Chandrababu Naidu: ఆంధ్రప్రదేశ్ రాజధాని అమరావతిలో బ్యాంకులు, ప్రభుత్వ రంగ సంస్థల ప్రధాన కార్యాలయాల నిర్మాణానికి కేంద్ర ఆర్థిక మంత్రి నిర్మలా సీతారామన్ శంకుస్థాపన చేసిన సందర్భంగా జరిగిన సభలో ముఖ్యమంత్రి చంద్రబాబు నాయుడు మాట్లాడారు. దేశం గర్వించేలా అమరావతి రూపుదిద్దుకోవడం ఖాయమని ఆయన ధీమా వ్యక్తం చేశారు. రాజధాని నిర్మాణానికి స్వచ్ఛందంగా భూములు ఇచ్చిన సుమారు 34 వేల ఎకరాల రైతులకు ఆయన మనస్ఫూర్తిగా ధన్యవాదాలు తెలిపారు. ప్రపంచంలోనే స్ఫూర్తిదాయకమైన ల్యాండ్పూలింగ్ విధానం జరిగిన ఏకైక ప్రాంతం అమరావతి అని సీఎం పేర్కొన్నారు.
అభివృద్ధి పనుల్లో వేగం, కేంద్రం సహకారం
ప్రధాని నరేంద్ర మోదీ రాజధాని పనులను పునఃప్రారంభం చేశారని, 2028 మార్చి నాటికి పనులు పూర్తయ్యేలా వేగంగా జరుగుతున్నాయని చంద్రబాబు తెలిపారు. ఈ వేగానికి ముఖ్య కారణం కేంద్ర ఆర్థిక మంత్రి నిర్మలా సీతారామన్ అని, ఆమె రాజధాని నిర్మాణానికి తమకంటే వేగంగా రూ.15 వేల కోట్ల నిధులు ఇచ్చారని కృతజ్ఞతలు తెలిపారు. తాజాగా, రూ.1,334 కోట్ల పెట్టుబడితో వివిధ బ్యాంకులు, బీమా సంస్థల భవనాలకు శంకుస్థాపన జరిగింది. ఒకేచోట అన్ని కార్యాలయాలు ఏర్పాటుచేయడం ముఖ్యమైన అంశమని, దీనివల్ల 6,576 మందికి కొత్తగా ఉపాధి అవకాశాలు లభిస్తాయని సీఎం వివరించారు.
జీఎస్టీ సంస్కరణలు, ఆర్థిక వ్యవస్థ పునరుద్ధరణ
నిర్మలా సీతారామన్ చాలా త్వరగా నిర్ణయాలు తీసుకుంటారని చంద్రబాబు ప్రశంసించారు. ఆమె చేపట్టిన జీఎస్టీ సంస్కరణలు దేశ ఆర్థిక వ్యవస్థకు గేమ్ఛేంజర్గా మారాయని, సూపర్ జీఎస్టీ సంస్కరణలతో ఆర్థిక వృద్ధి సాధనకు ఆమె ఎంతో కృషి చేశారని పేర్కొన్నారు. అమరావతి పనులు ఊపందుకున్న సమయంలోనే ప్రభుత్వం పడిపోవడం, వైకాపా ఐదేళ్ల పాలనలో రాష్ట్రంలో విధ్వంసం జరగడం దురదృష్టకరం అన్నారు. వెంటిలేటర్పై ఉన్న రాష్ట్ర ఆర్థిక వ్యవస్థను బయటకు తీసుకొచ్చిన ఘనత కేంద్ర ప్రభుత్వానికే దక్కుతుందని చంద్రబాబు అభిప్రాయపడ్డారు.
అమరావతి ఇక టెక్నాలజీ హబ్
రాష్ట్ర ఆర్థిక పరిస్థితి ఇంకా ఎంతో కోలుకోవాల్సి ఉందని, అందుకు అనుగుణంగా వివిధ రంగాల్లో పెట్టుబడులను ఆకర్షిస్తున్నట్లు సీఎం తెలిపారు. అమరావతిని ‘నెక్స్ట్ లెవెల్కు’ తీసుకెళ్లేందుకు అన్ని చర్యలు తీసుకుంటున్నామని, ఈ రాజధాని టెక్నాలజీని అందిపుచ్చుకునే హబ్గా తయారవుతుందని ఆయన స్పష్టం చేశారు. దేశాన్ని అగ్రస్థానంలో నిలబెట్టే ప్రక్రియలో ఆంధ్రప్రదేశ్ రాష్ట్రం కీలకపాత్ర పోషిస్తుందని, ఏడు జాతీయ రహదారులు అమరావతికి అనుసంధానమవుతాయని ముఖ్యమంత్రి చంద్రబాబు నాయుడు పేర్కొన్నారు.