Kitchen Tips: చాలామంది ఇళ్లలో కిచెన్‌లో స్థలం లేకనో లేదా అలవాటు ప్రకారమో ఫ్రిజ్ పైన ఖాళీగా కనిపించే స్థలాన్ని వస్తువులు దాచుకోవడానికి ఒక షెల్ఫ్‌లా వాడేస్తుంటారు. బ్రెడ్ ప్యాకెట్ల నుంచి ప్లాస్టిక్ డబ్బాలు, మందుల దాకా ఏది దొరికితే అది ఫ్రిజ్ నెత్తిమీద పెట్టేస్తుంటారు. కానీ ఈ అలవాటు చాలా ప్రమాదకరమని, దీనివల్ల ఆహార పదార్థాలు విషతుల్యం కావడమే కాకుండా ఫ్రిజ్ లైఫ్‌ కూడా తగ్గిపోతుందని హోమ్ & కిచెన్ ఎక్స్‌పర్ట్స్ హెచ్చరిస్తున్నారు.
రిఫ్రిజిరేటర్ పనిచేసేటప్పుడు మోటార్, కంప్రెసర్ వల్ల దాని పైభాగం, వెనుక వైపు నిరంతరం వేడి వెలువడుతూనే ఉంటుంది. మరి ఆ వేడి ప్రభావం పడకుండా ఉండాలంటే ఫ్రిజ్‌పై పొరపాటున కూడా ఏయే వస్తువులు పెట్టకూడదో చూద్దాం:
1. బ్రెడ్, కార్న్‌ఫ్లేక్స్, నిల్వ ఆహారాలు
ఫ్రిజ్ నుంచి వచ్చే వేడి, తేమ కారణంగా బ్రెడ్ ప్యాకెట్లలో తేమ పేరుకుపోయి చాలా త్వరగా బూజు (Fungus) పడుతుంది. కార్న్‌ఫ్లేక్స్, బిస్కెట్లు వంటివి క్రంచీనెస్ కోల్పోయి మెత్తబడిపోతాయి. అలాగే పాలు, పెరుగు, వండిన ఆహారాలను తాత్కాలికంగానైనా ఫ్రిజ్ పైన పెట్టడం వల్ల అవి మరింత వేగంగా పాడైపోతాయి.
2. వంట నూనెలు, మసాలా పొడులు
పారదర్శక బాటిళ్లలో ఉండే వంట నూనెలకు వేడి, వెలుగు తగిలితే వాటిలోని కొవ్వు ఆమ్లాలు మారిపోయి నూనె వాసన, రుచి పూర్తిగా మారిపోతాయి. పసుపు, కారం, ధనియాల పొడి వంటి మసాలా దినుసులు వేడి తగిలితే సువాసనను, రంగును కోల్పోతాయి. వీటిని ఎప్పుడూ చల్లని, పొడి ప్రాంతాల్లో ఎయిర్ టైట్ డబ్బాల్లో మాత్రమే ఉంచాలి.
3. మైక్రోవేవ్ ఓవెన్లు, టోస్టర్లు
కిచెన్‌లో స్థలం ఆదా అవుతుందని మైక్రోవేవ్ లేదా బ్రెడ్ టోస్టర్లను ఫ్రిజ్ పైన పెడుతుంటారు. ఇది చాలా రిస్కీ. మైక్రోవేవ్ పనిచేసేటప్పుడు అధిక వేడి పుడుతుంది, అటు ఫ్రిజ్ కూడా వేడిని విడుదల చేస్తుంది. రెండు ఎలక్ట్రానిక్ పరికరాలు ఒకేచోట వేడిని విడుదల చేయడం వల్ల వెంటిలేషన్ లేక రెండింటి పనితీరు దెబ్బతింటుంది. పైగా మైక్రోవేవ్ బరువు వల్ల ఫ్రిజ్ బ్యాలెన్స్ దెబ్బతినే అవకాశం ఉంది.
4. మందులు (Medicines)
ఔషధాలు ఎప్పుడూ నిర్దిష్ట ఉష్ణోగ్రత వద్దే ఉండాలి. ఫ్రిజ్ పైన ఉండే అధిక వేడి వల్ల ట్యాబ్లెట్లు, సిరప్‌ల రసాయన సమతుల్యత దెబ్బతిని వాటి ప్రభావం తగ్గిపోవచ్చు. మందుల ప్యాక్‌పై రాసి ఉన్న సూచనల ప్రకారం వాటిని గది ఉష్ణోగ్రత వద్ద లేదా ఫ్రిజ్ లోపల మాత్రమే ఉంచాలి.
5. కొవ్వొత్తులు, లైటర్లు, అగ్గిపెట్టెలు
వేడి నిరంతరం వెలువడే ఫ్రిజ్ టాప్‌పై కొవ్వొత్తులు, గ్యాస్ లైటర్లు, అగ్గిపెట్టెలు వంటి మండే స్వభావం ఉన్న వస్తువులను (Flammable items) ఉంచడం చాలా ప్రమాదకరం. వేడికి కొవ్వొత్తులు కరిగిపోతాయి, లైటర్లలో ఉండే గ్యాస్ వేడెక్కి బ్లాస్ట్ అయ్యే ప్రమాదం ఉంటుంది.
6. ఆల్కహాల్, వైన్ బాటిల్స్
మద్యం సీసాలు లేదా వైన్ బాటిళ్లను ఫ్రిజ్‌పై పెట్టకూడదు. ఉష్ణోగ్రత హెచ్చుతగ్గులు, వేడి వల్ల వైన్ అసలు రుచి, నాణ్యత పూర్తిగా దెబ్బతింటుంది. వీటిని ఎల్లప్పుడూ చల్లటి డార్క్ స్పేస్‌లోనే ఉంచాలి.
7. ప్లాస్టిక్ డబ్బాలు
ప్లాస్టిక్ డబ్బాలను ఫ్రిజ్ పైన వరుసగా పేర్చి ఉంచితే.. ఫ్రిజ్ నుంచి వచ్చే వేడికి ప్లాస్టిక్ బలహీనపడి, కాలక్రమేణా ఆకారం మారడం లేదా పగుళ్లు రావడం జరుగుతుంది.
8. కెమికల్ క్లీనర్లు
ఫ్లోర్ క్లీనర్లు, కిచెన్ స్ప్రేలను ఫ్రిజ్ పైన ఉంచితే పొరపాటున కారినా లేదా వేడికి ఆవిరైనా పక్కనే ఉండే ఆహార పదార్థాల్లో కలిసే ప్రమాదం ఉంటుంది. ముఖ్యంగా పిల్లలకు అందకుండా వీటిని ప్రత్యేక క్యాబినెట్లలో మాత్రమే ఉంచాలి.
9. వెంటిలేషన్ మార్గాలను మూయకూడదు!
చాలా మోడల్స్ ఫ్రిజ్‌లకు పైభాగంలో లేదా వెనుక గాలి ఆడేందుకు వెంటిలేషన్ స్పేస్ ఉంటుంది. దీనిని పేపర్లు, కవర్లు లేదా డబ్బాలతో కప్పేస్తే వేడి బయటకు పోక కంప్రెసర్‌పై విపరీతమైన లోడ్ పడుతుంది. దీనివల్ల కరెంట్ బిల్లు భారీగా పెరగడమే కాకుండా ఫ్రిజ్ మోటార్ త్వరగా కాలిపోయే ప్రమాదం ఉంది.