AP News: ఆంధ్రప్రదేశ్‌లో మున్సిపల్ ఎన్నికల నగారా మోగే సమయం దగ్గర పడుతుండటంతో కూటమి పార్టీల మధ్య సీట్ల సర్దుబాటు కసరత్తు అత్యంత కీలక దశకు చేరుకుంది. టీడీపీ, జనసేన, బీజేపీల మధ్య ఎలాంటి విభేదాలు లేకుండా, గెలుపు గుర్రాలకే ప్రాధాన్యమిస్తూ మున్సిపాలిటీలు, కార్పొరేషన్ల వారీగా సీట్ల పంపకాలను పూర్తి చేయడంపై ముఖ్యమంత్రి నారా చంద్రబాబు నాయుడు దృష్టి సారించారు.
ముందుగా ప్రధాన భాగస్వామి అయిన జనసేనతో లెక్కలు తేల్చిన తర్వాతే బీజేపీతో తుది చర్చలు జరపాలని చంద్రబాబు నిర్ణయించారు. ఇందులో భాగంగా మంగళవారం ఉండవల్లిలోని సీఎం నివాసం, జనసేన కార్యాలయాల వేదికగా మారథాన్ చర్చలు జరిగాయి.
పవన్‌తో పల్లా శ్రీనివాసరావు, మంత్రి నిమ్మల 30 నిమిషాల భేటీ..
సీఎం చంద్రబాబుతో మొదట సమావేశమైన టీడీపీ రాష్ట్ర అధ్యక్షుడు పల్లా శ్రీనివాసరావు, మంత్రి నిమ్మల రామానాయుడు.. ఆ తర్వాత నేరుగా జనసేన పార్టీ కార్యాలయానికి వెళ్లారు..
ఉపముఖ్యమంత్రి పవన్‌తో చర్చలు..
జనసేన అధినేత, డిప్యూటీ సీఎం పవన్ కల్యాణ్‌తో టీడీపీ నేతలు దాదాపు 30 నిమిషాల పాటు ఏకాంతంగా భేటీ అయ్యారు. పార్టీల వారీగా కేటాయించాల్సిన ప్రాంతాలు, స్థానిక పరిస్థితులపై ప్రాథమికంగా చర్చించారు.
జనసేన డిమాండ్లు..
రాష్ట్రవ్యాప్తంగా కనీసం 6 మున్సిపల్ కార్పొరేషన్లతో పాటు 26 మున్సిపాలిటీలలో తమ పార్టీకి మేయర్, చైర్‌పర్సన్ స్థానాలు లేదా మెజారిటీ వార్డులను కేటాయించాలని జనసేన పట్టుబడుతున్నట్లు సమాచారం.
నాదెండ్ల టీమ్‌తో ఫైనల్ కసరత్తు..
సీట్ల సర్దుబాటుకు సంబంధించిన గ్రౌండ్ రియాలిటీలు, పూర్తి వివరాలపై మంత్రి నాదెండ్ల మనోహర్, ఎమ్మెల్సీ వంశీకృష్ణ యాదవ్, చిల్లపల్లి శ్రీనివాస్, లింగమనేని రమేశ్‌లతో కూర్చుని మాట్లాడాలని పవన్ సూచించారు. అనంతరం టీడీపీ ప్రతినిధులు నాదెండ్లతో విడివిడిగా సమావేశమై వార్డుల వారీ సమీకరణాలపై చర్చలు జరిపారు.
బాబుతో బీజేపీ చీఫ్ మాధవ్ భేటీ – రాత్రి సీఎం నివాసంలో కూటమి మహాసమావేశం..
మరోవైపు, బీజేపీ రాష్ట్ర అధ్యక్షుడు పి.వి.ఎన్. మాధవ్ కూడా సీఎం చంద్రబాబుతో సమావేశమై తమ పార్టీ బలంగా ఉన్న పట్టణ ప్రాంతాలు, బీజేపీకి కేటాయించాల్సిన మున్సిపాలిటీలు, కార్పొరేషన్ వార్డుల జాబితాను అందించారు. జనసేనతో చర్చల సారాంశంపై స్పష్టత వచ్చిన తర్వాత, రాత్రి 8 గంటలకు సీఎం చంద్రబాబు నివాసంలో టీడీపీ, జనసేన, బీజేపీ కీలక నేతలు మరోసారి సమావేశం కానున్నారు.
ఈ రాత్రి జరిగే భేటీలోనే మూడు పార్టీలకు ఎన్నెన్ని కార్పొరేషన్లు, మున్సిపాలిటీలు దక్కుతాయన్న దానిపై పూర్తి స్థాయి స్పష్టత రానుంది. వివాదాస్పద స్థానాల్లో ఉమ్మడి అభ్యర్థుల ఎంపిక, టికెట్లు రాని నేతలను బుజ్జగించే కార్యాచరణను కూడా ఖరారు చేయనున్నారు. కూటమి ఐక్యత ఏమాత్రం దెబ్బతినకుండా, అధికార పక్షంగా స్థానిక సంస్థల్లో క్లీన్ స్వీప్ చేయడమే లక్ష్యంగా మూడు పార్టీల అగ్రనేతలు వేస్తున్న ఎత్తుగడలు ఇప్పుడు ఏపీ రాజకీయాల్లో తీవ్ర ఉత్కంఠ రేపుతున్నాయి.