Fire Accident: విశాఖపట్నం జిల్లాలోని ఆనందపురం మండలం గండిగుండం వద్ద ఉన్న ఒక గోడౌన్‌లో శుక్రవారం రాత్రి భారీ అగ్నిప్రమాదం సంభవించింది. ఈ ఘటనలో గోడౌన్‌లోని సామాగ్రి పూర్తిగా దగ్ధమైంది. శుక్రవారం రాత్రి 10:30 గంటల సమయంలో మంటలు చెలరేగినట్లు సమాచారం. గండిగుండం సమీపంలో ఉన్న జాతీయ రహదారికి పక్కన ఉన్న గోడౌన్‌లో ఈ ప్రమాదం జరిగింది. ఇది ఒక ప్లాస్టిక్ పైపుల తయారీ కంపెనీకి చెందినదని, లేదా ఆ తరహా వస్తువులను నిల్వ చేసే గోడౌన్ అని ప్రాథమికంగా తెలుస్తోంది.
ఇది కూడా చదవండి: Heavy Rains: కుండపోత వర్షాలు.. 54 మంది మృతి
మంటలు భారీగా ఎగిసిపడటంతో దట్టమైన పొగ కమ్ముకుంది. ప్లాస్టిక్ వంటి త్వరగా మండే పదార్థాలు ఉండటంతో మంటలు వేగంగా వ్యాపించాయి. సమాచారం అందుకున్న వెంటనే అగ్నిమాపక సిబ్బంది ఘటనా స్థలానికి చేరుకున్నారు. మంటలను అదుపులోకి తీసుకురావడానికి కనీసం ఆరు అగ్నిమాపక యంత్రాలు గంటల తరబడి శ్రమించాయి. గోడౌన్‌లోని వస్తువులు పూర్తిగా దగ్ధమై భారీగా ఆస్తి నష్టం సంభవించింది. అగ్నిప్రమాదానికి గల కారణాలు ఇంకా తెలియరాలేదు. అగ్నిమాపక అధికారులు, పోలీసులు కేసు నమోదు చేసి దర్యాప్తు చేస్తున్నారు.