర్ స్ఫూర్తి.. ఈ రెండింటి కలయికతోనే తెలంగాణలో ప్రజాపాలన సాగుతోంది. కోటి మంది మహిళలను కోటీశ్వరులను చేయడమే మా లక్ష్యం. రాబోయే పదేళ్లూ (2024 – 2034) మాదే అధికారం. నాడు ఐటీ రంగంలో చంద్రబాబు నాయుడు హైటెక్ సిటీని డెవలప్ చేసినట్లు.. నేడు మేము 30 వేల ఎకరాలలో ‘భారత్ ఫ్యూచర్ సిటీ’ని నిర్మించి హైదరాబాద్ను గ్లోబల్ లెవెల్లో నిలబెడతాం” అని సీఎం రేవంత్ రెడ్డి ధీమా వ్యక్తం చేశారు.