Diesel Prices: ప్రపంచవ్యాప్తంగా రోజురోజుకూ భగ్గుమంటున్న ఇంధన ధరలు, సప్లై కొరత ఆందోళనల నడుమ గ్రూప్ ఆఫ్ సెవెన్ (G7) దేశాలు అత్యంత కీలక నిర్ణయం తీసుకున్నాయి. మార్కెట్‌లోని ఒత్తిడిని తగ్గించేందుకు తమ వ్యూహాత్మక చమురు నిల్వల (Strategic Petroleum Reserves) నుంచి ఏకంగా 100 మిలియన్ బ్యారెళ్ల చమురు, పెట్రోలియం ఉత్పత్తులను మార్కెట్లోకి విడుదల చేసేందుకు అంగీకరించాయి. ఈ సంయుక్త నిర్ణయంలో రవాణా రంగానికి జీవనాధారమైన డీజిల్ సప్లైకి అత్యధిక ప్రాధాన్యత ఇచ్చారు.
తొలి 20 రోజుల్లోనే భారీగా డీజిల్ విడుదల..
రిజర్వ్ నిల్వల నుంచి చమురు, ఇంధనం తరలింపు ప్రక్రియ వెంటనే మొదలై దాదాపు నాలుగు నెలల పాటు కొనసాగనుంది. పారిశ్రామిక, రవాణా రంగాలను గాడిన పెట్టేందుకు తొలి 20 రోజుల్లోనే పెద్ద మొత్తంలో డీజిల్‌ను మార్కెట్లోకి దించేలా ప్లాన్ సిద్ధం చేశారు. ఈ మొత్తం ప్రక్రియను, సరఫరా లెక్కలను అంతర్జాతీయ ఇంధన సంస్థ (International Energy Agency – IEA) నేరుగా పర్యవేక్షించి, సభ్య దేశాల మధ్య సమన్వయం చేయనుంది.
అమెరికా, యూరప్‌లలో ఆకాశాన్నంటిన డీజిల్ రేట్లు..
అమెరికా, యూరప్‌లలో డీజిల్ ధరలు ఆల్-టైమ్ రికార్డు స్థాయికి చేరిన క్లిష్ట సమయంలో ఈ నిర్ణయం వెలువడింది. అక్టోబర్ 2 నాటికి అమెరికాలో డీజిల్ సగటు ధర గ్యాలన్‌కు 6.37 డాలర్లుగా ఉంది. అంతకుముందు సెప్టెంబర్ 22న ఇది ఏకంగా 6.52 డాలర్ల జీవితకాల గరిష్ఠాన్ని తాకింది. యూరప్ మార్కెట్లలోనూ డీజిల్ ధరల తీవ్రత రవాణా రంగంపై పెను భారాన్ని మోపింది.
ఈ నిర్ణయంపై అమెరికా అధ్యక్షుడు డొనాల్డ్ ట్రంప్ స్పందిస్తూ.. యూరప్ దేశాలు తమ వద్ద ఉన్న భారీ డీజిల్ నిల్వల నుంచి పెద్ద ఎత్తున మార్కెట్లోకి ఇంధనాన్ని విడుదల చేసేందుకు ఒప్పుకున్నాయని, ఈ ప్రక్రియ తక్షణమే మొదలవుతుందని తెలిపారు. దీనివల్ల అమెరికా మార్కెట్లలో ఇంధన లభ్యత పెరిగి ధరల భారం తగ్గుతుందని ఆశాభావం వ్యక్తం చేశారు.
ఎగుమతులపై ఎలాంటి ఆంక్షలు ఉండవు..
G7 దేశాలు తమ ఒప్పందంలో కొన్ని కీలక అంశాలను స్పష్టం చేశాయి.. గ్రూప్ సభ్య దేశాల మధ్య ఇంధనం, పెట్రోలియం ఉత్పత్తుల ఎగుమతులపై ఎలాంటి ఆంక్షలు (Export Bans) విధించకూడదని నిర్ణయించాయి. ఆయిల్ రిఫైనరీల మెయింటెనెన్స్ పనులను పరస్పరం సమన్వయం చేసుకోవడంతో పాటు, వీలైనంత వరకు రిఫైనరీల ఉత్పత్తి సామర్థ్యాన్ని గరిష్ఠ స్థాయికి పెంచాలని తీర్మానించాయి.
అంతర్జాతీయ మార్కెట్లో తగ్గిన ముడిచమురు ధరలు..
G7 దేశాల ప్రకటనతో గ్లోబల్ ఆయిల్ మార్కెట్లలో ధరలు వెంటనే దిగివచ్చాయి.
-
బ్రెంట్ క్రూడ్ (Brent): రాయిటర్స్ నివేదిక ప్రకారం.. డిసెంబర్ డెలివరీ బ్రెంట్ క్రూడ్ బ్యారెల్ ధర సుమారు 1.1% తగ్గి 101.23 డాలర్లకు చేరింది.
-
డబ్ల్యూటీఐ (WTI): అమెరికన్ ముడిచమురు ధర 2.3% మేర పతనమై బ్యారెల్‌కు 90.70 డాలర్ల వద్ద ట్రేడైంది.
-
యూరోపియన్ గ్యాస్ ఆయిల్: యూరప్ గ్యాస్ ఆయిల్ ఫ్యూచర్స్ ఏకంగా 7 శాతానికి పైగా కుప్పకూలాయి.
అయితే, ఈ 100 మిలియన్ బ్యారెళ్ల విడుదల ప్రకటనలో గతంలో ఇచ్చిన హామీలు కూడా కలిసి ఉన్నాయా? లేక ఇది పూర్తిగా అదనపు విడుదలా? అనేదానిపై మార్కెట్ వర్గాలకు మరింత స్పష్టత రావాల్సి ఉంది. అయినప్పటికీ, ప్రస్తుతానికి ఈ చర్య గ్లోబల్ ఇంధన మార్కెట్‌కు కాస్త ఉపశమనం కలిగించింది.