AP News: సంక్రాంతి అంటేనే ఆనందాల హరివిల్లు. కొత్త బట్టలు, పిండి వంటలు, గాలిపటాల సందడితో ఊరంతా కళకళలాడుతుంటుంది. కానీ, అదే గాలిపటం ఒక కుటుంబంలో తీరని విషాదాన్ని నింపింది. గాలిపటం ఎగరేస్తూ విద్యుత్ తీగల రూపంలో పొంచి ఉన్న మృత్యువును గమనించని ఒక ఐదేళ్ల చిన్నారి, కరెంట్ షాక్తో అక్కడికక్కడే ప్రాణాలు కోల్పోయాడు. అన్నమయ్య జిల్లా గాలివీడు మండలంలో జరిగిన ఈ ఘటన స్థానికులను కన్నీరు ముంచెత్తింది.
వివరాల్లోకి వెళ్తే.. రాయచోటి నియోజకవర్గంలోని బుచ్చవాండ్లపల్లికి చెందిన ఐదేళ్ల ఆనంద శ్రీనివాస్, సంక్రాంతి సెలవుల కోసం అమ్మమ్మ ఇంటికి వచ్చాడు. పండుగ సరదాలో భాగంగా ఇంటిపై నిలబడి గాలిపటం ఎగరేస్తున్నాడు. ఆ ఆనందంలో పైన ప్రమాదకరంగా వేలాడుతున్న విద్యుత్ తీగలను ఆ చిన్నారి గమనించలేదు. గాలిపటం దారం లేదా చిన్నారి చేతులు ఆ తీగలకు తగలడంతో విద్యుత్ ఘాతానికి గురై ఆ చిన్న ప్రాణం గాలిలోనే కలిసిపోయింది. పండుగ పూట ఇల్లంతా నవ్వులతో నింపాల్సిన బాబు, ఇలా విగతజీవిగా మారడంతో ఆ కుటుంబ సభ్యుల రోదనలు మిన్నంటాయి.
ఈ ఘటన మనందరికీ ఒక హెచ్చరిక. ముఖ్యంగా పండుగ సమయంలో పిల్లలు గాలిపటాలు ఎగరేసేటప్పుడు పెద్దలు పక్కనే ఉండటం చాలా ముఖ్యం. ఇంటి పైకప్పుల మీద లేదా రోడ్ల మీద విద్యుత్ తీగలు ఎక్కడ ఉన్నాయో గమనించాలి. విద్యుత్ లైన్లకు దగ్గరగా గాలిపటాలు ఎగరేయడం అత్యంత ప్రమాదకరం. అలాగే, గాలిపటాలకు వాడే దారం విషయంలో కూడా జాగ్రత్త వహించాలి. ప్రాణాలు తీసే ‘చైనా మాంజా’కు దూరంగా ఉండి, కేవలం సాధారణ దారాలను మాత్రమే వాడాలి.
పండుగ పూట ఆనందం విషాదంగా మారకుండా ఉండాలంటే మన అప్రమత్తతే ముఖ్యం. పిల్లల ఆటల మీద కన్నేసి ఉంచండి. ప్రమాదకరమైన ప్రదేశాల్లో గాలిపటాలు ఎగరేయనివ్వకండి. ఒక్క క్షణం నిర్లక్ష్యం ఒక నిండు ప్రాణాన్ని బలి తీసుకుంటుందని మర్చిపోవద్దు. ఈ సంక్రాంతి ప్రతి ఇంట్లో సురక్షితమైన ఆనందాన్ని నింపాలని కోరుకుందాం.