Amazon: భక్తుల విశ్వాసాలను వ్యాపారంగా మలచుకుంటూ, తప్పుడు ప్రకటనలతో మోసపూరిత విక్రయాలకు పాల్పడిన వ్యవహారంలో ప్రముఖ ఈ-కామర్స్ దిగ్గజం అమెజాన్ (Amazon Seller Services Pvt Ltd) కు గట్టి ఎదురుదెబ్బ తగిలింది.
శ్రీరామ జన్మభూమి తీర్థ క్షేత్ర ట్రస్ట్ నుంచి ఎలాంటి అధికారిక అనుమతి లేకుండానే.. సాధారణ మిఠాయిలను ‘శ్రీ రామ్ మందిర్ అయోధ్య ప్రసాద్’ పేరిట తమ ప్లాట్ఫామ్పై విక్రయించడానికి అనుమతించినందుకుగాను కేంద్ర వినియోగదారుల పరిరక్షణ అథారిటీ (CCPA) అమెజాన్కు రూ. 1 లక్ష జరిమానా విధించింది.
భక్తుల విశ్వాసంతో ఆటలు – రూ. 25 లక్షల విక్రయాలు..
ఈ కేసు వివరాల్లోకి వెళ్తే..
-
ప్రాణప్రతిష్ఠ సమయంలోనే మోసం: జనవరి 22, 2024న అయోధ్యలో రాముడి ప్రాణప్రతిష్ఠ వేడుక జరుగుతున్న కీలక సమయంలో.. దేశవ్యాప్తంగా భక్తుల్లో నెలకొన్న భక్తిభావాలను ఆసరాగా చేసుకుని ఈ విక్రయాలు సాగాయి.
-
నకిలీ ప్రసాదం లిస్టింగ్: చందు ట్రేడింగ్ కంపెనీ (బీహార్ బ్రదర్స్ బ్రాండ్) కింద సాధారణ నెయ్యి లడ్డూలు, ఖోవా లడ్డూలు, బూందీ లడ్డూలు, ఆవు పాల పేడాలను అయోధ్య ప్రసాదంగా అమెజాన్లో లిస్ట్ చేశారు. దీనిద్వారా ఆ విక్రేత ఏకంగా రూ. 25.26 లక్షల విలువైన అమ్మకాలు జరపగా, అమెజాన్ సైతం కమీషన్లు, ఫీజుల రూపంలో ఆదాయం పొందింది.
-
సీసీపీఏ హెచ్చరిక: అయోధ్య రాముడికి నివేదించి పూజించిన పవిత్ర ఆహారాన్నే భక్తులు ప్రసాదంగా భావిస్తారు. ట్రస్ట్ అనుమతి లేకుండా సాధారణ స్వీట్లకు ఈ పేరును వాడటం కేవలం వ్యాపార మోసం మాత్రమే కాదు, కోట్లాది మంది భక్తుల మతపరమైన మనోభావాలను దెబ్బతీయడమే అని సీసీపీఏ స్పష్టం చేసింది.
ఈ వ్యవహారంపై కాన్ఫెడరేషన్ ఆఫ్ ఆల్ ఇండియా ట్రేడర్స్ (CAIT) చేసిన ఫిర్యాదు ఆధారంగా సమగ్ర విచారణ చేపట్టిన చీఫ్ కమిషనర్ నిధి ఖారే నేతృత్వంలోని కమిటీ ఈ ఆదేశాలు జారీ చేసింది. జరిమానా మొత్తాన్ని 15 రోజుల్లోగా డిపాజిట్ చేయాలని ఆదేశించింది.
తిరుపతి లడ్డూ సహా 10 ప్రముఖ దేవాలయాల ప్రసాదాలపై కఠిన ఆంక్షలు..
ఈ ఘటన నేపథ్యంలో సీసీపీఏ కేవలం అయోధ్యకే పరిమితం కాకుండా దేశంలోని ప్రముఖ పుణ్యక్షేత్రాల ప్రసాదాల విక్రయాలపై అత్యంత కఠిన మార్గదర్శకాలను జారీ చేసింది.
-
ధృవీకరణ పత్రం తప్పనిసరి: దేవాలయ ట్రస్టులు లేదా యాజమాన్యాల నుంచి అధికారిక అనుమతి పత్రాలు లేకుండా ప్రసాదం, మహాప్రసాదం, భోగ్ వంటి పేర్లతో ఎలాంటి ఆహార పదార్థాలను ఆన్లైన్లో లిస్ట్ చేయడానికి వీల్లేదు.
-
పరిధిలోకి వచ్చే ప్రధాన ఆలయాలు:
-
తిరుమల తిరుపతి దేవస్థానం (TTD)
-
అయోధ్య శ్రీరామ జన్మభూమి మందిరం
-
శ్రీ మాతా వైష్ణోదేవి క్షేత్రం
-
వారణాసి శ్రీ కాశీ విశ్వనాథ మందిరం
-
పూరీ శ్రీ జగన్నాథ దేవాలయం
-
కేదార్నాథ్ & బద్రీనాథ్ ఆలయాలు
-
సోమనాథ్, ద్వారకాధీశ్ మరియు ఉజ్జయిని మహాకాళేశ్వర్ ఆలయాలు.
-
-
విక్రేతల పూర్తి వివరాల ప్రదర్శన: కస్టమర్లను తప్పుదోవ పట్టించకుండా విక్రేత చిరునామా, కస్టమర్ కేర్ నంబర్, గ్రీవెన్స్ ఆఫీసర్ వివరాలను ప్రొడక్ట్ పేజీలోనే స్పష్టంగా చూపించాలని ఆదేశించింది. కీ-వర్డ్ ఆధారంగా ఇలాంటి నకిలీ లిస్టింగ్లను గుర్తించి వెంటనే తొలగించే పటిష్టమైన సాంకేతిక వ్యవస్థను అమలు చేయాలని స్పష్టం చేసింది.