CM Chandrababu: ఆంధ్రప్రదేశ్ రాష్ట్రానికి పారిశ్రామిక కళ తెచ్చేందుకు ముఖ్యమంత్రి నారా చంద్రబాబు నాయుడు నడుం బిగించారు. అంతర్జాతీయ పెట్టుబడుల వేటలో భాగంగా ఆయన ఆదివారం రాత్రి స్విట్జర్లాండ్లోని దావోస్ నగరానికి బయలుదేరుతున్నారు. ప్రపంచ ఆర్థిక వేదిక (వరల్డ్ ఎకనామిక్ ఫోరం) వార్షిక సదస్సులో పాల్గొని, ప్రపంచ దేశాల దృష్టిని ఏపీ వైపు తిప్పడమే ఈ పర్యటన ప్రధాన ఉద్దేశ్యం. దాదాపు నాలుగు రోజుల పాటు సాగనున్న ఈ పర్యటనలో ముఖ్యమంత్రి ఏకంగా 36 కార్యక్రమాల్లో పాల్గొంటూ అత్యంత బిజీగా గడపనున్నారు.
ఈ భారీ పర్యటనలో భాగంగా ముఖ్యమంత్రి ప్రపంచ ప్రఖ్యాత ఐటీ, టెక్నాలజీ దిగ్గజాలతో ముఖాముఖి భేటీ కానున్నారు. ఐబీఎం సీఈఓ అరవింద్ కృష్ణ, గూగుల్ క్లౌడ్ సీఈఓ థామస్ కురియన్ వంటి ప్రముఖులతో ఆయన చర్చలు జరపనున్నారు. రాష్ట్రంలో కృత్రిమ మేధస్సు (AI), క్లౌడ్ కంప్యూటింగ్ వంటి అధునాతన సాంకేతిక రంగాలలో పెట్టుబడులను తీసుకురావడమే లక్ష్యంగా ఈ చర్చలు సాగనున్నాయి. అలాగే టాటా సన్స్ ఛైర్మన్ ఎన్. చంద్రశేఖరన్, జేఎస్డబ్ల్యూ గ్రూప్ ఛైర్మన్ సజ్జన్ జిందాల్తో కూడా సీఎం సమావేశం కానున్నారు.
Also Read: IND vs NZ 3rd ODI: నేడు ఇండోర్ వేదికగా భారత్–న్యూజిలాండ్ మూడో వన్డే..
పర్యటన ఆరంభంలో జ్యూరిచ్ చేరుకోనున్న చంద్రబాబు, అక్కడ దాదాపు 20 దేశాల నుంచి వచ్చే ప్రవాస తెలుగు వారితో సమావేశమవుతారు. ఆంధ్రప్రదేశ్ అభివృద్ధిలో ఎన్నార్టీల పాత్రను వివరిస్తూ వారిని భాగస్వాములను చేసేలా ఆయన ప్రసంగిస్తారు. అనంతరం దావోస్ చేరుకుని యూఏఈ, స్విట్జర్లాండ్, ఇజ్రాయెల్ వంటి దేశాల ఆర్థిక మంత్రులతో భేటీ అవుతారు. రాష్ట్రంలో పోర్టులు, మౌలిక సదుపాయాల కల్పన కోసం అంతర్జాతీయ కంటైనర్ లాజిస్టిక్స్ దిగ్గజం ‘ఏపీ మోలర్-మేర్స్క్’ ప్రతినిధులతో కూడా కీలక చర్చలు జరపనున్నారు.
ఈ పర్యటనలో ముఖ్యమంత్రి వెంట ఐటీ శాఖ మంత్రి నారా లోకేశ్, ఇతర ఉన్నతాధికారుల బృందం ఉంటారు. రాష్ట్రంలో నిరుద్యోగ యువతకు పెద్ద ఎత్తున ఉపాధి కల్పించడమే ధ్యేయంగా వారు కృషి చేయనున్నారు. ఇందుకోసం ‘ఏపీ లాంజ్’ పేరుతో ప్రత్యేక వేదికను ఏర్పాటు చేసి, రాష్ట్రంలోని పారిశ్రామిక అనుకూలతలను ప్రపంచానికి చాటిచెప్పనున్నారు. ఈ నెల 23న పర్యటన ముగించుకుని ముఖ్యమంత్రి తిరిగి అమరావతికి చేరుకుంటారు. ఈ పర్యటన ద్వారా రాష్ట్రానికి వేల కోట్ల రూపాయల పెట్టుబడులు, అనేక కొత్త కంపెనీలు వచ్చే అవకాశం ఉందని ప్రభుత్వం ధీమా వ్యక్తం చేస్తోంది.