Kaleshwaram: కాళేశ్వరం ఎత్తిపోతల పథకంలో తీవ్రంగా దెబ్బతిన్న మేడిగడ్డ, అన్నారం, సుందిళ్ల బ్యారేజీల మరమ్మతులు, పునరుద్ధరణ పనులపై తెలంగాణ ప్రభుత్వం కీలక నిర్ణయం తీసుకుంది. మంత్రులు, నీటిపారుదల శాఖ ఉన్నతాధికారులతో ఉన్నత స్థాయి సమీక్ష నిర్వహించిన ముఖ్యమంత్రి రేవంత్ రెడ్డి.. ఈ మూడు బ్యారేజీల శాశ్వత మరమ్మతు పనులను వెంటనే చేపట్టాలని ఆదేశించారు. డ్యామ్ సేఫ్టీ నిపుణులు, కేంద్ర ప్రభుత్వ సంస్థల సిఫారసుల ఆధారంగానే పనులు జరగాలని, ఈ ఏడాది (డిసెంబర్) ముగిసేలోపే క్షేత్రస్థాయిలో పనులు ప్రారంభం కావాలని స్పష్టం చేశారు.
రూ.4,193 కోట్ల సమగ్ర ప్రణాళిక.. నవంబర్ ఆఖరులోగా కేంద్ర అనుమతులు..
సమీక్షా సమావేశంలో అధికారులు సుమారు రూ.4,193 కోట్ల అంచనా వ్యయంతో రూపొందించిన సమగ్ర పునరుద్ధరణ ప్రణాళికను ముఖ్యమంత్రికి సమర్పించారు.డ్యామ్‌ల భద్రత విషయంలో ఎలాంటి సాంకేతిక రాజీ పడొద్దని సీఎం స్పష్టం చేశారు.
నవంబర్ డెడ్‌లైన్: డిసెంబర్ నాటికి గ్రౌండ్ లెవెల్‌లో పనులు మొదలయ్యేలా నవంబర్ ఆఖరు నాటికే కేంద్ర సంస్థల నుంచి తుది అనుమతుల ప్రక్రియను పూర్తి చేయాలని అధికారులను ఆదేశించారు.
ఇప్పటికే కేంద్ర ప్రభుత్వం నియమించిన నిపుణుల కమిటీ ప్రాథమిక పునరుద్ధరణ ప్రతిపాదనలకు సూత్రప్రాయ ఆమోదం తెలిపింది.
పునరుద్ధరణలో కీలక మార్గదర్శకాలు..
-
దశలవారీ అమలు: బ్యారేజీలలో నీటి నిల్వ సామర్థ్యాన్ని క్రమంగా పునరుద్ధరించడం, అలాగే దీర్ఘకాలిక శాశ్వత రక్షణ చర్యలను చేపట్టడం అనే రెండు దశల్లో ప్రాజెక్ట్ కొనసాగుతుంది.
-
ఏజెన్సీలదే మరమ్మతు ఖర్చు: ప్రాజెక్టు నిర్మాణ లోపాలకు కారణమైన సదరు నిర్మాణ సంస్థల (Contracting Agencies) చేతనే మరమ్మతు వ్యయాన్ని భరింపజేయాలని సీఎం ఆదేశించారు. అదనపు శాశ్వత రక్షణ చర్యలకు అవసరమయ్యే నిధులను రాష్ట్ర ప్రభుత్వం భరిస్తుంది.
-
సమాంతర ప్రక్రియ: అనుమతులు, నిపుణుల సంప్రదింపులు, పరిపాలనా అనుమతుల ప్రక్రియలను ఏకకాలంలో సమాంతరంగా పూర్తి చేయాలని నిర్దేశించారు.
నీటిని ఎందుకు ఎత్తిపోయలేకపోతున్నారు? ఇంజనీర్ల స్పష్టత..
బ్యారేజీలలో నీటి నిల్వపై సాగుతున్న రాజకీయ ఆరోపణలపై నీటిపారుదల శాఖ ఇంజనీర్లు ముఖ్యమంత్రికి సాంకేతిక వివరణ ఇచ్చారు. మేడిగడ్డ నుంచి ఎల్లంపల్లికి నీటిని లిఫ్ట్ చేయాలంటే.. దిగువన ఉన్న అన్నారం, సుందిళ్ల బ్యారేజీల గేట్లను మూసి నీటిని నిల్వ చేయాల్సి ఉంటుంది.అయితే నిర్మాణ లోపాలు, తీవ్రమైన భద్రతా సమస్యల దృష్ట్యా అన్నారం, సుందిళ్ల గేట్లను తెరిచే ఉంచాలని నేషనల్ డ్యామ్ సేఫ్టీ అథారిటీ (NDSA) స్పష్టమైన ఆదేశాలు జారీ చేసింది. ఎన్‌డీఎస్ఏ నిబంధనల ప్రకారమే ప్రస్తుతం నీటిని నిల్వ చేయలేకపోతున్నామని వివరించారు.
తప్పుడు ప్రచారాలను తిప్పికొట్టండి: సీఎం రేవంత్ రెడ్డి ఆగ్రహం
గత పాలకుల తప్పుడు డిజైన్లు, లోపాల వల్లే ఈ దుస్థితి తలెత్తిందని సీఎం మండిపడ్డారు. వాస్తవాలు దాచిపెట్టి కొందరు చేస్తున్న తప్పుడు ప్రచారాలను మంత్రులు, అధికారులు సమర్థంగా తిప్పికొట్టాలని సూచించారు. గతంలో తుమ్మిడిహెట్టి వద్ద ప్రతిపాదించిన అసలైన ‘ప్రాణహిత-చేవెళ్ల’ డిజైన్‌ను అమలు చేసి ఉంటే, ఇంత భారీ వ్యయం లేకుండా అత్యంత తక్కువ ఖర్చుతోనే ఎల్లంపల్లికి నీరు చేరేదని సీఎం గుర్తుచేశారు.
ప్రత్యామ్నాయంగా దేవాదుల, సీతారామ వినియోగం..
గోదావరి జలాలు వృథాగా సముద్రంలో కలవకుండా ఉండేందుకు ప్రభుత్వం ప్రత్యామ్నాయ ప్రణాళికలను అమలు చేస్తోంది. దేవాదుల, సీతారామ ఎత్తిపోతల పథకాల నిర్వహణ సామర్థ్యాన్ని పెంచి నదీ జలాలను సమర్థంగా వినియోగిస్తున్నారు. దీని ద్వారా ఉమ్మడి వరంగల్, ఖమ్మం, నల్గొండ జిల్లాలకు తాగు, సాగునీటిని విజయవంతంగా సరఫరా చేస్తున్నట్లు ప్రభుత్వం వెల్లడించింది.