Navratri 2026: అక్టోబర్ 11 నుంచే దుర్గా నవరాత్రుల ఉత్సవాలు.. ఈసారి ఏనుగుపై అమ్మవారి ఆగమనం..!

• ఆదివారం లేదా సోమవారం – ఏనుగు (గజం):
  నవరాత్రుల ప్రారంభం ఆదివారం గానీ, సోమవారం గానీ పడితే జగన్మాత ఏనుగుపై తరలివస్తుంది. ఏనుగు శుభానికి, సమృద్ధికి సంకేతం. ఈ వాహనంపై అమ్మవారు వస్తే దేశంలో సమృద్ధిగా వర్షాలు కురుస్తాయని, పంటలు బాగా పండి ధనధాన్యాలు, సుఖసంతోషాలు చేకూరుతాయని పండితులు చెబుతారు.
• మంగళవారం లేదా శనివారం – గుర్రం (అశ్వం):
  ఈ రెండు వారాల్లో నవరాత్రులు ప్రారంభమైతే గుర్రంపై వస్తారు. గుర్రం వేగానికి, మార్పునకు ప్రతీక. సమాజంలో పెద్ద మార్పులు, రాజకీయ సంక్షోభాలు, దేశాల మధ్య ఉద్రిక్తతలు లేదా అధికార మార్పులకు ఇది సూచికగా భావిస్తారు.
• బుధవారం – పడవ (నౌక):
  బుధవారం ఉత్సవాలు మొదలైతే నౌకపై వస్తారు. పడవ సమస్యలను దాటించే సాధనం. సర్వజనుల మనోభీష్టాలు నెరవేరడం, కష్టాలు తీరడం, కల్యాణప్రదమైన ఫలితాలు లభిస్తాయని నమ్ముతారు.
• గురువారం లేదా శుక్రవారం – పల్లకి (డోలీ):
  గురువారం లేదా శుక్రవారాల్లో మొదలైతే అమ్మవారు పల్లకిలో వస్తారు. దీనిని కొంత అశుభ సూచకంగా భావిస్తారు. ప్రకృతి వైపరీత్యాలు, అంటువ్యాధులు లేదా ఆర్థిక సంక్షోభాలు వచ్చే అవకాశాలు ఉంటాయని శాస్త్రాలు చెబుతాయి.

విజయదశమి రోజున అమ్మవారి తిరుగు ప్రయాణం (ప్రస్థాన వాహనాలు)..

• ఆదివారం లేదా సోమవారం – దున్నపోతు (మహిషం):
  ఈ రోజుల్లో దసరా ముగిస్తే మహిషంపై వెళ్తారు. ఇది లోకంలో కొంత దుఃఖం, అశాంతి పెరుగుదలకు సూచన.
• మంగళవారం లేదా శనివారం – కోడి పుంజు / చరణాయుధం (కుక్కుటం):
  విజయదశమి మంగళ లేదా శనివారాల్లో వస్తే అమ్మవారి వాహనం కుక్కుటం. ఇది ప్రజల మధ్య అంతర్గత కలహాలు, అశాంతి, ఒత్తిళ్లు పెరిగేందుకు సంకేతంగా పరిగణిస్తారు.
• బుధవారం లేదా శుక్రవారం – ఏనుగు (గజం):
  ఈ రోజుల్లో అమ్మవారు ఏనుగుపై ప్రస్థానం చేస్తే సర్వతోముఖాభివృద్ధి, శుభం, మానవాళికి శ్రేయస్సు లభిస్తుంది.
• గురువారం – పల్లకి (డోలి):
  గురువారం నాడు అమ్మవారు పల్లకిపై తిరుగు ప్రయాణమైతే దేశంలో శాంతిభద్రతలు బాగుంటాయని, సౌభాగ్యం వర్ధిల్లుతుందని విశ్వసిస్తారు.

2026 శారదీయ నవరాత్రుల విశిష్టత..

• ఆగమనం (రాక):
  2026లో శారదీయ నవరాత్రులు ఆదివారం (అక్టోబర్ 11న) ప్రారంభమవుతున్నాయి. కాబట్టి ఈ ఏడాది జగన్మాత ‘ఏనుగు’ (గజం) వాహనంపై భువికి విచ్చేస్తున్నారు. ఇది సమాజానికి అత్యంత శ్రేయస్కరమైన, సుభిక్షమైన శుభ సంకేతం.
• ప్రస్థానం (వీడ్కోలు):
  విజయదశమి పర్వదినం మంగళవారం (అక్టోబర్ 20న) వస్తోంది. కాబట్టి ప్రస్థాన వాహనంగా ‘చరణాయుధం’ (కోడిపుంజు) నిర్ధారితమైంది. ఇది సమాజంలో అంతర్గత కలహాలు, విభేదాలు రాకుండా ప్రజలు, పాలకులు అప్రమత్తంగా ఉండాలని హెచ్చరించే సూచనగా జ్యోతిష్య నిపుణులు విశ్లేషిస్తున్నారు.