Revanth Reddy: దేశ పౌరులందరికీ రాజ్యాంగం ద్వారా సంక్రమించిన పవిత్రమైన ఓటు హక్కును బీజేపీ ప్రభుత్వం కాలరాస్తోందని తెలంగాణ ముఖ్యమంత్రి ఎనుముల రేవంత్ రెడ్డి తీవ్ర ఆగ్రహం వ్యక్తం చేశారు. ఓటర్ల జాబితా ప్రత్యేక ముమ్మర సవరణ (SIR) ప్రక్రియను గతంలో కొత్తగా ఓట్లు కల్పించడానికి వినియోగిస్తే.. ప్రస్తుత కేంద్ర ప్రభుత్వం మాత్రం ప్రజల ఓట్లను నిర్దాక్షిణ్యంగా తొలగించడానికి ఓ ఆయుధంగా వాడుకుంటోందని ఆరోపించారు. ఢిల్లీ పర్యటనలో ఉన్న సీఎం రేవంత్ రెడ్డి సోమవారం మీడియాతో మాట్లాడుతూ ప్రధానమంత్రి నరేంద్ర మోదీ, కేంద్ర ప్రధాన ఎన్నికల కమిషనర్ (CEC) జ్ఞానేష్ కుమార్‌ల తీరుపై నిప్పులు చెరిగారు.
ఈడీ, సీబీఐలతో పని కాకపోవడంతోనే ఈసీ అడ్డాగా కుట్రలు..
కేంద్ర ప్రభుత్వ దర్యాప్తు సంస్థల దుర్వినియోగంపై సీఎం రేవంత్ రెడ్డి ఘాటు వ్యాఖ్యలు చేశారు. ప్రధాని మోదీ తన అధికారాన్ని నిలబెట్టుకోవడానికి గతంలో ఈడీ (ED), సీబీఐ (CBI), ఇన్‌కమ్‌ట్యాక్స్ (IT) విభాగాలను యథేచ్ఛగా వాడుకున్నారు. ఇప్పుడు ప్రజల్లో తీవ్ర వ్యతిరేకత రావడంతో ఆ సంస్థలతో పని జరగడం లేదని గుర్తించి.. నేరుగా కేంద్ర ఎన్నికల సంఘాన్ని (EC) పావుగా వాడుకుంటున్నారు అని విమర్శించారు.
బీజేపీ వ్యతిరేకుల ఓట్లే లక్ష్యం..
బీజేపీకి వ్యతిరేకంగా ఓటేసే వర్గాల పేర్లను ఓటర్ల జాబితా నుంచి గంపగుత్తగా తొలగించడానికే ఈ ఎస్ఐఆర్ (SIR) ప్రక్రియను తీసుకొచ్చారు. తమకు వ్యతిరేకంగా ఉన్నవారి ఓట్లను తుడిచిపెట్టాలని సీఈసీ జ్ఞానేష్ కుమార్‌కు కేంద్రం స్పష్టమైన టాస్క్ ఇచ్చింది అని ఆరోపించారు.
టార్గెట్‌లో యువత, పేదలు..
దేశంలో బీజేపీ పాలనను ప్రధానంగా వ్యతిరేకిస్తున్నది యువత, నిరుద్యోగులు, పేద ప్రజలేనని, సరిగ్గా వీరి ఓట్లనే లక్ష్యంగా చేసుకుని సీఈసీ జ్ఞానేష్ కుమార్ ఓటర్ల జాబితా నుంచి గల్లంతు చేస్తున్నారని సీఎం మండిపడ్డారు.
మిగతా ఇద్దరు ఈసీలూ వ్యతిరేకించారు – మోదీకి ఎందుకంత ప్రేమ?
ఎన్నికల సంఘం అంతర్గత పరిణామాలను ప్రస్తావిస్తూ రేవంత్ రెడ్డి కీలక అంశాలను లేవనెత్తారు. కేంద్ర ఎన్నికల సంఘంలో తీవ్రమైన తప్పులు జరుగుతున్నాయని, సీఈసీ వ్యవహారశైలిపై మిగతా ఇద్దరు ఎన్నికల కమిషనర్లు కూడా బాహాటంగా అభ్యంతరం వ్యక్తం చేశారని గుర్తుచేశారు.
జ్ఞానేష్ కుమార్ తీసుకుంటున్న నిర్ణయాలన్నీ ఏకపక్షంగా ఉన్నాయని తేటతెల్లమైన తర్వాత కూడా.. ప్రజాస్వామ్య వ్యవస్థలను నాశనం చేస్తున్న అలాంటి వివాదాస్పద అధికారిని పదవి నుంచి తొలగించడానికి ప్రధాని మోదీకి ఉన్న అభ్యంతరం ఏమిటని సూటిగా ప్రశ్నించారు.
‘సర్‌’ జరిగిన చోటే బీజేపీ గెలుపు – ఓటర్ల సంఖ్యపై లాజిక్ ప్రశ్న..
దేశవ్యాప్త ఎన్నికల గణాంకాలను విశ్లేషిస్తూ ముఖ్యమంత్రి రేవంత్ రెడ్డి కేంద్రానికి సూటి సవాల్ విసిరారు..
-
రాష్ట్రాల ఫలితాలు స్పష్టం చేస్తున్నాయి..“సర్‌ (SIR) ప్రక్రియ అమలు కాని రాష్ట్రాల్లో బీజేపీ ఘోరంగా ఓడిపోయింది. కానీ ఈ వివాదాస్పద ప్రక్రియను చేపట్టిన బిహార్, పశ్చిమ బెంగాల్ వంటి రాష్ట్రాల్లో మాత్రం బీజేపీకి లబ్ధి చేకూరింది” అని గణాంకాలను ఎత్తి చూపారు.
-
ఓటర్ల సంఖ్య ఎందుకు తగ్గింది?..“సాధారణంగా దేశంలో జనాభా ఏటా పెరుగుతున్నప్పుడు.. దానికి అనుగుణంగా కొత్తగా 18 ఏళ్లు నిండిన ఓటర్ల సంఖ్య కూడా పెరగాలి కదా? మరి ఓటర్ల జాబితాల్లో సంఖ్య ఎందుకు తగ్గిపోయింది? లక్షలాది మంది ఓట్లు ఎలా గల్లంతయ్యాయి?” అని ఆయన నిలదీశారు.
రాజ్యాంగ పరిరక్షణ కోసం, ప్రజల ఓటు హక్కును కాపాడుకోవడం కోసం ఎంతటి పోరాటానికైనా సిద్ధమని, ఈ అక్రమాలపై దేశవ్యాప్తంగా ప్రజాస్వామిక శక్తులు ఏకం కావాల్సిన సమయం ఆసన్నమైందని రేవంత్ రెడ్డి పిలుపునిచ్చారు.