Lalit Modi: ఐపీఎల్ మాజీ చైర్మన్ లలిత్ మోదీ ఇటీవల మీడియాలో పలు కీలక అంశాలపై స్పందిస్తూ వార్తల్లో నిలిచారు. అమెరికాలో క్రికెట్, తన న్యాయపరమైన సమస్యలు, పౌరసత్వ వివాదం వంటి విషయాలపై ఆయన చేసిన వ్యాఖ్యలు చర్చకు దారితీశాయి.
అమెరికాలో జరిగిన మేజర్ లీగ్ క్రికెట్ (MLC) ఆశించినంత విజయం సాధించకపోవడంపై లలిత్ మోదీ స్పందించారు. విరాట్ కోహ్లీ, ఎంఎస్ ధోనీ లాంటి స్టార్ ఆటగాళ్లు లేకపోతే క్రికెట్ నిలబడదని ఆయన అన్నారు. అంతర్జాతీయ స్థాయి స్టార్స్ లేకుండా ప్రేక్షకులను ఆకర్షించడం అసాధ్యమని, కేవలం ఒలింపిక్స్ ద్వారా అమెరికాలో క్రికెట్‌ను ప్రోత్సహించడం ఈ దశాబ్దంలో కాదు, కనీసం 50 ఏళ్లలో కూడా సాధ్యం కాదని ఆయన అభిప్రాయపడ్డారు.
లలిత్ మోదీకి ఇటీవల సుప్రీంకోర్టులో ఎదురుదెబ్బ తగిలింది. ఫెమా నిబంధనల ఉల్లంఘన కేసులో ఎన్‌ఫోర్స్‌మెంట్ డైరెక్టరేట్ (ఈడీ) విధించిన రూ.10.65 కోట్ల జరిమానాను బీసీసీఐ చెల్లించేలా ఆదేశించాలంటూ ఆయన దాఖలు చేసిన పిటిషన్‌ను సుప్రీంకోర్టు కొట్టివేసింది. దీంతో ఆ జరిమానా భారం లలిత్ మోదీపైనే పడింది.
Also Read: Haris Rauf: పాకిస్థాన్ బౌలర్ హారిస్ రౌఫ్ సంచలన వ్యాఖ్యలు
బ్రిటన్ తర్వాత వనువాటు అనే ద్వీప దేశ పౌరసత్వం తీసుకున్న లలిత్ మోదీకి ఇక్కడ కూడా సమస్యలు ఎదురయ్యాయి. వనువాటు ప్రధానమంత్రి జోతం నపట్ లలిత్ మోదీ పౌరసత్వాన్ని రద్దు చేయాలని ఆదేశించడంతో ఈ విషయంపై పెద్ద దుమారం రేగింది. దీనిపై ఆయన తరచుగా మీడియాలో తన అభిప్రాయాలను వెల్లడిస్తున్నారు.
ఇటీవల ఒక ఇంటర్వ్యూలో లలిత్ మోదీ చేసిన వ్యాఖ్యలు సోషల్ మీడియాలో వైరల్ అయ్యాయి. అమెరికా యూనివర్సిటీల్లో ప్రవేశం కోసం తన తరపున మరొకరు ఎస్ఏటీ (SAT) ఎంట్రన్స్ ఎగ్జామ్స్ రాశారని ఆయన వెల్లడించారు. ఈ విషయం కూడా తీవ్ర చర్చకు దారితీసింది.