AP News: ఆంధ్రప్రదేశ్‌లోని వివిధ ప్రభుత్వ కార్పొరేషన్లు, బోర్డులు, ఇతర ప్రభుత్వ సంస్థల్లో నామినేటెడ్ పదవుల్లో కొనసాగుతున్న నాయకులకు రాష్ట్ర ప్రభుత్వం తీపి కబురు అందించింది. ప్రస్తుతం చైర్మన్లు, డైరెక్టర్లు, సభ్యులుగా బాధ్యతలు నిర్వర్తిస్తున్న వారి పదవీకాలాన్ని మరో రెండు నెలల పాటు పొడిగిస్తూ ప్రభుత్వం కీలక నిర్ణయం తీసుకుంది. ఈ మేరకు సంబంధిత శాఖల అధికారులు అధికారికంగా ఉత్తర్వులు జారీ చేశారు. ప్రస్తుతం ఆయా సంస్థల్లో పదవీకాలం ముగింపు దశకు చేరుకున్న నాయకులకు ఈ నిర్ణయంతో ఊరట లభించినట్లయింది.
పొడిగింపునకు ప్రధాన కారణాలు..
ప్రభుత్వం తీసుకున్న ఈ తాజా నిర్ణయం వెనుక పాలనాపరమైన, సంక్షేమ కార్యక్రమాల లక్ష్యాలు ఉన్నాయి. రాష్ట్రంలో అమలువుతున్న ప్రభుత్వ సంక్షేమ పథకాలు, అభివృద్ధి కార్యక్రమాలు నిరంతరాయంగా సాగేందుకు, శాఖల మధ్య సమన్వయం దెబ్బతినకుండా ఉండేందుకు ఈ నిర్ణయం తీసుకున్నట్లు అధికార వర్గాలు స్పష్టం చేశాయి.
పనితీరు & సమన్వయం ఆధారంగా..
ప్రస్తుతం పదవుల్లో కొనసాగుతున్న నేతల పనితీరు, శాఖల వారీ సమీక్షలు, స్థానిక పరిస్థితుల ఆధారంగా ఈ రెండు నెలల పొడిగింపు వర్తిస్తుందని సమాచారం.
నామినేటెడ్ నేతల్లో హర్షం – బాధ్యతగా పనిచేస్తామని ప్రకటన..
ప్రభుత్వం తీసుకున్న నిర్ణయంపై పలు కార్పొరేషన్ల చైర్మన్లు, డైరెక్టర్లు సంతోషం వ్యక్తం చేశారు. తమపై నమ్మకంతో పదవీకాలాన్ని పొడిగించినందుకు ప్రభుత్వ పెద్దలకు ధన్యవాదాలు తెలిపారు. ఈ అదనపు గడువులో ప్రజా సమస్యల పరిష్కారానికి మరింత చురుగ్గా పనిచేస్తామని, ప్రభుత్వ పథకాలను ప్రజల్లోకి తీసుకెళ్లడంలో పూర్తి నిబద్ధతతో వ్యవహరిస్తామని వారు పేర్కొన్నారు. అయితే, ఈ పొడిగింపు ఏయే నిర్దిష్ట కార్పొరేషన్లు, బోర్డులకు వర్తిస్తుందనే సమగ్ర జాబితా, మార్గదర్శకాలు పూర్తి స్థాయి జీవోల ద్వారా వెల్లడి కానున్నాయి.