Kollu Ravindra: వైఎస్సార్ కాంగ్రెస్ పార్టీ సీనియర్ నేత, మాజీ మంత్రి పేర్ని నానిపై రాష్ట్ర గనులు, అటవీ, పర్యావరణ, శాస్త్ర సాంకేతిక, ఎక్సైజ్ శాఖల మంత్రి కొల్లు రవీంద్ర మండిపడ్డారు. గత ఐదేళ్ల పాలనలో పేర్ని నాని దోచిన అవినీతిపై విచారణ తప్పదని, దమ్ముంటే ఎదురు చెప్పాలని సవాల్ విసిరారు.
పాలన భ్రష్టుపట్టిన బందరు నియోజకవర్గం
పేర్ని నాని పాలన వల్ల బందరు నియోజకవర్గం పూర్తిగా సంక్షోభంలోకి వెళ్లిందని, ప్రజలు ఎన్నో ఇబ్బందులు ఎదుర్కొన్నారని ఆరోపించారు. ఓటమి తర్వాత కూడా నానిలో మార్పు రాలేదని, అరెస్ట్ భయంతో వితతూర్పులు మాట్లాడుతున్నారని ఎద్దేవా చేశారు.
అక్రమాల చిట్టా వెలుగు చూస్తుంది
పేర్ని నాని హయాంలో జరిగిన అనేక అక్రమాలపై ఆధారాలతో కూడిన వివరాలను త్వరలో ప్రజల ముందుంచనున్నట్లు మంత్రి ప్రకటించారు. ముఖ్యంగా:
టిడ్కో ఇళ్ల నిర్లక్ష్యం: మచిలీపట్నంలో 6,400 టిడ్కో ఇళ్లను పూర్తిచేయకుండా వదిలేసిన విషయం గురించి నిలదీశారు.
సీఆర్‌జెడ్ భూముల పట్టాలు: 2023లో బదిలీ అయిన తహసీల్దార్ చేత 2024లో ఎన్నికల ముందు భూముల పట్టాలు జారీ చేయించడాన్ని ఆయన తీవ్రంగా తప్పుపట్టారు.
భూ సేకరణ అవినీతి: మెడికల్ కాలేజీ కోసం భూముల కొనుగోలు సమయంలో రూ.8 కోట్లు అవకతవకలు జరిగినట్లు కాగ్ నివేదికలోని అంశాలను ప్రస్తావించారు.
బియ్యం కుంభకోణం: పేదలకు అందాల్సిన 8000 బియ్యం బస్తాలను అక్రమంగా మాయం చేశారని ఆరోపించారు.
బందరు పోర్టుపై కుట్రలు
బందరు పోర్టు నిర్మాణం విషయంలోనూ పేర్ని నాని గతంలో ప్రయత్నాలు చేసి, పోర్టును విక్రయించేందుకు కుట్రలు పన్నారని మంత్రి మండిపడ్డారు. గత ఐదేళ్లలో పోర్టు అభివృద్ధి వైఫల్యాన్ని, నత్తనడక పనులను కమీషన్ల కోసం కావచ్చని విమర్శించారు. నూతన ప్రభుత్వం 2026 నాటికి బందరు పోర్టు పూర్తి చేస్తుందని ధీమా వ్యక్తం చేశారు. బందరును పర్యాటక, క్రీడా కేంద్రంగా అభివృద్ధి చేయనున్నట్లు తెలిపారు.
అవినీతిపరుల చుట్టూ ఉచ్చు
పేర్ని నాని అవినీతిపై అసెంబ్లీలోనూ నిలదీసేందుకు తాను సిద్ధమని కొల్లు రవీంద్ర స్పష్టం చేశారు. “నియోజకవర్గానికి పట్టిన శనిగ్రహం పేర్ని నాని. ప్రజలు తిరస్కరించినా మారలేదు. తప్పు చేసినవారు ఎవరైనా శిక్ష తప్పదు” అని హెచ్చరించారు. అవినీతి చేసేవారిపై కఠిన చర్యలు తీసుకుంటామని, ఇందుకు చంద్రబాబు, పవన్ కల్యాణ్ పూర్తి స్వేచ్ఛ ఇచ్చారని అన్నారు.