KTR: తెలంగాణలో అధికారంలో ఉన్న కాంగ్రెస్ పార్టీ వైఫల్యాలు ప్రజలందరికీ అర్థమయ్యాయని, రాష్ట్రంలో ఆ పార్టీ పతనం కావడం ఖాయమని భారత రాష్ట్ర సమితి (BRS) వర్కింగ్ ప్రెసిడెంట్ కల్వకుంట్ల తారక రామారావు (కేటీఆర్) సంచలన వ్యాఖ్యలు చేశారు. హైదరాబాద్ జిల్లాకు చెందిన పార్టీ ముఖ్య నేతలతో నిర్వహించిన సమావేశంలో ఆయన మాట్లాడారు. రాష్ట్రంలో కాంగ్రెస్ ప్రభుత్వం సగం పదవీ కాలాన్ని (రెండున్నర ఏళ్లు) పూర్తి చేసుకున్న సందర్భంగా.. స్వయంగా ముఖ్యమంత్రి రేవంత్ రెడ్డే తన ప్రభుత్వంపై అంతర్గతంగా ఒక సర్వే చేయించుకున్నారని కేటీఆర్ ఈ సందర్భంగా వెల్లడించారు. అయితే ఆ సర్వేలో కాంగ్రెస్ ప్రభుత్వంపై ప్రజల్లో తీవ్రమైన వ్యతిరేకత ఉందని చాలా స్పష్టంగా తేలిందని ఆయన పేర్కొన్నారు.
ఈ సమావేశంలో వివిధ సర్వేల నివేదికలను కేటీఆర్ వివరంగా ప్రస్తావించారు. ముఖ్యమంత్రి చేయించుకున్న సొంత సర్వే ప్రకారమే.. రాష్ట్రంలో ఒకవేళ ఇప్పుడు ఎన్నికలు జరిగితే బీఆర్ఎస్ పార్టీ ఏకంగా 78 సీట్లు గెలుచుకుని అత్యంత సులభంగా మళ్లీ అధికారంలోకి వస్తుందని తేలిందని చెప్పారు. కేవలం సీఎం సర్వేలోనే కాకుండా.. రెండు పెద్ద మీడియా సంస్థలు, అలాగే కేంద్ర, రాష్ట్ర ప్రభుత్వాల ఇంటెలిజెన్స్ వర్గాలు క్షేత్రస్థాయిలో సేకరించిన వివరాల్లో కూడా ఇదే నిజం బయటపడిందని కేటీఆర్ స్పష్టం చేశారు. కాంగ్రెస్ పాలనలో రాష్ట్రం వెనక్కి వెళ్ళిందని, మళ్లీ కేసీఆర్ ముఖ్యమంత్రి అయితేనే బాగుంటుందని ప్రజలు బలంగా కోరుకుంటున్నట్లు అన్ని సర్వేలు చెబుతున్నాయని వివరించారు.
కాంగ్రెస్ ప్రభుత్వం అధికారంలోకి వచ్చిన కొద్ది రోజుల్లోనే ప్రజల నమ్మకాన్ని పూర్తిగా కోల్పోయిందని కేటీఆర్ విమర్శించారు. అన్ని సర్వే నివేదికల్లోనూ కాంగ్రెస్ పార్టీ ఓడిపోతుందని, ప్రజల్లో తీవ్ర వ్యతిరేకత ఉందని తేలడంతో ముఖ్యమంత్రి రేవంత్ రెడ్డికి ఏం చేయాలో పాలుపోవడం లేదని ఎద్దేవా చేశారు. ఆ సర్వేల భయంతోనే, తీవ్ర నిరాశతో రేవంత్ రెడ్డి గత వారం రోజులుగా ఇష్టమొచ్చినట్లు అడ్డగోలుగా మాట్లాడుతున్నారని మండిపడ్డారు. రాష్ట్రంలో కాంగ్రెస్ పార్టీ పతనాన్ని ఆపడం ఇప్పుడు ఎవరి వల్లా కాదని కేటీఆర్ ధీమా వ్యక్తం చేశారు.