Satya Kumar Yadav: దేశ రాజధాని ఢిల్లీలో ఓటర్ల జాబితా ప్రత్యేక ముమ్మర సవరణ (SIR) వివాదం, చీఫ్ ఎలక్షన్ కమిషనర్ (CEC) జ్ఞానేష్ కుమార్ రాజీనామా డిమాండ్‌తో కాక్రోచ్ జనతా పార్టీ (CJP) చేపట్టిన ఆందోళనల వేడి ఇప్పుడు ఏపీ రాజకీయాల్లో మాటల యుద్ధానికి దారితీసింది. ఢిల్లీ పోలీసుల అరెస్టులను తప్పుబడుతూ, ఎన్నికల సంస్కరణలు రావాలంటూ వైఎస్సార్‌సీపీ అధినేత, మాజీ సీఎం వైఎస్ జగన్ మోహన్ రెడ్డి చేసిన ట్వీట్‌పై బీజేపీ తీవ్రంగా విరుచుకుపడింది. జగన్ చేసిన వ్యాఖ్యలకు ఆంధ్రప్రదేశ్ రాష్ట్ర వైద్యారోగ్య శాఖ మంత్రి, బీజేపీ సీనియర్ నేత సత్యకుమార్ యాదవ్ ‘ఎక్స్’ (ట్విట్టర్) వేదికగా అత్యంత ఘాటుగా కౌంటర్ ఇచ్చారు.
ఓడిపోయిన వాళ్లంతా చేరారు.. మీరెప్పుడు వస్తారా అని చూస్తున్నా.. సత్యకుమార్ ఎద్దేవా
వైఎస్ జగన్ ట్వీట్‌ను ట్యాగ్ చేస్తూ మంత్రి సత్యకుమార్ యాదవ్ సూటి ప్రశ్నలతో విరుచుకుపడ్డారు. ఎన్నికల్లో ఓడిపోయిన వాళ్లంతా ఇప్పటికే ఈ ఆందోళనల్లో చేరిపోయారు. ఈ రగడలోకి మీరు ఎప్పుడు ఎంట్రీ ఇస్తారా అని నేను కూడా ఎదురుచూస్తున్నా అంటూ మొదట్లోనే చురకలంటించారు.
151 సీట్లు వచ్చినప్పుడు కేంద్రం, ఈసీ మారాయా?
అసలు మీరు ఏ ఎన్నికల ప్రక్రియను తప్పుబడుతున్నారు జగన్ గారూ? 2019లో వైఎస్సార్‌సీపీకి 151 అసెంబ్లీ సీట్లు, 22 లోక్‌సభ స్థానాలు వచ్చిన ఎన్నికల గురించా? అప్పుడు అధికారంలో ఉన్న కేంద్ర ప్రభుత్వం, ఎన్నికలు నిర్వహించిన కేంద్ర ఎన్నికల సంఘం కూడా ఇవే కదా! అంటే మీరు గెలిచినప్పుడు అంతా సవ్యంగా ఉన్నట్టు.. ప్రజలు మిమ్మల్ని తిరస్కరించి ఓడించినప్పుడు మాత్రం ఉన్నట్టుండి ఎన్నికల వ్యవస్థే చెడ్డదైపోయిందా?” అని సత్యకుమార్ నిలదీశారు.
బెయిల్ నిబంధనల ఉల్లంఘనను సమర్థిస్తారా? – గత పాలనపై విమర్శలు:
ఢిల్లీలో న్యాయవ్యవస్థను ధిక్కరించి, బెయిల్ షరతులను ఉల్లంఘించిన వ్యక్తులను పోలీసులు అదుపులోకి తీసుకుంటే.. దాన్ని జగన్ ఖండించడం హాస్యాస్పదంగా ఉందని మంత్రి వ్యాఖ్యానించారు.
గత ఐదేళ్ల మీ ప్రభుత్వ పాలనలో ఏం జరిగిందో ఒక్కసారి గుర్తుచేసుకోండి. కేవలం సోషల్ మీడియాలో పోస్టులు పెట్టినందుకే, మీ ప్రభుత్వ తప్పులను ఎత్తిచూపినందుకే ఎంతమంది సాధారణ పౌరులను, ప్రతిపక్ష నేతలను అక్రమంగా జైళ్లలో పెట్టించారు? అలా మీ హయాంలో అన్యాయంగా బాధితులైన వారి పెద్ద లిస్ట్‌ను నన్ను సిద్ధం చేసి బయటపెట్టమంటారా? అని హెచ్చరించారు.
జాతీయ రాజకీయాల్లో మొదలైన ట్విట్టర్ వార్..
కేంద్ర ఎన్నికల సంఘం వైఖరిని నిరసిస్తూ ఢిల్లీలో జరిగిన కాక్రోచ్ జనతా పార్టీ నిరసనలకు ప్రాంతీయ పార్టీల నేతలు మద్దతు తెలుపుతున్న సమయంలో.. జగన్ నేరుగా కేంద్ర ప్రభుత్వాన్ని, ఎన్నికల ప్రక్రియను టార్గెట్ చేయడం బీజేపీ శ్రేణులకు ఆగ్రహం తెప్పించింది. జగన్ గతాన్ని గుర్తుచేస్తూ మంత్రి సత్యకుమార్ ఇచ్చిన ఈ స్ట్రాంగ్ రిటార్ట్ ఇప్పుడు తెలుగు రాష్ట్రాల పొలిటికల్ సర్కిల్స్‌లో వైరల్‌గా మారింది.