కేసీఆర్, ఆయన బంధువులపై సీఎం తీవ్ర ఆరోపణలు..
గత బీఆర్‌ఎస్ పాలనలో జరిగిన భూ అక్రమాలపై సీఎం రేవంత్ రెడ్డి నిప్పులు చెరిగారు.
కుమ్మక్కై కబ్జా యత్నం: నాటి ముఖ్యమంత్రి కేసీఆర్, ఆయన బంధువు దామోదర్ రావు, గోల్డ్ స్టోన్ ప్రసాద్‌లు కుమ్మక్కై మియాపూర్‌లోని వేల కోట్ల విలువైన ప్రభుత్వ భూములను కాజేసేందుకు కుట్ర పన్నారని ఆరోపించారు.
ముడుపుల బాగోతం: ఈ వ్యవహారంలో భారీగా నగదు బదిలీలతో పాటు విలాసవంతమైన కార్లు ముడుపులుగా చేతులు మారాయని సీఎం సంచలన వ్యాఖ్యలు చేశారు.
జైలుకు పంపినా వెనక్కి తగ్గలేదు: ఎమ్మెల్యేగా, ఎంపీగా, పీసీసీ అధ్యక్షుడిగా ఉన్న సమయంలో భూ ఆక్రమణలపై నిరంతరం పోరాడినందుకే తనపై కక్షగట్టి అప్పటి ప్రభుత్వం జైలుకు పంపిందని గుర్తు చేసుకున్నారు. ఎన్ని ఇబ్బందులు ఎదురైనా వెనక్కి తగ్గకుండా చేసిన న్యాయపోరాటం వల్లే నేడు ప్రజల ఆస్తులు దక్కాయని స్పష్టం చేశారు.
మూడేళ్లలో రూ.1.50 లక్షల కోట్ల విలువైన భూముల పరిరక్షణ..
కాంగ్రెస్ ప్రభుత్వం అధికారంలోకి వచ్చిన ఈ మూడేళ్ల కాలంలోనే దాదాపు రూ. 1.50 లక్షల కోట్ల విలువైన ప్రభుత్వ, అటవీ భూములను ఆక్రమణల కోరల నుంచి కాపాడినట్లు రేవంత్ రెడ్డి వివరించారు.
ఐఎంజీ, గచ్చిబౌలి, మామిడిపల్లి: గతంలో బీఆర్‌ఎస్ పెద్దలు కొట్టేయాలని చూసిన ఐఎంజీ (IMG) భూములతో పాటు గచ్చిబౌలి, మామిడిపల్లి ప్రాంతాల్లోని వివాదాస్పద భూములను రక్షించామన్నారు.
గుర్రంగూడ అటవీ భూమి: కేటీఆర్ అనుచరులు కబ్జా చేయాలని చూసిన గుర్రంగూడ ప్రాంత భూమిపై సుప్రీంకోర్టు వరకు పోరాడి, అది అటవీ భూమేనని తీర్పు రాబట్టామని తెలిపారు.
మంచిరేవుల: మంచిరేవులలో స్వాధీనం చేసుకున్న 143 ఎకరాల్లో పోలీసుల పిల్లల నాణ్యమైన చదువు కోసం ప్రత్యేక పాఠశాలను ఏర్పాటు చేసినట్లు చెప్పారు.
భూపాలపల్లి, కొత్తగూడెం: జయశంకర్ భూపాలపల్లిలో గతంలో పార్టీ ఫిరాయించిన ఎమ్మెల్యేకు నజరానాగా ఇచ్చిన 400 ఎకరాల అటవీ భూమితో పాటు భద్రాద్రి కొత్తగూడెంలోని ఆక్రమణలను కూడా అడ్డుకున్నామని వెల్లడించారు.
భూముల విక్రయంపై కేబినెట్ సబ్ కమిటీ.. పేదల విద్య, వైద్యానికే నిధులు!
సుప్రీంకోర్టు తీర్పుతో ప్రభుత్వ పరమైన భూముల సంరక్షణకు పూర్తిస్థాయి చర్యలు తీసుకోవాలని అధికారులను ఆదేశించినట్లు సీఎం తెలిపారు.ఈ భూముల సమగ్ర వినియోగం, వనరుల సమీకరణపై విధివిధానాలు ఖరారు చేసేందుకు త్వరలోనే కేబినెట్ సబ్ కమిటీని నియమించనున్నట్లు పేర్కొన్నారు.
అవసరమైన చోట ప్రభుత్వ భూములను విక్రయించడం లేదా లీజుకు ఇవ్వడం ద్వారా వచ్చే నిధులను రాష్ట్రంలోని విద్య, వైద్యం, సాగునీరు వంటి కీలక ప్రాధాన్యతా రంగాలకు కేటాయిస్తామని స్పష్టం చేశారు. ముఖ్యంగా ప్రభుత్వ పాఠశాలలు, విద్యావ్యవస్థ బలోపేతానికి వీటిని పెద్దఎత్తున ఉపయోగిస్తామన్నారు.ఇదే క్రమంలో వివాదాస్పద ప్రాంతాల్లోని అక్రమ నిర్మాణాలను తొలగించి, తెలంగాణ తొలి అమరుడు ‘శ్రీకాంతాచారి అమరవీరుల కాలనీ’ని నిర్మిస్తామని హామీ ఇచ్చారు.
అసెంబ్లీకి రండి.. తేల్చుకుందాం: బీఆర్‌ఎస్‌కు సీఎం సవాల్!
మియాపూర్ భూములపై ఇంతటి కీలక తీర్పు వచ్చినా బీఆర్‌ఎస్ నేతలు నోరు మెదపకపోవడం వారి లాలూచీ రాజకీయాలకు నిదర్శనమని సీఎం రేవంత్ రెడ్డి విమర్శించారు. ఉమ్మడి రాష్ట్రంలో పద్మాలయ స్టూడియో, ల్యాంకో భూములపై కేసులు వేసినవారు అధికారంలోకి రాగానే సైలెంట్ అయ్యారని ఎద్దేవా చేశారు.
హరీశ్ రావు మామ హనుమంతరావు ఆక్రమించిన భూముల సర్వేను అధికారులతో అడ్డుకుని స్టే తెచ్చుకున్నారని ఆరోపించారు. “గత పదేళ్లలో జరిగిన భూ ఆక్రమణలపై రాబోయే అసెంబ్లీ సమావేశాల్లో చర్చకు సిద్ధమా? ధైర్యం ఉంటే సభకు రండి, ప్రజాక్షేత్రంలో ప్రజల ముందే అన్ని ఆధారాలతో నిజానిజాలు తేల్చుకుందాం” అని ప్రతిపక్ష నేతలకు సీఎం రేవంత్ రెడ్డి బహిరంగ సవాల్ విసిరారు.
