Chandrababu: విజయ్ రాకతో విజయవాడ దద్దరిల్లిపోతోంది!.. ఒకే వేదికపై ఇద్దరు ముఖ్యమంత్రులు..!

కార్యక్రమంలో ముఖ్య అతిథిగా పాల్గొన్న సీఎం విజయ్‌ను సాదరంగా ఆహ్వానిస్తూ సీఎం చంద్రబాబు నాయుడు ఉద్విగ్నభరిత ప్రసంగం చేశారు. దుర్గమ్మ తల్లి, భారత్ మాత, తెలుగు తల్లికి జయజయధ్వానాలు పలుకుతూ ప్రసంగాన్ని మొదలుపెట్టిన ఆయన.. సభకు పోటెత్తిన వేలాది మంది యువతను చూసి పులకించిపోయారు.

తమిళనాడు ముఖ్యమంత్రిగా బాధ్యతలు చేపట్టిన తర్వాత విజయ్ పర్యటించిన మొట్టమొదటి పొరుగు రాష్ట్రం ఆంధ్రప్రదేశ్ కావడం, అందునా పవిత్రమైన కనకదుర్గమ్మ కొలువైన విజయవాడ గడ్డ కావడం ఎంతో సంతోషాన్నిస్తోందని చంద్రబాబు పేర్కొన్నారు.

తమిళనాడును అభివృద్ధి పథంలో నడిపించాలనే బలమైన ఆకాంక్షతో, కేవలం రెండేళ్ల వ్యవధిలోనే సొంతంగా పార్టీని స్థాపించి ముఖ్యమంత్రి పీఠాన్ని అధిష్టించిన అరుదైన నాయకుడు విజయ్. ప్రజాసేవ పట్ల ఆయనకున్న పట్టుదల, నిబద్ధత నేటి యువతరానికి ఎంతో స్ఫూర్తిదాయకం అని చంద్రబాబు కొనియాడారు.

వెండితెరపై కోట్ల మంది హృదయాలను గెలుచుకుని, నేడు ప్రజా జీవితంలోకి వచ్చిన విజయ్ రాకతో మీరిస్తున్న ఉత్సాహం చూస్తుంటే విజయవాడ నగరం నిజంగానే దద్దరిల్లిపోతోంది” అంటూ సభికులను ఉత్సాహపరిచారు.

ఈ వేదికపై జాతీయ సమగ్రత, దక్షిణాది రాష్ట్రాల అభివృద్ధిపై చంద్రబాబు కీలక వ్యాఖ్యలు చేశారు. “రాజకీయంగా, భౌగోళికంగా మన రాష్ట్రాలు వేరు కావచ్చు.. కానీ మనందరి ఆకాంక్ష ఒక్కటే. భారతదేశంతో పాటు ఆంధ్రప్రదేశ్, తమిళనాడు సహా అన్ని రాష్ట్రాలు సుభిక్షంగా వర్ధిల్లాలి” అని స్పష్టం చేశారు.

ప్రధానమంత్రి నరేంద్ర మోదీ దృఢమైన నాయకత్వంలో గోదావరి-కావేరి నదుల అనుసంధానం అతి త్వరలోనే సాకారం కాబోతోందని బాబు ధీమా వ్యక్తం చేశారు. “దుర్గమ్మ తల్లి సాక్షిగా మన విజయవాడ నుంచే గోదావరి, కృష్ణమ్మలు కలుస్తాయి. ఈ మహత్తర ప్రాజెక్టును పూర్తిచేసే సత్తా ఒక్క నరేంద్ర మోదీకే ఉంది. ఈ నదుల అనుసంధానం పూర్తయితే గోదావరి, కృష్ణ, పెన్నా, తుంగభద్ర, కావేరి నదులు ఏకమై ఏపీ, తమిళనాడు సహా నాలుగు దక్షిణాది రాష్ట్రాలు సస్యశ్యామలమవుతాయి” అని వివరించారు.

వేదిక ముందు కిక్కిరిసిపోయిన యువతనుద్దేశించి చంద్రబాబు మాట్లాడుతూ భవిష్యత్ భారతంపై తన విజన్‌ను పంచుకున్నారు:

అనంతరం, కోట్లాది మంది అభిమానాన్ని సొంతం చేసుకున్న తమిళనాడు సీఎం విజయ్‌ను వేదికపై ప్రసంగించవలసిందిగా చంద్రబాబు గౌరవపూర్వకంగా ఆహ్వానించారు.