AA23: అల్లు అర్జున్ – లోకేష్ కనగరాజ్ మూవీ ఆగిపోయిందా?

AA23: ఐకాన్ స్టార్ అల్లు అర్జున్, కోలీవుడ్ సెన్సేషనల్ డైరెక్టర్ లోకేష్ కనగరాజ్ కాంబినేషన్‌లో తెరకెక్కనున్న క్రేజీ ప్రాజెక్ట్‌పై గత కొద్దిరోజులుగా సోషల్ మీడియాలో రకరకాల ఊహాగానాలు చక్కర్లు కొడుతున్నాయి. ఈ ప్రతిష్టాత్మక సినిమా ఆగిపోయిందని (Shelved), లేదా వాయిదా పడిందంటూ సోషల్ మీడియాలో తెగ ప్రచారం జరగడంతో బన్నీ అభిమానుల్లో తీవ్ర గందరగోళం నెలకొంది.

దీనికితోడు అల్లు అర్జున్ తన తదుపరి సినిమా మాస్ డైరెక్టర్ బోయపాటి శ్రీనుతో మొదలుపెట్టబోతున్నారంటూ తాజాగా వచ్చిన వార్తలు ఈ ప్రచారానికి మరింత ఆజ్యం పోశాయి. దీంతో లోకేష్ సినిమాను పూర్తిగా పక్కన పెట్టేశారేమోనని అంతా భావించారు. అయితే, ఈ వార్తలపై చిత్రబృందానికి చెందిన అత్యంత సన్నిహిత వర్గాలు స్పందించి అసలు నిజాన్ని స్పష్టం చేశాయి.

అల్లు అర్జున్ – లోకేష్ కనగరాజ్ సినిమా ఆగిపోయిందంటూ వస్తున్న ప్రచారంలో ఏమాత్రం వాస్తవం లేదని చిత్ర వర్గాలు కుండబద్దలు కొట్టాయి. ఈ ప్రాజెక్ట్ చాలా బలంగా ఉందని, అల్లు అర్జున్ లైనప్‌లో ఇది అత్యంత ప్రాధాన్యత ఉన్న సినిమా అని స్పష్టం చేశాయి.

బోయపాటి శ్రీనుతో బన్నీ సినిమా చర్చలు జరుగుతున్నాయన్న మాట నిజమే అయినప్పటికీ.. అంతమాత్రాన లోకేష్ కనగరాజ్ సినిమా ఆగిపోయినట్లు కాదని యూనిట్ వర్గాలు తెలిపాయి.

ప్రస్తుతం దర్శకుడు లోకేష్ కనగరాజ్ తన బృందంతో కలిసి ఈ సినిమా ప్రీ-ప్రొడక్షన్ పనులను శరవేగంగా పూర్తి చేస్తున్నారు. స్క్రిప్ట్ వర్క్, ఇతర సాంకేతిక సన్నాహాలు తుది దశకు చేరుకున్నాయి.

షూటింగ్ ఎప్పుడు ప్రారంభమవుతుందనే దానిపై మేకర్స్ నుంచి అధికారిక ప్రకటన రావాల్సి ఉన్నప్పటికీ.. ఎలాంటి ఆటంకాలు లేకుండా ప్రాజెక్ట్ శరవేగంగా ముందుకు సాగుతోంది. అన్ని పనులు పూర్తి చేసుకుని త్వరలోనే ఈ క్రేజీ చిత్రాన్ని సెట్స్‌పైకి తీసుకెళ్లడానికి పక్కా ప్లాన్ రెడీ చేస్తున్నారు.

‘పుష్ప’ ప్రాంచైజీతో పాన్ ఇండియా స్థాయిలో భారీ క్రేజ్ సంపాదించుకున్న అల్లు అర్జున్.. అటు తనదైన ‘ఎల్‌సీయూ’ (LCU) సినిమాలతో బాక్సాఫీస్ వద్ద సెన్సేషన్ సృష్టిస్తున్న లోకేష్ కనగరాజ్ చేతులు కలుపుతుండటంతో దేశవ్యాప్తంగా సినీ ప్రియుల్లో భారీ అంచనాలు నెలకొన్నాయి. ఈ బ్లాక్‌బస్టర్ కాంబోపై వస్తున్న పుకార్లకు తాజా క్లారిటీతో చెక్ పడటంతో అల్లు అర్జున్ ఫ్యాన్స్ ఊపిరి పీల్చుకుంటున్నారు.