AP Cabinet Meeting: ఆంధ్రప్రదేశ్ రాష్ట్ర ప్రభుత్వం కీలక నిర్ణయాల కోసం ఈ నెల 20వ తేదీన మంత్రివర్గ సమావేశాన్ని ఏర్పాటు చేయనుంది. ముఖ్యమంత్రి చంద్రబాబు నాయుడు నేతృత్వంలో అమరావతిలో జరగబోయే ఈ సమావేశం, కూటమి ప్రభుత్వానికి ఏడాది పూర్తవుతున్న సందర్భంగా మరింత ప్రాధాన్యత సంతరించుకుంది.
ఈ సమావేశంలో ప్రభుత్వ పాలనకు సంబంధించి సాధించిన విజయాలు, అమలవుతున్న సంక్షేమ పథకాలు, తలపెట్టిన అభివృద్ధి కార్యక్రమాలపై సమీక్ష జరిపే అవకాశం ఉంది. ప్రజల్లోకి పాలనను ఎంత విస్తృతంగా, సమర్థవంతంగా తీసుకెళ్లాలన్నదానిపై చర్చకు ఆస్కారం ఉంది.
అమరావతిలో నిర్మాణాలకు ఊపు
అమరావతి రాజధాని అభివృద్ధిపై ముఖ్యంగా ఈ సమావేశంలో చర్చించనున్నారు. నిర్మాణ పనులకు కొత్త ఊపునివ్వడానికి అవసరమైన ఆర్థిక, పరిపాలనా నిర్ణయాలు తీసుకునే అవకాశముంది. పారిశ్రామిక ప్రోత్సాహక ప్యాకేజీలతో పాటు, ఉద్యోగావకాశాల కల్పనపై కూడా దృష్టిసారించనున్నారు.
ఇది కూడా చదవండి: Virat Kohli Retirement: విరాట్ కోహ్లీ రిటైర్మెంట్‌.. స్పందించిన తెలుగు రాష్ట్రాల సీఎంలు!
సంక్షేమం పై కఠినంగా ముందుకు
ఉచిత ఆర్టీసీ ప్రయాణం వంటి ప్రజాసంక్షేమ పథకాల అమలుపై సమీక్ష జరిగే సూచనలు ఉన్నాయి. ఇప్పటికే దీనికి సంబంధించిన నివేదికలు సిద్ధమయ్యాయని సమాచారం. అదేవిధంగా రైతులకు వర్షాకాలం నాటికి అవసరమైన విత్తనాలు, ఎరువుల సరఫరా విషయాలను కూడా సమావేశంలో చర్చించనున్నారు.
చర్చకు సిద్ధంగా ఉన్న అంశాలు
ఈ నెల 16వ తేదీ సాయంత్రం 4 గంటల లోపు కేబినెట్ సమావేశంలో చర్చించాల్సిన ప్రతిపాదనలను ప్రభుత్వ ప్రధాన కార్యదర్శి విజయానంద్‌కు అందజేయాలని అధికార యంత్రాంగానికి ఆదేశాలు జారీ అయ్యాయి. ఈ ప్రతిపాదనలను సాధారణ పరిపాలన శాఖకు పంపించి, వాటిపై పూర్తిస్థాయి చర్చ జరిగేలా చర్యలు తీసుకుంటున్నారు.