Vallabhaneni Vamsi: గన్నవరం మాజీ ఎమ్మెల్యే, వైఎస్సార్‌సీపీ నేత వల్లభనేని వంశీ ఎట్టకేలకు జైలు నుంచి విడుదలయ్యారు. వివిధ కేసుల్లో దాదాపు 137 రోజులుగా జైలులో ఉన్న వంశీకి నూజివీడు కోర్టు బెయిల్ మంజూరు చేయడంతో ఈరోజు (బుధవారం) విజయవాడ జైలు నుంచి బయటకు వచ్చారు.
కేసుల వివరాలు:
2019 ఎన్నికల సమయంలో గన్నవరం నియోజకవర్గంలో ఓటర్లను ప్రలోభపెట్టేందుకు నకిలీ ఇళ్ల పట్టాలు పంపిణీ చేశారన్న ఆరోపణలు వంశీపై ఉన్నాయి. ఈ కేసులో 2019 అక్టోబర్ 18న హనుమాన్ జంక్షన్ పోలీస్ స్టేషన్‌లో వంశీతో పాటు మరో 9 మందిపై ఎఫ్ఐఆర్ నమోదైంది. ఈ కేసుతో పాటు భూకబ్జా, గన్నవరంలో టీడీపీ కార్యాలయంపై దాడి, సత్యవర్థన్ కిడ్నాప్ కేసులతో సహా ఆయనపై నమోదైన అన్ని కేసుల్లో బెయిల్ లభించడంతో వంశీ విడుదలయ్యారు.
Also Read: Bonda uma: దిక్కుతోచని స్థితిలో వైసీపీ ఉంది
సుప్రీంకోర్టు తీర్పు:
నకిలీ ఇళ్ల పట్టాల కేసులో వంశీకి కింద కోర్టు మంజూరు చేసిన బెయిల్‌ను రద్దు చేయాలని సీతామహాలక్ష్మి సుప్రీంకోర్టును ఆశ్రయించారు. ఈ పిటిషన్‌పై విచారణ చేపట్టిన సుప్రీంకోర్టు ధర్మాసనం, వంశీకి కిందికోర్టు ఇచ్చిన ముందస్తు బెయిల్‌ను రద్దు చేయడానికి నిరాకరించింది. ఈ సందర్భంగా సివిల్ స్వభావం ఉన్న వివాదాన్ని క్రిమినల్ కేసుగా ఎలా పరిగణిస్తారని న్యాయస్థానం ప్రశ్నించింది.
అయితే, వంశీపై ఉన్న అక్రమ మైనింగ్ కేసుకు సంబంధించిన దర్యాప్తు నివేదికను సీల్డ్ కవర్‌లో తమకు సమర్పించాలని ఆంధ్రప్రదేశ్ ప్రభుత్వాన్ని సుప్రీంకోర్టు ఆదేశించింది. ఈ కేసుపై తదుపరి విచారణను ఈ నెల 17వ తేదీకి వాయిదా వేస్తున్నట్లు సుప్రీంకోర్టు ప్రకటించింది. న్యాయస్థానం విధించిన షరతులతో వంశీ న్యాయవాదులు అవసరమైన పత్రాలు, సొమ్మును జైలు సూపరింటెండెంట్‌కు సమర్పించిన తర్వాత వంశీని విడుదల చేశారు.