CM Chandrababu: ఆంధ్రప్రదేశ్ రాష్ట్రం పర్యావరణ పరిరక్షణకు గొప్ప ప్రారంభాన్ని చేసింది. ప్రపంచ పర్యావరణ దినోత్సవం సందర్భంగా రాష్ట్రవ్యాప్తంగా ఒక్క రోజులో కోటి మొక్కలు నాటే కార్యక్రమాన్ని ముఖ్యమంత్రి నారా చంద్రబాబు నాయుడు ప్రారంభించారు. అమరావతిలోని అనంతవరం వద్ద జరిగిన వనమహోత్సవం కార్యక్రమంలో ఆయన పాల్గొన్నారు. ఉప ముఖ్యమంత్రి పవన్ కళ్యాణ్, మంత్రి నారాయణతో కలిసి మొక్కలు నాటారు. ఈ ఏడాదికి ఐదు కోట్ల మొక్కలు నాటే లక్ష్యాన్ని ప్రభుత్వం పెట్టుకుంది. నాలుగేళ్లలో రాష్ట్రంలో పచ్చదనాన్ని 37 శాతానికి పెంచాలన్నదే సీఎం చంద్రబాబు ధ్యేయం. ఆయన మాట్లాడుతూ, “గత ప్రభుత్వానికి చెట్ల విలువ తెలియదు. మొక్కలు నాటడం కంటే నరకడమే చేశారు. కొన్ని దేశాల్లో చెట్టు నరికితే జైలు శిక్ష కూడా ఉంటుంది. చెట్లు లేని జీవితం ఊహించదగినది కాదు,” అని ఆగ్రహం వ్యక్తం చేశారు.
పరిస్థితులు చూస్తే, గ్లోబల్ వార్మింగ్ వల్ల వాతావరణంలో తీవ్రమైన మార్పులు వస్తున్నాయని సీఎం చంద్రబాబు చెప్పారు. “స్వర్ణాంధ్రం” అంటే కేవలం ఆదాయం కాదు, ఆరోగ్యం, పర్యావరణ పరిరక్షణ కూడా ముఖ్యమని ఆయన తెలిపారు. ప్లాస్టిక్ వినియోగం తగ్గించాల్సిన అవసరం ఉందని, ఇది మనుషులతో పాటు జంతువులకు కూడా ప్రమాదకరమని అన్నారు. చెత్తను ఉపయోగించి విద్యుత్ ఉత్పత్తి చేసే కార్యక్రమాలు ఇప్పటికే ప్రారంభమయ్యాయని, ‘వెస్ట్ టు ఎనర్జీ’ ప్లాంట్లు వచ్చే మూడేళ్లలో ఏర్పాటు అవుతాయని ప్రకటించారు. ముఖ్యమంత్రి ఇంటింటా పచ్చదనం పెంచే కార్యక్రమానికి పిలుపునిచ్చారు. ప్రతీ కుటుంబం ఓ రూఫ్‌టాప్ గార్డెన్ లేదా కిచెన్ గార్డెన్ ఏర్పాటు చేసుకోవాలని సూచించారు. రాయలసీమలో హార్టికల్చర్ అభివృద్ధి చెందుతోందని, ఇది రాష్ట్రమంతటా గ్రీన్ కవర్ పెరగడానికి దోహదపడుతోందని వివరించారు.
Also Read: Pawan On Yuvagalam: ఆనాటి నుండి మొదలైన పవన్-లోకేష్‌ల మైత్రి..
CM Chandrababu: ఉప ముఖ్యమంత్రి పవన్ కళ్యాణ్ మాట్లాడుతూ, “చెట్టు లేని జీవితం అసంభవం. పర్యావరణ పరిరక్షణ కోసం ప్రతి ఒక్కరూ తమ వంతు పాత్ర పోషించాలి,” అని చెప్పారు. గతంలో ఇంటి చిరునామాగా చెట్లు ఉండేవని గుర్తు చేశారు. పర్యావరణాన్ని ప్రేమించే వ్యక్తి మనకు ముఖ్యమంత్రిగా ఉండటం గర్వకారణమన్నారు. 50 శాతం పచ్చదన లక్ష్యాన్ని సాధించేందుకు చిత్తశుద్ధితో కృషి చేస్తామన్నారు. రాబోయే రోజుల్లో రాఖీ పండుగను సరికొత్తగా జరుపుకుంటామని సీఎం చంద్రబాబు తెలిపారు. చెల్లెమ్మలకు రాఖీలతో పాటు విత్తనాలు ఇవ్వాలని నిర్ణయించారు. ఇది చెట్ల పెంపకానికి ఉపయోగపడుతుందని ఆశాభావం వ్యక్తం చేశారు.
ఆంధ్రప్రదేశ్‌లో వచ్చే ఏడాదికి పూర్తిగా ప్లాస్టిక్ వినియోగాన్ని నిషేధించాలన్నది ప్రభుత్వ లక్ష్యం. 175 నియోజకవర్గాల్లో నగర వనాలు ఏర్పాటు చేయనున్నట్టు ముఖ్యమంత్రి వెల్లడించారు. ప్లాస్టిక్‌కు ప్రత్యామ్నాయంగా పర్యావరణ హితం కలిగిన పదార్థాలను వినియోగంలోకి తేనున్నారు. ఆంధ్రప్రదేశ్ పర్యావరణ పరిరక్షణలో దేశానికి ఆదర్శంగా నిలవాలని సీఎం చంద్రబాబు ఆకాంక్షిస్తున్నారు. మొక్కలు నాటడం, ప్లాస్టిక్ నిషేధం, చెత్త నుంచి విద్యుత్ ఉత్పత్తి వంటి కార్యక్రమాల ద్వారా రాష్ట్రాన్ని పచ్చదనంతో నింపాలన్నదే ప్రభుత్వ ఆలోచన.