అర్ధరాత్రి 1 నుంచి 1:30 గంటల మధ్య ఏం జరిగింది?
పోలీసులు, స్థానికుల కథనం ప్రకారం దోపిడీ జరిగిన తీరు ఇలా ఉంది.. కామారెడ్డి – బాన్సువాడ ప్రధాన రహదారిపై ఉన్న గాంధారి మండల కేంద్రంలోని స్టేట్ బ్యాంక్ ఆఫ్ ఇండియా (SBI) ఏటీఎం సెంటర్‌ను దొంగలు టార్గెట్ చేశారు. ఆదివారం తెల్లవారుజామున సుమారు 1:00 గంటల నుంచి 1:30 గంటల మధ్య ఈ ఘటన జరిగింది.
దొంగలు సాధారణ వాహనాల్లో కాకుండా, రోడ్లపై తనిఖీలు ఉండవనే ఉద్దేశంతో ఏకంగా ఓ అంబులెన్స్‌లో ఘటనా స్థలానికి చేరుకున్నారు. సీసీటీవీల్లో తాము ఎవరో తెలియకుండా ఉండేందుకు నిందితులు మహిళలు ధరించే నైటీలు, ముఖాలకు మాస్కులు వేసుకున్నారు.
కట్టర్లతో మెషిన్ ధ్వంసం..
ఏటీఎం సెంటర్‌లోకి చొరబడిన దుండగులు అత్యాధునిక కట్టింగ్ పరికరాలతో మెషిన్‌ను కోసి, అందులోని క్యాష్ బాక్సులను పగులగొట్టి నగదును ఎత్తుకెళ్లారు. ఆ తర్వాత వచ్చిన అంబులెన్స్‌లోనే క్షణాల వ్యవధిలో పరారయ్యారు.
రంగంలోకి క్లూస్ టీమ్ – సీసీటీవీ విజువల్స్ పరిశీలన
ఉదయం ధ్వంసమైన ఏటీఎం యంత్రాన్ని చూసిన స్థానికులు పోలీసులకు సమాచారం అందించారు. పోలీసులు వెంటనే ఘటనా స్థలానికి చేరుకుని పరిస్థితిని సమీక్షించారు. క్లూస్ టీమ్, వేలిముద్రల నిపుణులను రప్పించి ఏటీఎం క్యాబిన్ నుంచి కీలక ఆధారాలు సేకరించారు.
ఏటీఎంలో శనివారం రాత్రికి ఎంత క్యాష్ బ్యాలెన్స్ ఉంది, దొంగలు ఎంత మొత్తం ఎత్తుకెళ్లారు అనే వివరాలను నిర్ధారించేందుకు బ్యాంక్ అధికారులతో కలిసి ఆడిట్ చేస్తున్నారు. దీంతో చోరీకి గురైన మొత్తంపై అధికారిక ప్రకటన వెలువడాల్సి ఉంది.
నకిలీ అంబులెన్సా? కాదా?
నేరానికి ఉపయోగించిన అంబులెన్స్ అసలైనదేనా లేక పోలీసుల కళ్లుగప్పడానికి ఏదైనా పాత వాహనానికి అంబులెన్స్ స్టిక్కర్లు, సైరన్ తగిలించి వాడుకున్నారా అనే కోణంలో పోలీసులు రవాణా శాఖ వివరాలను సేకరిస్తున్నారు.
గతంలో కరీంనగర్‌లోనూ ఇవే సీన్లు – ఒకే ముఠా పనేనా?
ఈ దోపిడీ జరిగిన తీరు పోలీసులను తీవ్ర ఆలోచనలో పడేసింది. ఎందుకంటే సరిగ్గా మూడు వారాల క్రితం కరీంనగర్ జిల్లాలోనూ అచ్చం ఇలాంటి తరహాలోనే దోపిడీలు జరిగాయి.
సెప్టెంబర్ 19 కరీంనగర్ ఘటనలు..
కరీంనగర్ శివార్లలోని దుర్శేడ్ (Durshed), తిమ్మాపూర్ (Thimmapur) ప్రాంతాల్లోని రెండు ఎస్‌బీఐ ఏటీఎంలను దొంగలు గ్యాస్ కట్టర్లతో కట్ చేసి నగదు దోచుకెళ్లారు. ఆ రెండు ఘటనల్లోనూ దుండగులు మహిళల దుస్తులు (నైటీలు) ధరించి వచ్చారు. సీసీటీవీ కెమెరాలపై స్ప్రే చల్లడం లేదా కెమెరాల దిశను మార్చడం వంటి ప్రయత్నాలు చేశారు.
కరీంనగర్, కామారెడ్డి ఘటనల్లో నిందితుల ఆనవాళ్లు, వేషధారణ, వాడిన టెక్నిక్ ఒకేలా ఉండటంతో.. ఇది ఏదైనా ప్రొఫెషనల్ లేదా అంతర్రాష్ట్ర దొంగల ముఠా పనేనా అనే అనుమానాలు బలపడుతున్నాయి. ప్రధాన రహదారులపై ఉన్న టోల్‌గేట్లు, సీసీటీవీ ఫుటేజీ ఆధారంగా నిందితుల వాహనం వెళ్లిన మార్గాన్ని పోలీసులు జల్లెడ పడుతున్నారు.
