ఈ కార్యక్రమంలో కేంద్ర గ్రామీణాభివృద్ధి శాఖ మంత్రి శివరాజ్ సింగ్ చౌహాన్, కేంద్ర మంత్రులు కింజరాపు రామ్మోహన్ నాయుడు, డాక్టర్ పెమ్మసాని చంద్రశేఖర్, విజయవాడ ఎంపీ కేశినేని శివనాథ్ (చిన్ని) సహా పలువురు ప్రముఖులు హాజరయ్యారు. వివిధ రాష్ట్రాల నుంచి తరలివచ్చిన డ్వాక్రా సంఘాల మహిళలు ఏర్పాటు చేసిన చేతివృత్తులు, హస్తకళల స్టాళ్లను రాష్ట్రపతి స్వయంగా సందర్శించి వారి ప్రతిభను కొనియాడారు.
రాష్ట్రపతి ముర్ము ప్రయాణమే నారీ శక్తికి నిదర్శనం.. సీఎం చంద్రబాబు ప్రసంగం
కార్యక్రమంలో ఏర్పాటు చేసిన భారీ బహిరంగ సభలో ముఖ్యమంత్రి చంద్రబాబు నాయుడు ఉద్విగ్నభరిత ప్రసంగం చేశారు. రాష్ట్రపతి ద్రౌపది ముర్ము జీవితం దేశంలోని ప్రతి ఆడబిడ్డకు గొప్ప ప్రేరణ, ఆదర్శం. ఒక మారుమూల గిరిజన ప్రాంతంలో పుట్టి, జీవితంలో ఎన్ని తీవ్రమైన కష్టాలు, సవాళ్లు ఎదురైనా ధైర్యం కోల్పోకుండా ప్రజాసేవలో ఒక్కో మెట్టు ఎక్కుతూ దేశ ప్రథమ పౌరురాలిగా నిలిచారు. బలమైన సంకల్పం ఉంటే మహిళలు ఎంతటి ఉన్నత శిఖరాలనైనా అధిరోహిస్తారని ఆమె నిరూపించారు” అని చంద్రబాబు ప్రశంసించారు.
నవభారత నిర్మాణానికి పునాది..
మహిళలను పూజించే పుణ్యభూమి మన భారతదేశం. స్త్రీ శక్తి అంటే కేవలం కుటుంబానికి మాత్రమే కాదు.. నవభారత శక్తికి, 2047 నాటికి నిర్మించబోయే ‘వికసిత్ భారత్’కు ఇదే అసలైన పునాది” అని స్పష్టం చేశారు.
పొదుపు సంఘాల నుంచి అంతర్జాతీయ బ్రాండ్ల వైపు..
మహిళా సాధికారత, గ్రామీణ ఆర్థికాభివృద్ధిపై సీఎం చంద్రబాబు సరికొత్త విజన్‌ను ఆవిష్కరించారు. మహిళలను ప్రభుత్వం కేవలం సంక్షేమ పథకాల లబ్ధిదారులుగా మాత్రమే చూడటం లేదని, వారిని రాష్ట్ర అభివృద్ధిలో కీలకమైన ‘సంపద సృష్టికర్తలు’గా (Wealth Creators) తీర్చిదిద్దుతున్నామని పేర్కొన్నారు.
365 రోజుల నిరంతర మార్కెట్..
సరస్ మేళా అనేది ఏదో కొన్ని రోజులు జరుపుకునే ఎగ్జిబిషన్ మాత్రమే కాదు. గ్రామీణ మహిళా పారిశ్రామికవేత్తలు తయారు చేసే వస్తువులకు ఏడాది పొడవునా 365 రోజులూ మార్కెటింగ్ అవకాశాలు కల్పించేందుకు ఇది బలమైన వేదిక అని తెలిపారు. నిన్నటి పొదుపు సంఘాలు.. నేడు వ్యాపార సంస్థలుగా ఎదిగాయి. రేపటి రోజున ఇవే గ్లోబల్ మార్కెట్‌లో అంతర్జాతీయ బ్రాండ్లుగా మారాలి అని చంద్రబాబు ఆకాంక్షించారు.
14 రోజుల పాటు వేడుక – ‘స్వయం ఏపీ’ బ్రాండింగ్..
ఇప్పటివరకు జాతీయ సరస్ మేళాను న్యూఢిల్లీ పరిధిలోనే నిర్వహించే ఆనవాయితీ ఉండగా.. సరికొత్త చరిత్ర సృష్టిస్తూ మొదటిసారి రాష్ట్రాల స్థాయిలో ఏపీ దీనికి ఆతిథ్యమిస్తోంది. పవిత్ర కృష్ణా తీరాన ఈ మేళా జరగడం ఆంధ్రప్రదేశ్‌కే సరికొత్త శోభను తెచ్చిపెట్టింది.
నేటి (అక్టోబర్ 15) నుంచి ఈ నెల 31వ తేదీ వరకు దాదాపు 14 రోజుల పాటు ఈ సరస్ మేళా కొనసాగనుంది. ఇందులో దేశవ్యాప్తంగా వివిధ ప్రాంతాలకు చెందిన మహిళా స్వయం సహాయక సంఘాలు (డ్వాక్రా) తయారు చేసిన ఉత్పత్తుల కోసం 650కి పైగా స్టాళ్లను ఏర్పాటు చేశారు.
ఆంధ్రప్రదేశ్ మహిళలు తయారు చేసే ఉత్పత్తులకు జాతీయ, అంతర్జాతీయ స్థాయిలో విస్తృత గుర్తింపు, మార్కెట్ కల్పించే లక్ష్యంతో ప్రభుత్వం ప్రత్యేకంగా ‘స్వయం ఏపీ’ (Swayam AP) బ్రాండ్‌ను ప్రమోట్ చేస్తోంది.
