US Midterm Elections: అమెరికా మధ్యంతర ఎన్నికలు (US Midterm Elections 2026) ఆ దేశ రాజకీయ చరిత్రలోనే అత్యంత ఖరీదైన పోరుగా రికార్డు సృష్టిస్తున్నాయి. ఈ ఎన్నికల ప్రచారం కోసం ఏకంగా 12 బిలియన్ డాలర్లు (భారత కరెన్సీలో దాదాపు రూ.1.13 లక్షల కోట్లు) ఖర్చవుతోందని ప్రచార నిధుల పర్యవేక్షణ సంస్థ ‘ఓపెన్ సీక్రెట్స్’ (OpenSecrets) వెల్లడించింది. 2022 నాటి మధ్యంతర ఎన్నికలతో పోలిస్తే ఈ వ్యయం ఏకంగా 30 శాతం పెరిగింది. అక్టోబర్ మధ్య నాటికే అభ్యర్థులు, రాజకీయ గ్రూపులు దాదాపు 9.5 బిలియన్ డాలర్లకు పైగా ఖర్చు చేసినట్లు ఫెడరల్ ఎలక్షన్ కమిషన్ (FEC) గణాంకాలు స్పష్టం చేస్తున్నాయి.
అధ్యక్షుడు డొనాల్డ్ ట్రంప్ నాయకత్వంలోని అధికార రిపబ్లికన్ పార్టీకి ఈ ఎన్నికలు చావోరేవోగా మారాయి. అమెరికా చరిత్రలో 1934, 2002 ఎన్నికల్లో తప్పించి.. అధికారంలో ఉన్న పార్టీ ఎప్పుడూ మధ్యంతర ఎన్నికల్లో కాంగ్రెస్‌లో సీట్లను పెంచుకున్న దాఖలాలు లేకపోవడంతో ఫలితాలపై సర్వత్రా ఉత్కంఠ నెలకొంది.
ఎలాన్ మస్క్ ఆల్‌టైమ్ రికార్డు.. ఏకంగా $500 మిలియన్ల విరాళం!
ఈ ఎన్నికల్లో వ్యక్తిగత విరాళాల విభాగంలో టెస్లా, స్పేస్‌ఎక్స్ అధినేత ఎలాన్ మస్క్ అగ్రస్థానంలో నిలిచి సరికొత్త చరిత్ర సృష్టించారు. రిపబ్లికన్ పార్టీ అభ్యర్థులకు మద్దతుగా మస్క్ ఏకంగా 500 మిలియన్ డాలర్లను (దాదాపు రూ.4,200 కోట్లకు పైగా) అందజేశారు.
ఈ భారీ నిధుల్లో అత్యధిక భాగం ఆయన 2024లో స్థాపించిన ‘అమెరికా పీఏసీ’ (America PAC)తో పాటు రిపబ్లికన్ సెనెట్ లీడర్‌షిప్ ఫండ్‌కు చేరాయి.
ముఖ్యంగా తన కంపెనీల ప్రధాన కేంద్రమైన టెక్సాస్ రాష్ట్రంలో జరుగుతున్న హై-వోల్టేజ్ సెనెట్ పోరులో రిపబ్లికన్ అభ్యర్థి కెన్ పాక్స్‌టన్‌కు మద్దతుగా అమెరికా పీఏసీ ఒక్కటే 45 మిలియన్ డాలర్లకు పైగా ఖర్చు చేసింది. మిచిగాన్, ఒహియో సెనెట్ రేసులకూ భారీగా కేటాయించారు.
వ్యాపారవేత్తలు జెఫ్ యాస్, రిచర్డ్-ఎలిజబెత్ ఉహ్లీన్ దంపతులు సైతం రిపబ్లికన్ల కోసం చెరో 100 మిలియన్ డాలర్లకు పైగా విరాళాలు సమకూర్చారు.
డెమోక్రాట్లకు అండగా జార్జ్ సోరోస్, బ్లూమ్‌బెర్గ్..
లెఫ్ట్-వింగ్ సిద్ధాంతాలకు మద్దతుగా నిలిచే డెమోక్రటిక్ పార్టీ తరఫున ప్రముఖ ఆర్థికవేత్త, బిలియనీర్ జార్జ్ సోరోస్ భారీగా నిధులు గుమ్మరించారు.
సోరోస్‌కు చెందిన ‘జియోసర్ కార్ప్’ (Geosor Corp), ‘ఫండ్ ఫర్ పాలసీ రిఫార్మ్’ సంస్థలు కలిసి డెమోక్రాట్లకు అనుకూలమైన గ్రూపులకు 102 మిలియన్ డాలర్లు (సుమారు రూ.965 కోట్లు) అందించాయి.
న్యూయార్క్ మాజీ మేయర్, వ్యాపార దిగ్గజం మైఖేల్ బ్లూమ్‌బెర్గ్ డెమోక్రటిక్ పార్టీ కోసం 60 మిలియన్ డాలర్లకు పైగా విరాళంగా ఇచ్చారు.
సూపర్ పీఏసీల (Super PACs) సునామీ: రూల్స్ ఏంటి?
సాధారణంగా అమెరికా ఎన్నికల నిబంధనల ప్రకారం అభ్యర్థులకు వ్యక్తులు ఇచ్చే ప్రత్యక్ష విరాళాలపై నిర్దిష్ట పరిమితులు ఉంటాయి. కానీ ‘సూపర్ పీఏసీ’ల ద్వారా కార్పొరేట్లు, సంపన్నులు అపరిమితంగా విరాళాలు ఇవ్వవచ్చు. ఈ సూపర్ పీఏసీలు అభ్యర్థులకు నేరుగా నగదు ఇవ్వకపోయినా, వారి తరఫున ప్రచారాలు, వ్యతిరేక ప్రచారాల కోసం స్వతంత్రంగా నిధులను ఖర్చు చేస్తాయి.
ఈ ఎన్నికల్లో మొత్తం ఖర్చులో సగానికి పైగా వాటా (దాదాపు 5.5 బిలియన్ డాలర్లు) కేవలం పీఏసీలు, సూపర్ పీఏసీల ద్వారానే జరిగింది. బ్రెన్నాన్ సెంటర్ ఫర్ జస్టిస్ నివేదిక ప్రకారం, అగ్రస్థానంలో ఉన్న కేవలం 40 మంది సంపన్నులే పార్టీలకు ఏకంగా 2.4 బిలియన్ డాలర్ల (దాదాపు రూ.20 వేల కోట్లు) నిధులను గుమ్మరించారు.
మరోవైపు తమ వ్యాపార ప్రయోజనాలను కాపాడుకునేందుకు క్రిప్టోకరెన్సీ రంగ దిగ్గజాలు ‘రిపుల్’ (Ripple), ‘కాయిన్‌బేస్’ (Coinbase)లు కలిసి 63 మిలియన్ డాలర్లను సమకూర్చాయి.
ప్రచార నిధులన్నీ ఎక్కడికి వెళ్తున్నాయి?
ఎన్నికల ప్రచార సంస్థలు సేకరించిన నిధుల్లో సింహభాగం ప్రకటనలకే వెచ్చించారు. అడ్వర్టైజింగ్ ట్రాకింగ్ సంస్థ ‘యాడ్ ఇంపాక్ట్’ (AdImpact) ప్రకారం, అక్టోబర్ చివరి నాటికే పొలిటికల్ అడ్వర్టైజింగ్ కోసం 11.15 బిలియన్ డాలర్లు ఖర్చయ్యాయి.
డిజిటల్, సోషల్ మీడియా ప్రచారాలు పెరిగినప్పటికీ.. సంప్రదాయ బ్రాడ్‌కాస్ట్ టెలివిజన్ (TV) ప్రకటనలకే అత్యధికంగా నిధులు కేటాయించారు. ముఖ్యంగా మిచిగాన్, టెక్సాస్, ఒహియో, ఐయోవా, మైనే వంటి హోరాహోరీగా సాగే స్వింగ్ స్టేట్స్‌లోని సెనెట్ ఎన్నికల్లోనే ఈ వాణిజ్య ప్రకటనల ప్రవాహం కొనసాగింది.
మరోవైపు అధ్యక్షుడు డొనాల్డ్ ట్రంప్ 27 రోజుల్లో ఏకంగా 31 బహిరంగ ర్యాలీలతో పాటు అనేక టెలి-ర్యాలీల్లో పాల్గొంటూ ఓటర్లను ఆకట్టుకునేందుకు సర్వశక్తులూ ఒడ్డుతున్నారు. అపర కుబేరుల నిధుల యుద్ధంగా మారిన ఈ ఎన్నికల్లో అమెరికన్ ఓటర్లు ఎవరివైపు నిలుస్తారో తేలాల్సి ఉంది.