Revanth Reddy: తెలంగాణలో గ్రామ పంచాయతీ ఎన్నికల సందడి జోరుగా సాగుతున్న తరుణంలో, ముఖ్యమంత్రి రేవంత్ రెడ్డి స్వగ్రామమైన కొండారెడ్డిపల్లెలో ఒక ఆసక్తికరమైన పరిణామం చోటు చేసుకుంది. ఆ గ్రామంలో సర్పంచ్ పదవి ఏకగ్రీవం అయింది! నిజానికి, ఈ పదవి ఎస్సీకి రిజర్వ్ చేయబడింది. ఈ పదవి కోసం ఏకంగా 15 మంది పోటీ పడడానికి సిద్ధమయ్యారు. కానీ, చివరికి గ్రామ పెద్దలు మరియు నాయకులు అందరూ కలిసి చర్చించుకుని, గ్రామాభివృద్ధి కోసం ఏకగ్రీవ నిర్ణయాన్ని తీసుకున్నారు.
ఈ ఏకగ్రీవ నిర్ణయంలో ఒక ప్రత్యేకత ఉంది. పోటీలో ఉన్న 15 మందిలో ఒకరి పేరును సీల్డ్ కవర్లో ఉంచారు. ఆ కవర్ను తెరిచి ఎవరి పేరును ప్రకటిస్తే, ఆ నిర్ణయాన్ని గ్రామం మొత్తం కలిసికట్టుగా గౌరవించాలనేది గ్రామ నాయకత్వం యొక్క ముఖ్య ఉద్దేశం. అందరి సహకారంతో ఏకగ్రీవంగా సర్పంచ్ను ఎన్నుకోవడం కొండారెడ్డిపల్లెలో ఐక్యతను చాటిచెబుతోంది.
Also Read: Gold Price Today: బంగారం ధరలు మళ్లీ రికార్డుల హోరు.. తెలుగు రాష్ట్రాల్లో నేటి రేట్లు ఇవే!
మరోవైపు, రాష్ట్రవ్యాప్తంగా జరుగుతున్న మొదటి విడత పంచాయతీ ఎన్నికల నామినేషన్ల ఘట్టం నేటితో ముగియనుంది. అధికారులు తెలిపిన వివరాల ప్రకారం.. ఉదయం 10.30 గంటల నుంచి సాయంత్రం 5 గంటల వరకు నామినేషన్లు స్వీకరించడం కొనసాగుతుంది. గురువారం నుంచి మొదలైన నామినేషన్ల ప్రక్రియలో ఇప్పటికే పెద్ద సంఖ్యలో నామపత్రాలు దాఖలయ్యాయి. నిన్న ఒక్కరోజే సర్పంచ్ పదవులకు 4,901 నామినేషన్లు దాఖలు కాగా, మొత్తం నామపత్రాల సంఖ్య 8,198కి చేరుకుంది. అదేవిధంగా, వార్డు సభ్యుల కోసం మొన్న, నిన్న కలిపి 11,502 నామినేషన్లు దాఖలయ్యాయి.
మొదటి దశలో మొత్తం 4,236 సర్పంచ్ పదవులకు, 37,440 వార్డులకు ఎన్నికలు జరగనున్నాయి. నామినేషన్లు ఉపసంహరించుకోవడానికి చివరి తేదీ డిసెంబర్ 3. ఇక, మొదటి దశ పోలింగ్ డిసెంబర్ 11న జరుగుతుంది. ఆ రోజు ఉదయం 7 గంటల నుంచి మధ్యాహ్నం 1 గంట వరకు ఓటింగ్ జరుగుతుంది. పోలింగ్ ముగిసిన వెంటనే, మధ్యాహ్నం 2 గంటల నుంచి ఓట్ల లెక్కింపు మొదలవుతుంది. దీంతో పల్లెల్లో ఎన్నికల వేడి తారాస్థాయికి చేరుకుంది.