DA Hike: దీపావళి పండుగకు ముందే దేశంలోని 1 కోటికి పైగా ఉన్న కేంద్ర ప్రభుత్వ ఉద్యోగులు, పెన్షనర్లకు కేంద్ర ప్రభుత్వం భారీ శుభవార్త అందించింది. బుధవారం ప్రధాని నరేంద్ర మోదీ అధ్యక్షతన జరిగిన కేంద్ర మంత్రివర్గ సమావేశంలో ఉద్యోగుల కరవు భత్యం (DA), పెన్షనర్ల డియర్‌నెస్ రిలీఫ్ (DR)ను 3 శాతం పెంచుతూ కీలక నిర్ణయం తీసుకున్నారు. దీంతో ప్రస్తుతం ఉన్న 60 శాతం డీఏ కాస్తా 63 శాతానికి చేరింది. దసరా నుంచే డీఏ పెంపు కోసం ఎదురుచూస్తున్న ఉద్యోగ సంఘాలకు ఈ నిర్ణయం పెద్ద ఊరటనిచ్చింది.
జూలై 1 నుంచి అమల్లోకి.. నవంబర్ శాలరీతో కలిపి ఏరియర్స్!
ఈ పెరిగిన డీఏ 2026 జూలై 1వ తేదీ నుంచే అమల్లోకి రానుంది. జూలై, ఆగస్టు, సెప్టెంబర్ నెలలకు సంబంధించిన 3 నెలల బకాయిలను (ఏరియర్స్‌ను) అక్టోబర్ నెల జీతంతో కలిపి నవంబర్ మొదటి వారంలో ఉద్యోగుల ఖాతాల్లో జమ చేస్తారు. డీఏ, డీఆర్ పెంపు వల్ల కేంద్ర ప్రభుత్వ ఖజానాపై వార్షికంగా రూ. 10,016 కోట్ల అదనపు ఆర్థిక భారం పడనుందని అధికారిక వర్గాలు వెల్లడించాయి.
శాలరీ ఎంత పెరుగుతుంది? (లెక్కలు ఇవే)
డీఏ అనేది బేసిక్ పే (మూల వేతనం) ఆధారంగా లెక్కించబడుతుంది. దీంతో బేసిక్ పే పెరగడంతో పాటు డీఏతో ముడిపడి ఉండే ట్రాన్స్‌పోర్ట్ అలవెన్స్ (TPTA) కూడా పెరుగుతుంది.
-
లెవెల్-5 ఉద్యోగి ఉదాహరణ: బేసిక్ పే రూ. 29,200 ఉన్న కేంద్ర ప్రభుత్వ లెవెల్-5 ఉద్యోగికి 3 శాతం పెంపు ద్వారా నెలవారీ డీఏలో దాదాపు రూ. 876 పెరుగుదల కనిపిస్తుంది.
-
వీటికి అదనంగా TPTA కేటగిరీ నగరాల్లో పనిచేసే వారికి రవాణా భత్యం రూపంలో సుమారు మరో రూ. 108 అదనంగా అందుతుంది.
-
6వ వేతన సంఘం ఉద్యోగులు: 6th సీపీసీ స్కేల్ పరిధిలో ఉన్న ఉద్యోగులకు డీఏ/డీఆర్ బేసిక్ పేలో 262% నుంచి ఏకంగా 269 శాతానికి (+7%) పెరిగింది.
-
5వ వేతన సంఘం ఉద్యోగులు: 5th సీపీసీ ఉద్యోగులకు డీఏ 483% నుంచి 497 శాతానికి (+14%) పెరిగింది.
కేబినెట్ ఆమోదించిన ఇతర కీలక పథకాలు
ఉద్యోగుల డీఏ పెంపుతో పాటు ఆర్థిక వ్యవస్థ, ఉపాధి కల్పనను ప్రోత్సహించే పలు భారీ పథకాలకు కేంద్ర కేబినెట్ ఆమోదముద్ర వేసింది.
-
కంటైనర్ తయారీ ప్రోత్సాహక పథకం: దేశీయ లాజిస్టిక్స్ రంగాన్ని బలోపేతం చేసేందుకు రూ. 10,000 కోట్ల బడ్జెట్ కేటాయింపు.
-
ప్రధానమంత్రి వికసిత్ గ్రామ్ స్వరాజ్ యోజన: గ్రామీణ ప్రాంతాల స్వయం సమృద్ధి, మౌలిక వసతుల కల్పన కోసం రూ. 7,395 కోట్లతో ఆమోదం.
- ఖేలో ఇండియా స్పోర్ట్స్ గూడ్స్ మ్యానుఫ్యాక్చరింగ్ స్కీమ్: క్రీడా పరికరాల తయారీని అంతర్జాతీయ స్థాయికి చేర్చేందుకు రూ. 1,856 కోట్ల నిధులతో ఈ పథకాన్ని ప్రారంభించారు
-
ఇది ఎనిమిదేళ్ల పాటు (ఆర్థిక సంవత్సరం 2026-27 నుంచి 2033-34 వరకు) అమల్లో ఉంటుంది.
-
ఇందులో భాగంగా ప్రత్యేక మ్యానుఫ్యాక్చరింగ్ జోన్లు, యాంకర్ ఇన్వెస్ట్‌మెంట్ సపోర్ట్, రీసెర్చ్ & టెస్టింగ్ సెంటర్లు, స్టార్టప్‌లకు ప్రోత్సాహకాలను అందించనున్నారు.
-
దీపావళి పండుగ వేళ డీఏ 3 శాతం పెంపుతో కేంద్ర ఉద్యోగులు, పెన్షనర్లకు ఊరట లభించడంతో పాటు.. ఏరియర్స్‌తో కూడిన అదనపు మొత్తం పండుగ కొనుగోళ్లకు మరింత బలాన్ని చేకూర్చనుంది.