Chiranjeevi: మెగాస్టార్ చిరంజీవి హీరోగా, దర్శకుడు అనిల్ రావిపూడి రూపొందిస్తున్న కొత్త చిత్రం షూటింగ్ శరవేగంగా సాగుతోంది. ఈ పూర్తి స్థాయి కామెడీ ఎంటర్‌టైనర్‌లో నయనతార కీలక పాత్రలో కనిపించనుంది. ప్రస్తుతం చిరంజీవి, నయనతారల మధ్య ఫ్యామిలీ సన్నివేశాలను చిత్రీకరిస్తున్నారు. ఈ సన్నివేశాల్లో వీరిద్దరి మధ్య కామెడీ ఎపిసోడ్ చిత్రంలో హైలైట్‌గా నిలవనుందని సమాచారం.
చిరంజీవి ఈ చిత్రం గురించి మాట్లాడుతూ, కథ తనను ఎంతగానో ఆకట్టుకుందని, అనిల్ రావిపూడి వివరించిన సన్నివేశాలు వినగానే నవ్వు ఆపుకోలేకపోయానని తెలిపారు. అభిమానులకు ఈ సినిమా తప్పకుండా నచ్చుతుందని ఆయన ధీమా వ్యక్తం చేశారు. ఈ చిత్రాన్ని సాహు గారపాటి, చిరంజీవి కుమార్తె సుస్మిత సంయుక్తంగా నిర్మిస్తున్నారు.
అయితే, ఈ సినిమాలో చిరంజీవి డబుల్ రోల్‌లో నటిస్తున్నారనే వార్తలు వినిపిస్తున్నాయి. ఈ విషయంలో ఎంత నిజం ఉందనేది తెరపై చూడాల్సిందే. మొత్తంగా, ఈ చిత్రం అభిమానులకు వినోద భరితమైన అనుభవాన్ని అందించనుందని అంచనాలు నెలకొన్నాయి.