Chandrababu: సెమీకండక్టర్ ఎకోసిస్టమ్‌పై సీఎం కీలక ఆదేశాలు!

Chandrababu: ఆంధ్రప్రదేశ్‌ను పారిశ్రామికంగా, ఆర్థికంగా పరుగులు పెట్టించడమే లక్ష్యంగా ముఖ్యమంత్రి నారా చంద్రబాబు నాయుడు అధ్యక్షతన 22వ రాష్ట్రస్థాయి పెట్టుబడుల ప్రోత్సాహక బోర్డు (ఎస్‌ఐపీబీ – SIPB) సమావేశం ఉన్నత స్థాయిలో జరిగింది. ఈ కీలక సమావేశంలో మంత్రులు నారా లోకేష్, టీజీ భరత్, అనగాని సత్యప్రసాద్, గొట్టిపాటి రవికుమార్, పొంగూరు నారాయణ, కందుల దుర్గేష్ వర్చువల్‌గా పాల్గొన్నారు.

పరిశ్రమలు, ఇంధన శాఖ, ఐటీ, ఎలక్ట్రానిక్స్, టూరిజం, ఫుడ్ ప్రాసెసింగ్, లాజిస్టిక్స్, మౌలిక వసతుల కల్పన వంటి కీలక రంగాల్లో వచ్చిన పలు మెగా పెట్టుబడి ప్రతిపాదనలపై ఈ సమావేశంలో సమగ్రంగా చర్చించి పలు నిర్ణయాలు తీసుకున్నారు.

రాష్ట్రంలో పెట్టుబడుల ఒప్పందాలపై అధికారులకు సీఎం చంద్రబాబు స్పష్టమైన దిశానిర్దేశం చేశారు. గతంలో కుదుర్చుకున్న ఒప్పందాలు (MoUs) కేవలం కాగితాలకే పరిమితం కాకుండా, అవి క్షేత్రస్థాయిలో వాస్తవ పెట్టుబడులుగా మారి, ఫ్యాక్టరీల్లో వేగంగా ఉత్పత్తి ప్రారంభమయ్యేలా అధికారులు ప్రత్యేక దృష్టి సారించాలని ఆదేశించారు.

గతంలో కుదిరిన మొత్తం 714 అవగాహన ఒప్పందాలలో (MoUs).. ఇప్పటికే 519 ప్రాజెక్టులకు సంబంధించిన పనులు క్షేత్రస్థాయిలో ప్రారంభమైనట్లు అధికారులు ముఖ్యమంత్రికి సమర్పించిన నివేదికలో వెల్లడించారు.

రాష్ట్రానికి వచ్చే పరిశ్రమలకు సింగిల్ డెస్క్ విధానంలో వేగవంతమైన అనుమతులు కల్పిస్తూనే, యువతకు భారీగా ఉపాధి అవకాశాలు కల్పించే రంగాలకు అధిక ప్రాధాన్యత ఇవ్వాలని సీఎం అధికారులను ఆదేశించారు.