YS SHARMILA:ఆంధ్రప్రదేశ్ కాంగ్రెస్ కమిటీ అధ్యక్షురాలు వైఎస్ షర్మిల మంగళవారం నెల్లూరు జిల్లాలో పర్యటించారు. ఈ సందర్భంగా ఆమె తన సోదరుడు, వైఎస్సార్ కాంగ్రెస్ పార్టీ అధినేత జగన్‌మోహన్ రెడ్డిపై తీవ్రమైన విమర్శలు చేశారు. అధికారంలో ఉన్నప్పుడు ప్రజల వద్దకు వెళ్లని జగన్, ఇప్పుడు ఓటమి తర్వాత జనసంపర్క యాత్రల పేరుతో బల ప్రదర్శనలు చేస్తున్నారని ఆగ్రహం వ్యక్తం చేశారు.
జగన్ ఇటీవల పాల్నాడు పర్యటనలో చోటుచేసుకున్న విషాద ఘటనపై షర్మిల స్పందిస్తూ, ఆయన కారుపై నిలబడి ప్రయాణించడమే మొదటి తప్పని వ్యాఖ్యానించారు. ఈ సమయంలోనే సింగయ్య అనే వ్యక్తి మృతి చెందాడని తెలిపారు. అయితే ఈ ఘటనకు సంబంధించిన వీడియోను ఫేక్ అంటూ ప్రచారం చేయడం బాధాకరమన్నారు.
“జగన్‌కు నిబంధనలు వర్తించవా? మూడే వాహనాలకు అనుమతి ఉంటే ముప్పై కార్లతో వెళ్తారా? కార్ల కింద అమాయకులు నలిగిపోతుంటే, మానవత్వం గురించి మాట్లాడటం ఎంత తగినది?” అంటూ షర్మిల ప్రశ్నల వర్షం కురిపించారు. అసెంబ్లీలో ప్రజా సమస్యలపై మాట్లాడే ధైర్యం జగన్‌కు లేదని దుయ్యబట్టారు.
రుషికొండను నేలమట్టం చేసిన విషయాన్ని ప్రస్తావిస్తూ, మద్యపాన నిషేధం హామీ ఇచ్చి మద్యం కుంభకోణానికి పాల్పడ్డారని ఆరోపించారు.
రాష్ట్రంలో కాంగ్రెస్ పార్టీని మళ్లీ బలోపేతం చేయాల్సిన అవసరం ఉందని భావించిన అధిష్ఠానం తనను రాష్ట్రానికి పంపిందని షర్మిల చెప్పారు. జగన్‌తో తమ మధ్య ఉన్న వ్యక్తిగత విభేదాలు రాష్ట్ర సమస్యల ముందు చాల చిన్నవని పేర్కొన్నారు. బీజేపీకి వ్యతిరేకంగా పోరాడగల సమర్థవంతమైన పార్టీ కాంగ్రెస్ మాత్రమేనని ఆమె స్పష్టం చేశారు