Kailash Mansarovar Yatra: కైలాస మానస సరోవర యాత్ర ఎందుకంత పవిత్రం? ఎందుకంత ప్రమాదకరం?

పౌరాణిక విశిష్టత – నమ్మకాలు..

• పరమశివుని నివాసం: ఆదిదంపతులైన శివపార్వతుల నివాస స్థానంగా భావించే కైలాస పర్వతం సముద్ర మట్టానికి 22,028 అడుగుల ఎత్తులో ఒక భారీ రాతి పిరమిడ్ ఆకారంలో, సహజ శివలింగంలా కనిపిస్తుంది. ఇక్కడ నిరంతరం ‘ఓంకార నాదం’ ప్రతిధ్వనిస్తుందని విశ్వసిస్తారు.
• దివ్య తీర్థం మానస సరోవరం: 33 కోట్ల మంది దేవతలు ప్రతిరోజూ బ్రాహ్మీ ముహూర్తంలో స్నానమాడే పవిత్ర సరస్సుగా దీనిని భావిస్తారు. విష్ణుపాదాల నుంచి ఉద్భవించిన గంగమ్మను శివుడు తన జటాజూటంలో బంధించిన పుణ్యభూమి ఇది. ఈ సరస్సు నీటిని తాగితే శివసాయుజ్యం, అక్కడి మట్టిని తాకితే బ్రహ్మలోక ప్రాప్తి కలుగుతాయని పురాణాల నమ్మకం.
• రంగులు మారే జలాలు: తీవ్రమైన చలి ఉన్నప్పటికీ మానస సరోవరంలో నీరు గడ్డకట్టకపోవడం, ప్రతి గంటకూ నీటి రంగులు మారడం, సరస్సు అవతలి వైపున్న రాక్షస తాల్ (రాక్షస కొండ) మాత్రం గడ్డకట్టి ఉండటం ఇక్కడి వింతల్లో ఒకటి.

ఎవరెస్ట్ కంటే ఎత్తు తక్కువే.. అయినా ఎవరూ ఎందుకు ఎక్కలేకపోయారు?..

1. సంక్లిష్టమైన భౌగోళిక ఆకృతి: నిటారైన నాలుగు వైపుల రాతి పిరమిడ్ గోడలు, గంటగంటకూ మారే తీవ్రమైన మంచు తుఫానులు అధిరోహణను అసాధ్యంగా మార్చాయి.
2. అదృశ్య శక్తులు & అయస్కాంత ప్రభావాలు: ఒక నిర్దిష్ట ఎత్తు దాటిన తర్వాత పర్వతారోహకులు దిక్కుతోచని స్థితికి చేరుకుంటారని, నిగూఢ శక్తులు ముందుకు వెళ్లనివ్వవని కథనాలు ప్రచారంలో ఉన్నాయి.
3. ఆధ్యాత్మిక నిషేధం: పరమ పవిత్రమైన శివుని నివాస స్థానాన్ని పాదాలతో తాకకూడదన్న విశ్వాసంతో అన్ని మతాల భక్తులు పర్వతాన్ని ఎక్కడానికి బదులు దాని చుట్టూ ప్రదక్షిణ (పరిక్రమ) చేయడానికే మొగ్గు చూపుతారు.

సాహసాలకే సాహసం – కైలాస యాత్ర ఎందుకంత ప్రమాదకరం?..

• ఆక్సిజన్ కొరత: ఈ యాత్ర సముద్ర మట్టానికి 14,000 నుంచి 19,000 అడుగుల ఎత్తులో సాగుతుంది. ఎత్తు పెరిగేకొద్దీ ఆక్సిజన్ తగ్గి తీవ్రమైన తలనొప్పి, శ్వాసకోశ ఇబ్బందులు (AMS) ఎదురవుతాయి.
• 52 కిలోమీటర్ల క్లిష్టమైన పరిక్రమ: కైలాస పర్వతం చుట్టూ 52 కిలోమీటర్ల మేర సాగే ప్రదక్షిణను ఎగుడుదిగుడు రాతి దారుల్లో, గడ్డకట్టే చలిలో పూర్తి చేయడానికి సుమారు మూడు రోజుల సమయం పడుతుంది.