AP News: ప్రకాశం జిల్లా కొనకనమిట్ల మండలంలో శనివారం తెల్లవారుజామున ఒక విషాదకర ఘటన చోటుచేసుకుంది. చిన్నారికట్ల గ్రామ సమీపంలో రెండు బస్సులు ఒకదానికొకటి బలంగా ఢీకొన్నాయి. ఈ ప్రమాదంలో ఒక వ్యక్తి ప్రాణాలు కోల్పోగా, సుమారు 12 మంది ప్రయాణికులు తీవ్రంగా గాయపడ్డారు.
ప్రమాద వివరాల్లోకి వెళితే.. వేంపల్లి నుంచి విజయవాడకు వెళ్తున్న ఒక ప్రైవేట్ ట్రావెల్ బస్సు రోడ్డు పక్కన ఆగి ఉన్న ఆటోను ఢీకొట్టింది. సరిగ్గా అదే సమయంలో విజయవాడ నుంచి కనిగిరి వైపు వస్తున్న మరో బస్సు అదుపుతప్పి, ముందున్న ప్రైవేట్ బస్సును వెనుక నుంచి బలంగా ఢీకొట్టింది. ఈ రెండు బస్సుల మధ్య జరిగిన సంఘర్షణలో వాహనాలు బాగా దెబ్బతిన్నాయి.
ఈ దుర్ఘటనలో కడప జిల్లా మైదుకూరు మండలం చిన్నయ్య గారిపల్లికి చెందిన అన్నపురెడ్డి జనార్దన్ రెడ్డి (50) అక్కడికక్కడే మరణించారు. రెండు బస్సుల్లో ప్రయాణిస్తున్న మరో 12 మందికి గాయాలయ్యాయి. స్థానికుల సమాచారంతో పోలీసులు వెంటనే అక్కడికి చేరుకుని, గాయపడిన వారిని చికిత్స కోసం కనిగిరి ప్రభుత్వ ఆసుపత్రికి తరలించారు.
సంఘటనా స్థలాన్ని ఎస్ఐ శ్రీకాంత్ పరిశీలించారు. అతివేగం లేదా అజాగ్రత్త వల్ల ఈ ప్రమాదం జరిగి ఉండవచ్చని భావిస్తున్నారు. పోలీసులు కేసు నమోదు చేసి, ప్రమాదానికి గల పూర్తి కారణాలపై దర్యాప్తు చేస్తున్నారు.