Author: MAHAA News Desk

Pawan Kalyan: గచ్చిబౌలిలో పవన్ కళ్యాణ్ నిర్వహించాలనుకున్న ‘తెలంగాణ నవ నిర్మాణ సంకల్ప సభ’కు పోలీసులు అనుమతి నిరాకరించగా, జనసేన హైకోర్టును ఆశ్రయించింది. అయితే, హైకోర్టు సైతం హౌస్ మోషన్ పిటిషన్‌ను తిరస్కరించడంతో సభ రద్దయింది. ఈ నేపథ్యంలో ఇవాళ సాయంత్రం జూబ్లీహిల్స్‌లోని తన నివాసం నుంచే పవన్ కళ్యాణ్ ప్రెస్ మీట్ పెట్టి మాట్లాడనున్నారు.

KTR: తెలంగాణ 12వ ఆవిర్భావ దినోత్సవం వేళ కాంగ్రెస్ ప్రభుత్వంపై కేటీఆర్ ఘాటు విమర్శలు చేశారు. పుష్కర తెలంగాణ ముష్కరుల పాలైందని, శాంతిభద్రతలు క్షీణించి హత్యలు, దోపిడీలు ఎక్కువయ్యాయని ఆరోపించారు. కేసీఆర్ ఒక ‘లివింగ్ లెజెండ్’ అని, ఫ్లోరైడ్ బాధలు తీర్చి, 24 గంటల కరెంట్ ఇచ్చి, తలసరి ఆదాయంలో రాష్ట్రాన్ని నెం.1 చేశారని గుర్తుచేశారు. ఆరు నెలల్లో పీఆర్సీ ఇస్తామన్న హామీ ఏమైందని ప్రశ్నిస్తూ.. “కాంగ్రెస్ పోవాలి – కేసీఆర్ రావాలి” అని జనం కోరుకుంటున్నారని కేటీఆర్ పేర్కొన్నారు.

Pawan Kalyan: తెలంగాణ 12వ అవతరణ దినోత్సవం సందర్భంగా పవన్ కళ్యాణ్ శుభాకాంక్షలు తెలిపారు. జనసేన ఊపిరి పోసుకున్నది తెలంగాణ గడ్డపైనేనని, ఇక్కడి పోరాట పటిమ, తెగువ జనసేన శ్రేణుల్లోనూ ఉన్నాయని పేర్కొన్నారు. అమరుల త్యాగాలను స్మరిస్తూ, అభివృద్ధి ఫలాలు గిరిజన తండాలు, వెనుకబడిన వర్గాల వరకు చేరాలని ఆకాంక్షించారు. కాగా, నేడు సాయంత్రం 4:30 గంటలకు జూబ్లీహిల్స్ నివాసంలో పవన్ మీడియా సమావేశం నిర్వహించనున్నారు.

Revanth Reddy:  తెలంగాణ ఆవిర్భావ వేడుకల్లో సీఎం రేవంత్ రెడ్డి మాట్లాడుతూ.. తమది రాచరిక ఆలోచనలను ఓడించిన ప్రజా ప్రభుత్వమని పేర్కొన్నారు. సంక్షేమానికి రూ.1.56 లక్షల కోట్లు కేటాయించామని, 25 లక్షల కుటుంబాలకు రుణమాఫీ చేశామని చెప్పారు. కోటి మంది మహిళలను కోటీశ్వరులను చేసేందుకు రూ.లక్ష కోట్ల రుణాలు ఇస్తామని, ఇప్పటికే రూ.60 వేల కోట్ల సున్నా వడ్డీ రుణాలు ఇచ్చామని ప్రకటించారు. అలాగే నిరుద్యోగుల కోసం పారదర్శకంగా ఉద్యోగాల భర్తీ, ప్రాణహిత-చేవెళ్ల ప్రాజెక్టు పునర్నిర్మాణం చేపడతామని స్పష్టం చేశారు.