Helicopter Crash: ఉత్తరాఖండ్‌లోని చమోలీ జిల్లాలో తీవ్ర విషాదం చోటుచేసుకుంది. బద్రీనాథ్ నుంచి డెహ్రాడూన్ వైపు వెళ్తున్న ఓ ప్రైవేట్ హెలికాప్టర్ జోషిమఠ్ సమీపంలో కుప్పకూలింది. ప్రమాద సమయంలో హెలికాప్టర్‌లో పైలట్‌తో సహా మొత్తం ఆరుగురు వ్యక్తులు ఉన్నట్లు సమాచారం. ప్రమాదం జరిగిన ప్రాంతంలో దట్టమైన పొగమంచు, ప్రతికూల వాతావరణం నెలకొనడంతో సహాయక చర్యలకు తీవ్ర ఆటంకం కలుగుతోంది.
హాథీ పర్వతం వద్ద మిస్సింగ్.. ఛాయీ గ్రామం సమీపంలో కూలిన కాప్టర్
బద్రీనాథ్ క్షేత్రం నుంచి బయల్దేరిన కొద్దిసేపటికే ‘హాథీ పర్వత్’ ప్రాంతంలో హెలికాప్టర్‌తో ఎయిర్ ట్రాఫిక్ కంట్రోల్ (ATC) సంబంధాలు తెగిపోయాయి. హెలికాప్టర్ ఆచూకీ గల్లంతు కావడంతో అధికారులు వెంటనే అప్రమత్తమయ్యారు.
గాలింపు చర్యల కోసం వెంటనే మరో రెండు హెలికాప్టర్లను రంగంలోకి దించారు. కాసేపటికే జోషిమఠ్ సమీపంలోని ఛాయీ (Chayee) గ్రామం సమీపంలో హెలికాప్టర్ నేలకూలినట్లు గుర్తించారు. ప్రమాదానికి గురైన చాపర్‌ను ‘భారత్ ఏవియేషన్’ లేదా ‘చార్లీ ఎక్స్‌రే’ ఆపరేట్ చేస్తున్నట్లు ప్రాథమిక సమాచారం ద్వారా తెలుస్తోంది.
సీఎం పుష్కర్ సింగ్ ధామీ దిగ్భ్రాంతి.. ముమ్మరంగా రెస్క్యూ ఆపరేషన్
ఈ దుర్ఘటనపై ఉత్తరాఖండ్ ముఖ్యమంత్రి పుష్కర్ సింగ్ ధామీ తీవ్ర దిగ్భ్రాంతి వ్యక్తం చేశారు. సోషల్ మీడియా వేదికగా ఆయన స్పందిస్తూ:
“జోషిమఠ్ సమీపంలోని ఛాయీ గ్రామం వద్ద హెలికాప్టర్ కూలిపోయిందన్న వార్త తీవ్ర దిగ్భ్రాంతికి గురిచేసింది. జిల్లా యంత్రాంగం, విపత్తు నిర్వహణ శాఖ, రాష్ట్ర విపత్తు ప్రతిస్పందన దళం (SDRF) సంయుక్తంగా ఘటనా స్థలంలో రెస్క్యూ ఆపరేషన్ చేపట్టాయి. సహాయక చర్యలను నేను స్వయంగా పర్యవేక్షిస్తున్నాను.” అని సీఎం తెలిపారు.
తీవ్రంగా గాయపడిన వారిని మెరుగైన చికిత్స కోసం వెంటనే ఎయిర్‌లిఫ్ట్ చేసి అత్యున్నత వైద్య కేంద్రాలకు తరలించాలని అధికారులకు సీఎం ఆదేశాలు జారీ చేశారు.
సహాయక చర్యలకు ఆటంకంగా మారిన వాతావరణం
ప్రస్తుతం ఘటనా స్థలంలో ప్రతికూల వాతావరణం, మంచు కురుస్తుండటంతో సహాయక బృందాలు కాలినడకన, రోడ్డు మార్గం ద్వారా అక్కడికి చేరుకునేందుకు తీవ్రంగా శ్రమిస్తున్నాయి. సహాయక బృందాలు ఘటనా స్థలానికి చేరుకున్న తర్వాతే ప్రయాణికుల పరిస్థితి, ప్రాణనష్టంపై పూర్తి స్థాయి అధికారిక వివరాలు వెలువడే అవకాశముంది.