Retired IPS: తెలంగాణ ఐపీఎస్ వర్గాల్లో, సోషల్ మీడియాలో ఇప్పుడు ఒకే ఒక్క ట్వీట్ హాట్ టాపిక్‌గా మారింది! హైదరాబాద్ పోలీస్ కమిషనర్ (CP) పదవి నుంచి సీనియర్ ఐపీఎస్ అధికారి వీసీ సజ్జనార్‌ను బదిలీ చేయడంపై మాజీ ఐపీఎస్ అధికారి ఎం. నాగేశ్వర రావు చేసిన వ్యాఖ్యలు పెను దుమారం రేపుతున్నాయి. సజ్జనార్ బదిలీని స్వాగతిస్తూ ఆయన చేసిన పోస్ట్‌లోని పదాలు ఇప్పుడు సర్వత్రా చర్చనీయాంశమయ్యాయి. ఒక సహోద్యోగిపై బహిరంగంగా ఇలాంటి తీవ్రమైన ఆరోపణలు చేస్తూ ఆయన ట్వీట్ చేయడం పోలీసు వర్గాల్లో కలకలం రేపింది.
సీఎం రేవంత్ రెడ్డి, డీజీపీ సీవీ ఆనంద్‌లకు థ్యాంక్స్ – ట్వీట్‌లో ఏముందంటే?
రిటైర్డ్ ఐపీఎస్ అధికారి ఎం. నాగేశ్వర రావు తన అధికారిక ‘X’ (ట్విట్టర్) ఖాతాలో ఈ మేరకు సుదీర్ఘ పోస్ట్ చేశారు.. హైదరాబాద్ సిటీ పోలీస్ కమిషనర్ పోస్టు నుంచి వీసీ సజ్జనార్‌ను బదిలీ చేసినందుకు తెలంగాణ ముఖ్యమంత్రి రేవంత్ రెడ్డి, డీజీపీ సీవీ ఆనంద్‌లకు నాగేశ్వర రావు ప్రత్యేక కృతజ్ఞతలు తెలిపారు. సజ్జనార్‌ను ఉద్దేశించి తీవ్రమైన పదజాలాన్ని ఉపయోగిస్తూ.. “ఒక సహోద్యోగిని ‘యూనిఫాంలో ఉన్న నేరస్థుడు’ అని విమర్శించడం నాకు ఎంతో బాధను, వేదనను కలిగిస్తోంది. అయినప్పటికీ నిజం చెప్పాల్సి వచ్చింది” అని ఆయన పేర్కొన్నారు.
సర్వీస్ సహచరత్వం (కలిసి పనిచేసిన బంధం) కంటే తనకు ప్రజా ప్రయోజనాలే (Public Interest) అత్యంత ముఖ్యమని, అందుకే స్పష్టమైన వాస్తవాలు మాట్లాడాల్సిన అవసరం ఏర్పడిందని నాగేశ్వర రావు తన ట్వీట్‌లో స్పష్టం చేశారు.
బదిలీ శిక్ష కాదు.. సమగ్ర విచారణకు ఆదేశించండి!
కేవలం బదిలీతో సరిపెట్టకుండా సజ్జనార్‌పై విచారణ జరిపించాలని నాగేశ్వర రావు తెలంగాణ ప్రభుత్వాన్ని డిమాండ్ చేశారు.. కేవలం సజ్జనార్‌ను బదిలీ చేయడం అనేది ఏమాత్రం శిక్ష కాబోదు. బదిలీ చేసినంత మాత్రాన ఆయన చేసిన అక్రమాలు, నేరాలు చెరిగిపోవు అని ఆయన అభిప్రాయపడ్డారు. సజ్జనార్‌పై ఆరోపణలు వస్తున్న అన్ని అక్రమాలు, చట్టవిరుద్ధ కార్యకలాపాలపై తెలంగాణ ప్రభుత్వం తక్షణమే సమగ్రమైన విచారణకు ఆదేశించాలని కోరారు. తప్పు చేసిన వారిని చట్టం ముందు నిలబెట్టి శిక్షించినప్పుడే పోలీస్ వ్యవస్థను ప్రక్షాళన చేయగలమని నాగేశ్వర రావు పేర్కొన్నారు.
పోలీసు వర్గాల్లో, నెట్టింట తీవ్ర చర్చ..
ఒకప్పుడు సీబీఐ (CBI) తాత్కాలిక డైరెక్టర్‌గా పనిచేసిన ఎం. నాగేశ్వర రావు, హైదరాబాద్ సీపీగా పనిచేసిన వీసీ సజ్జనార్‌పై ఇంతటి తీవ్ర ఆరోపణలు చేయడం ఇప్పుడు రాజకీయ, అధికార వర్గాల్లో చర్చనీయాంశమైంది. మరోవైపు, సజ్జనార్ గతంలో దిశ ఎన్కౌంటర్, ఆర్టీసీ ఎండీగా ఆయన చేసిన సేవలతో ప్రజల్లో ప్రత్యేక గుర్తింపు తెచ్చుకున్నారు. దీంతో నాగేశ్వర రావు చేసిన ఆరోపణలపై సోషల్ మీడియాలో భిన్నాభిప్రాయాలు వ్యక్తమవుతున్నాయి. ఈ వ్యాఖ్యలపై వీసీ సజ్జనార్ గానీ, తెలంగాణ ప్రభుత్వం గానీ ఎలా స్పందిస్తుందో చూడాలి.
