Bala Krishna: హైదరాబాద్‌లోని అత్యంత రద్దీ ప్రాంతమైన కాసు బ్రహ్మానందరెడ్డి (కేబీఆర్) పార్క్ చుట్టూ ట్రాఫిక్ సమస్యలను శాశ్వతంగా పరిష్కరించేందుకు సినీ నటుడు, హిందూపురం ఎమ్మెల్యే నందమూరి బాలకృష్ణ తన ఇంటి స్థలాన్ని ఇచ్చేందుకు ముందుకొచ్చారు. బంజారాహిల్స్, జూబ్లీహిల్స్ నుంచి దుర్గం చెరువు కేబుల్ బ్రిడ్జి, నాలెడ్జ్ సిటీ, గచ్చిబౌలి ఐటీ కారిడార్ వైపు వెళ్లే లక్షలాది మంది ప్రయాణికులకు ట్రాఫిక్ కష్టాలు తీర్చేందుకు ప్రభుత్వం చేపట్టిన రోడ్డు విస్తరణ పనులకు ఆయన తన నివాసంలోని 862.77 చదరపు గజాల స్థలాన్ని కేటాయించారు.
నగరంలో గజం స్థలం ధర రూ. 4–5 లక్షల వరకు పలికే అత్యంత విలువైన ప్రాంతంలో ఉన్నప్పటికీ.. నగదు రూపంలో ఎలాంటి నష్టపరిహారం తీసుకోకుండా, కేవలం ట్రాన్స్‌ఫరబుల్ డెవలప్‌మెంట్ రైట్స్ (TDR) ఆధారంగానే ఈ స్థలాన్ని జీహెచ్‌ఎంసీకి అప్పగించేందుకు ఆయన సంకోచించకుండా అంగీకరించారు.
ఎన్టీఆర్ నిర్మించిన చారిత్రక నివాసం – సగానికి పైగా పోతున్న ఇల్లు..
1982 నాటి జ్ఞాపకం..
ఈ నివాసాన్ని బాలకృష్ణ కోసం ఆయన తండ్రి, దివంగత ముఖ్యమంత్రి నందమూరి తారక రామారావు (ఎన్టీఆర్) 1982లో నిర్మించి ఇచ్చారు. దశాబ్దాలుగా బాలకృష్ణ కుటుంబం ఇక్కడే నివసిస్తోంది. ఎన్టీఆర్ సైతం ఇక్కడ ఎన్నో కీలక రాజకీయ సమావేశాలు నిర్వహించడంతో పాటు తన అభిమానులను నేరుగా ఈ ఇంట్లోనే కలుసుకునేవారు.
సగానికి పైగా భవనం తొలగింపు..
ప్రస్తుతం చేపట్టిన రహదారి విస్తరణ పనుల్లో భాగంగా ఈ ఇంటిలోని ఒక భవనం సగానికి పైగా పోతోంది. ఇంతటి ఎమోషనల్ అనుబంధం ఉన్న నివాసమైనప్పటికీ, నగర అభివృద్ధికి ఆటంకం కలగకూడదనే ఉద్దేశంతో బాలకృష్ణ ఈ నిర్ణయం తీసుకున్నారు. ప్రస్తుతం ఆయన జూబ్లీహిల్స్‌లోనే మరో నూతన గృహాన్ని నిర్మించుకుంటున్నారని, త్వరలోనే అక్కడికి మారనున్నారని సమాచారం.
శబ్దాలయ స్టూడియో, భవ్య కన్‌స్ట్రక్షన్ కూడా ముందడుగు..
కేబీఆర్ పార్క్ చుట్టూ వన్-వే ట్రాఫిక్ విధానాన్ని శాశ్వతంగా సజావుగా అమలు చేసేందుకు ఇతర సంస్థలు కూడా తమ స్థలాలను ఇచ్చేందుకు ముందుకు వచ్చాయి.
-
శబ్దాలయ స్టూడియో:కేబీఆర్ పార్క్ ప్రధాన ప్రవేశ ద్వారం జంక్షన్ వద్ద ఫ్రీ-లెఫ్ట్ కల్పించేందుకు శబ్దాలయ స్టూడియోకు చెందిన 608 చదరపు గజాల స్థలాన్ని తీసుకుంటున్నారు. దీనివల్ల స్టూడియో ప్రహరీ గోడతో పాటు ప్రధాన భవనం వరకు పనులు సాగుతున్నాయి.
-
భవ్య కన్‌స్ట్రక్షన్:జూబ్లీహిల్స్ లోపలి కాలనీలు, ఫిల్మ్ నగర్ జంక్షన్, గచ్చిబౌలి వైపు వెళ్లే మార్గంలో ట్రాఫిక్ చిక్కులను తొలగించేందుకు భవ్య కన్‌స్ట్రక్షన్‌కు చెందిన స్థలాన్ని సేకరిస్తున్నారు. ఈ విస్తరణతో వారి కార్యాలయ భవనం పూర్తిగా తొలగించాల్సి వస్తోంది. వీరు కూడా నగదు పరిహారం తీసుకోకుండా టీడీఆర్‌లతోనే స్థలాలను అప్పగించేందుకు అంగీకరించారు.
ఐదు జంక్షన్లు దాటేలా రూ.1,090 కోట్లతో ఎలివేటెడ్ కారిడార్..
కేబీఆర్ పార్క్ చుట్టూ శాశ్వత ట్రాఫిక్ నియంత్రణ కోసం ప్రభుత్వం భారీ మౌలిక వసతుల ప్రాజెక్టులను వేగవంతం చేసింది:
-
స్టీల్ ఫ్లైఓవర్ నిర్మాణం:ముఫఖంజా ఇంజినీరింగ్ కాలేజీ నుంచి జూబ్లీహిల్స్ చెక్‌పోస్టు వరకు 4.3 కిలోమీటర్ల మేర 6 వరుసల ఎలివేటెడ్ కారిడార్‌ను రూ.1,090 కోట్లతో నిర్మిస్తున్నారు.
-
సిగ్నల్-ఫ్రీ ప్రయాణం:ఈ ఎలివేటెడ్ కారిడార్ అందుబాటులోకి వస్తే 5 ప్రధాన ట్రాఫిక్ జంక్షన్ల వద్ద ఆగాల్సిన అవసరం లేకుండా వాహనాలు నేరుగా ఐటీ కారిడార్ వైపు వెళ్లవచ్చు. అలాగే బంజారాహిల్స్ రోడ్ నెం-1ను అనుసంధానించేలా ప్రత్యేక కనెక్టింగ్ ర్యాంప్‌ను కూడా నిర్మిస్తున్నారు.
కొందరు ప్రముఖులు రోడ్డు విస్తరణ పనులకు ఆస్తులు ఇచ్చేందుకు సంకోచిస్తూ కోర్టులను ఆశ్రయిస్తున్న తరుణంలో.. బాలకృష్ణ, ఇతర సంస్థలు స్వచ్ఛందంగా తమ విలువైన ఆస్తులను ప్రజాహితం కోసం అప్పగించడం నగరవాసుల నుంచి ప్రశంసలు అందుకుంటోంది.