Anupama Parameswaran: సౌత్ ఇండస్ట్రీ లో తనకంటూ ఒక్క ప్రత్యేకమైన గుర్తింపు తెచ్చుకున్న అనుపమ పరమేశ్వరన్ తన వ్యక్తిగత జీవితం, గత రిలేషన్షిప్లో ఎదుర్కొన్న తీవ్ర మానసిక క్షోభపై చేసిన వ్యాఖ్యలు సినీ వర్గాల్లో పెను సంచలనం సృష్టిస్తున్నాయి. ఒక ఇంటర్వ్యూలో మాట్లాడిన ఆమె, గత రెండేళ్ల పాటు మాజీ ప్రియుడి చేతిలో అనుభవించిన చేదు జ్ఞాపకాలను, నార్సిసిస్టిక్ వేధింపులను పంచుకున్నారు. తనకు జరిగిన అవమానాలను ఏమాత్రం దాచుకోకుండా ధైర్యంగా బయటపెట్టిన అనుపమ మాటలు నెటిజన్లను, అభిమానులను తీవ్ర దిగ్భ్రాంతికి గురిచేస్తున్నాయి.
పీరియడ్స్ విషయంలోనూ ఎగతాళి చేశాడు.. పిల్లలే వద్దు అనే స్థితికి తీసుకొచ్చాడు
తన ఆత్మగౌరవాన్ని దెబ్బతీసేలా మాజీ ప్రియుడు ఎలా ప్రవర్తించేవాడో అనుపమ కన్నీటిపర్యంతమవుతూ వివరించారు..
-
పీరియడ్స్ వస్తే అవమానం: అతని ప్రవర్తనను ప్రశ్నించినా, తప్పులను నిలదీసినా.. ‘నీకు పీరియడ్స్ టైమా? ఇంకా రాలేదా? మూడ్ స్వింగ్స్ కదా? అంటూ అందరి ముందూ నన్ను ఎగతాళి చేసి మాట్లాడేవాడు. ఆ మాటలతో నేను ఒక మహిళగా పుట్టినందుకు, రుతుక్రమం(నెలసరి)వస్తున్నందుకు నాపై నాకే సిగ్గుపడేలా చేశాడు.
-
కలలు కల్లలయ్యాయి: ఒకప్పుడు భవిష్యత్తులో నాకు 11 మంది పిల్లలు ఉండాలని ఎంతో ఆశగా కలలు కనేదాన్ని. కానీ అతను నన్ను పెట్టిన మానసిక క్షోభతో ఇప్పుడు ‘అసలు పిల్లలే వద్దు’ అనే స్థితికి చేరుకున్నాను. స్త్రీగా పుట్టినందుకు ఇంతటి మాటలు పడాల్సి వచ్చిందని తీవ్రంగా కుంగిపోయాను.
షూటింగ్ల సమయంలో కేరవాన్లో ఏడ్చేదాన్ని
విషపూరితమైన ఆ బంధం తన కెరీర్ను, మానసిక ఆరోగ్యాన్ని ఎలా ప్రభావితం చేసిందో ఆమె గుర్తుచేసుకున్నారు..
-
నార్సిసిస్టిక్ అబ్యూజ్: ఒకరోజు ఎంతో ప్రేమగా ఉంటూ, మరోరోజు తీవ్రమైన శాడిజం చూపించేవాడు. ఇలా చేయనని మాటిచ్చి మళ్లీ అదే విధంగా ప్రవర్తించేవాడు. చివరకు సొంత తమ్ముడితో చనువుగా ఉండాలన్నా భయపడే పరిస్థితి ఏర్పడింది. ఒకవేళ అతనితో ఎంగేజ్మెంట్ అయి, పెళ్లై ఉంటే కచ్చితంగా విడాకులు తీసుకునేదాన్ని.
-
తీవ్ర డిప్రెషన్: రిలేషన్షిప్ వల్ల తీవ్ర డిప్రెషన్లోకి వెళ్లిపోయానని, షూటింగ్ సమయంలో గుండెల్లో బాధను తట్టుకోలేక కేరవాన్లో ఒంటరిగా కూర్చుని ఏడ్చిన సందర్భాలు ఎన్నో ఉన్నాయని పేర్కొన్నారు.
అనుపమ ఈ ఇంటర్వ్యూలో ఎక్కడా నేరుగా ఎవరి పేరును ప్రస్తావించనప్పటికీ, గతంలో తమిళ నటుడు ధ్రువ్ విక్రమ్తో వచ్చిన డేటింగ్, బ్రేకప్ రూమర్ల నేపథ్యంలో ఆమె చేసిన వ్యాఖ్యలు ప్రస్తుతం నెట్టింట హాట్ టాపిక్గా మారాయి. మహిళలు ఎదుర్కొనే టాక్సిక్ రిలేషన్షిప్స్, మానసిక వేధింపులపై మాట్లాడిన అనుపమ ధైర్యాన్ని పలువురు ప్రశంసిస్తున్నారు.