Mumbai Bomb Threat: దేశ ఆర్థిక రాజధాని ముంబైలో గురువారం ఉదయం ఒక్కసారిగా టెన్షన్ వాతావరణం నెలకొంది! “మధ్యాహ్నం 1:11 గంటలకు బ్యాంకులో బాంబు పేలుతుంది.. ఎయిర్‌పోర్ట్, మేయర్ ఆఫీస్, బాలీవుడ్ మెగాస్టార్ అమితాబ్ బచ్చన్ ఇంటిని కూడా వదిలిపెట్టం” అంటూ వచ్చిన ఒక బెదిరింపు ఈ-మెయిల్ పోలీసులను పరుగులు పెట్టించింది. గత కొన్ని వారాలుగా వరుసగా వస్తున్న ఇలాంటి నకిలీ (Hoax) మెయిల్స్‌తో అటు భద్రతా దళాలు, ఇటు సెలబ్రిటీల అభిమానులు తీవ్ర ఆందోళనకు గురవుతున్నారు. తాజా మెయిల్ నేపథ్యంలో ముంబై పోలీసులు, బాంబ్ స్క్వాడ్ రంగంలోకి దిగి నగరంలోని కీలక ప్రాంతాలన్నింటినీ జల్లెడ పట్టాయి.
ఉదయం 10:52కి మెయిల్.. 1:11కి బ్లాస్ట్ అంటూ వార్నింగ్..
పోలీసు అధికారులు వెల్లడించిన వివరాల ప్రకారం.. గురువారం (నవంబర్ 12) ఉదయం 10:52 గంటల సమయంలో
reduak079@gmail.com అనే ఐడీ నుంచి పంజాబ్ నేషనల్ బ్యాంక్ (PNB) ముంబై జోనల్ ఆఫీస్, జవేరి బజార్ బ్రాంచ్ మరియు కఫ్ పరేడ్ లోకల్ క్రైమ్ బ్రాంచ్ (LCB)లకు ఈ బెదిరింపు మెయిల్ వచ్చింది. మధ్యాహ్నం 1:11 గంటలకు పీఎన్‌బీ బ్రాంచ్‌లో పేలుడు జరుగుతుందని సబ్జెక్ట్ లైన్‌లో పేర్కొన్నారు. అంతేకాకుండా ఛత్రపతి శివాజీ మహారాజ్ అంతర్జాతీయ విమానాశ్రయం, ముంబై మేయర్ ఆఫీస్, మహాలక్ష్మి స్టేడియం, జుహులోని అమితాబ్ బచ్చన్ బంగ్లా ‘జల్సా’ (Jalsa) లను పేల్చేస్తామని హెచ్చరించారు. ఈ మెయిల్‌లో నవంబర్ 27, డిసెంబర్ 31 తేదీలను ప్రస్తావిస్తూ.. ‘ఖలిస్తాన్ నేషనల్ ఆర్మీ’ పేరుతో బెదిరింపులకు పాల్పడ్డారు.రంగంలోకి బాంబ్ స్క్వాడ్ – అనుమానాస్పద వస్తువులేవీ లేవు..
బెదిరింపు మెయిల్ అందిన వెంటనే ముంబై పోలీసులు హైఅలర్ట్ ప్రకటించారు. బాంబ్ డిస్పోజల్ స్క్వాడ్ (BDDS), డాగ్ స్క్వాడ్ మరియు ప్రత్యేక భద్రతా బృందాలు మెయిల్‌లో పేర్కొన్న బ్యాంకు శాఖలు, మేయర్ కార్యాలయం, ఎయిర్‌పోర్ట్ మరియు అమితాబ్ బచ్చన్ నివాసం ‘జల్సా’ వద్దకు చేరుకుని అణువణువూ తనిఖీలు నిర్వహించాయి.
అయితే, ఎక్కడా ఎలాంటి పేలుడు పదార్థాలు గానీ, అనుమానాస్పద వస్తువులు గానీ లభించలేదని అధికారులు స్పష్టం చేశారు. అయినప్పటికీ ముందుజాగ్రత్తగా ఆయా ప్రాంతాల్లో అదనపు బలగాలను మోహరించి భద్రతను కట్టుదిట్టం చేశారు.
వరుస బెదిరింపులతో బుల్లెట్‌ప్రూఫ్ అద్దం వెనుక బిగ్ బి!
గత కొన్ని వారాలుగా ముంబైలో ఇలాంటి బెదిరింపు మెయిల్స్ రావడం ఇది మొదటిసారి కాదు..
-
నవంబర్ 6న: అమితాబ్ బచ్చన్ ఇంటిని పేల్చేస్తామని ఒక మెయిల్ రాగా, పోలీసులు తనిఖీలు చేసి అది ఫేక్ అని తేల్చారు.
-
అక్టోబర్ 23న: ముంబై మేయర్ రీతూ తావ్డే, డిప్యూటీ మేయర్ సంజయ్ ఘాడీలకు వచ్చిన మెయిల్‌లో బీఎంసీ హెడ్‌క్వార్టర్స్, అమితాబ్ బంగ్లాతో పాటు నవంబర్ 27న మహాలక్ష్మి రేస్‌కోర్స్‌లో జరగనున్న సింగర్ దిల్జీత్ దోసాంజ్ (Diljit Dosanjh) కాన్సర్ట్‌పై దాడి చేస్తామని హెచ్చరించారు. ఆ తర్వాత బాంబే హైకోర్టు, స్టాక్ ఎక్స్ఛేంజ్ పేర్లతోనూ మెయిల్స్ వచ్చాయి.ఈ వరుస బెదిరింపుల ప్రభావం 84 ఏళ్ల అమితాబ్ బచ్చన్ భద్రతపై స్పష్టంగా కనిపిస్తోంది. ప్రతి ఆదివారం తన ఇంటి బయట అభిమానులను కలిసే బిగ్ బి.. ఇటీవల ఏకంగా పారదర్శక బుల్లెట్‌ప్రూఫ్ గ్లాస్ (Bulletproof Shield) వెనుక నిలబడి అభిమానులకు అభివాదం చేయడం అందరినీ ఆశ్చర్యపరిచింది. ఆ సమయంలో ఆయన పక్కనే కుమారుడు అభిషేక్ బచ్చన్, భారీ సంఖ్యలో సెక్యూరిటీ సిబ్బంది ఉన్నారు.
ఈ వరుస నకిలీ మెయిల్స్ పంపుతున్న ఆకతాయిలు లేదా ముఠా ఎక్కడి నుంచి ఆపరేట్ చేస్తోందో తెలుసుకునేందుకు ముంబై సైబర్ క్రైమ్ పోలీసులు ఐపీ అడ్రస్‌ల ఆధారంగా లోతైన దర్యాప్తు చేస్తున్నారు.